1 Tan natan, nia, kaagian ko, unong ed asalitak la ed sikayo a mamprofesiya ak, nia, saya so iprofesiyak—a saray beñgatla a sinalita na saya a profeta Zenos, nipaakar ed kailalakan na Israel, a sikara so nialiling to ed sakey a kiew na oliva, so ag-nasaew a nagawa.

2 Tan say agew a pañgiteen to na lima to lamet ed komadua a panaon ed pamawi to ed saray totoo to, so say agew, on, angan say sankaunoran la so panaon, a saray igagangan na Katawan onla ra ed pakapanyari to, a mamayubo tan mamaltong ed kaolivaan to; tan kayari to nia say kasampotan magano la ya onsabi.

3 Tan agay la so palar na saray nankimey a siseseet ed kaolivaan to; tan agay la so kaayew na saray nibantak ed saray dili a pasen da! Tan say mundo napoolan ed apoy.

4 Tan agay la so panañgasi na Dios ed sikatayo, lapu ed nunoten to so kailalakan na Israel, mandapag a saray lamut tan sañga; tan iunat to so saray taklay to ed sikara dia ed sanagew; tan matalker so teñger da tan mapasirayew ira a totoo; balet no kaonoñgan karakel so ag mamaawet ed saray puso ra sikara so nilaban ed panarian na Dios.

5 Dia ed ontan, inararok a kaagian, pikasik ed sikayo ed panamegley na saray anlemek a salita a sikayo so mambabawi, tan ondago kayo a napno na gagala ed puso, tan ompeket kayo ed Dios a siñga say ipepeket to ed sikayo. Tan legan a say taklay na panañgasi to so akaunat ya akaarap ed sikayo ed liwawa na agew, ag yo papaaweten so saray puso yo.

6 On, dia ed saya ya agew, no nareñgel yo so voces to, ag yo papaaweten so saray puso yo; akin a sikayo so ompatey?

7 Tan nia, kayari a sikayo so binayuboan ed panamegley na maong a salita na Dios ed legan na dukey na agew, mañgiter kayo kasi na mauges a buñga, pian sikayo so nabatang tan ibantak ed apoy?

8 Nia, ipulisay yo kasi so saraya a salita? Ipulisay yo kasi so saray salita na saray profeta; tan ipulisay yo kasi so amin a salita nipaakar ed si Cristo, kayari a dakel so nansalita nipaakar ed sikato; tan iburi yo kasi so maong a salita nen Cristo, tan say pakapanyari na Dios, tan say palabo na Espiritu Santo, tan depdepen yo kasi so Masanto ya Espiritu, tan lodlureyen yo kasi so baleg a plano na kadundon, a saya so imparaan ya onkana ed sikayo?

9 Ag yo kasi kabat no gawaen yo so saraya a beñgatla, say pakapanyari na kadundon tan say kioli ed bilay a wala ed si Cristo, awiten to kayo ya ontalindeg a nababaiñgan tan katekep so makapataktakot a kasalanan ed arap na panañgokoman na Dios?

10 Tan unong ed pakapanyari na kaptekan, lapu ed say kaptekan ag nayari ya iburi, sikayo so kaukolan ya iarawi ya onla ed saman so dayat na apoy tan azufre, a say dalang to so ag-nasebseban, tan say asewek to so mampaatagey ed ando la ya ando, saya a dayat na apoy tan azufre so andi-angaan a kasegsegañgan.

11 O sirin, inararok a kaagian, mambabawi kayo, tan onloob kayo ed maptek a dalan, tan mampatuloy kayo ed makisir a dalan, anga ed nagamoran yo so bilay ya andi angaan.

12 O mandunong kayo, anto ni so nikuan ko?

13 Say kaunoran, mampatanir ak la, anga ed siak so onabet ed sikayo ed makapaliket a panañgokoman na Dios, a saya a panañgokoman bakbaken to so marelmeng na makapakebyew a paga tan takot. Amen.