1 Tan agawa a say komatalumplo tan apat a taon so linmabas, tan ontan met ed komatalumplo tan lima a taon, tan nia saray disipulos nen Jesus so anugyop na simbaan nen Cristo ed amin a dalin ed kaliber-liber. Tan no kaonoñgan karakel so saray dinmago ed sikara, tan sikara so petepeteg a nambabawi ed saray kasalanan da, so abiniagan ed ñgaran nen Jesus; tan inawat da met so Espiritu Santo.

2 Tan agawa ed komatalumplo tan anem a taon, saray totoo sikara ya amin so apasimbalo ed Katawan, ed amin a tapew na dalin, mandapag a saray Nephite tan saray Lamanite, tan angapo so baliñgaan tan saluñgatan ed limog da, tan balang sakey a too maptek so pioolop to ed sakey tan sakey.

3 Tan sikara so awalaan na amin a beñgatla a nampapara ed limog da; dia ed ontan angapo so mayaman tan duka, aripen tan bulos, balet sikara ya amin so nanmaliw a bulos, tan minanabang ed palabo a mañgatatawen.

4 Tan agawa a linmabas so komatalumplo tan pito a taon met, tan nampatuloy ni so kareenan ed saman a dalin.

5 Tan wala so saray ankakabaleg tan makapakelaw a kimey a ginawa na saray disipulos nen Jesus, ya angan pinaabig da so saray mansasakit, tan pinaoli da ed bilay so inaatey, tan ingangan da so lupoy ya onakar, tan saray bulag a mañgawat na pakanengneng da, tan saray telek so makadñgel, tan amin a kanengneñgan na milagro so ginawa ra ed limog na saray anak na totoo; tan angapo so ginawa ra a milagro no ag dia ed ñgaran nen Jesus.

6 Tan dia ed onia say komatalumplo tan walo a taon so linmabas, tan ontan met ed komatalumplo tan siam, tan komaapataplo tan sakey, tan komaapataplo tan dua, on, angan say komaapataplo tan siam a taon so linmabas, tan ontan met ed komalimamplo tan sakey, tan komalimamplo tan dua; on tan angan say komalimamplo tan siam a taon so linmabas.

7 Tan say Katawan pinaaliguas to ra a mapalalo ed saman a dalin; on, dia ed onia sikara lamet so nampaalagey na saray ciudad ed saraman so ciudad ya apoolan.

8 On, angan saman so baleg a ciudad na Zarahemla so impaalagey da lamet.

9 Balet wala so dakel a ciudad a saraya so linmereg, tan danum so linmetaw ed pasen da; dia ed ontan saraya a ciudad so ag la napasimbalo.

10 Tan natan, nia, agawa a saray totoo nen Nephi so binmiskeg, tan dinmakel ira ed mapalalo a siglat, tan sikara so nanmaliw a mapalalo a malimgas tan makaay-ayat a totoo.

11 Tan sikara so añgaasawa, tan akiasawa, tan sikara so abendicionan unong ed karakel na saray sipan a ginawa na Katawan ed sikara.

12 Tan ag la ra nankurang unong ed kagagawa tan pananontunan nen Moises; balet sikara so nankurang unong ed saray gangan ya inawat da ed Katawan tan Dios da, a nampatuloy ira ed panagayuno tan panagpikasi, tan ed mabetbet a pandaragup da a mampikasi tan ondeñgel ed salita na Katawan.

13 Tan agawa ya angapo so baliñgaan ed limog na amin a totoo, ed amin a saman a dalin; balet dakel so saray makapanyari a milagro ya agawa ed limog na saray disipulos nen Jesus.

14 Tan agawa a say komapitomplo tan sakey a taon so linmabas, tan ontan met ed komapitomplo tan dua a taon, on, tan dia ed arum to nia, anga ed komapitomplo tan siam so linmabas; on, angan say sanlasus a taon so linmabas, tan saray disipulos nen Jesus, a sikara so pinili to, sikara la ya amin so linma ed paraiso na Dios, likud lambeñgat ed saraman so talora a tinmilak, tan wala so saray arum a disipulos a naordinan a sinmalat ed sikara; tan ontan met dakel ed saray totoo a kabiañgan na saman a kailalakan so inaatey la.

15 Tan agawa ya angapo so baliñgaan ed saman a dalin, lapu ed aro na Dios a manaayam ed puso na saray totoo.

16 Tan angapo so ibegan, ni busolan, ni gulo, ni say inkabalangkantis, ni say panagtila, ni pateyan, odino antokaman a nengneng na kaalakan na laman; tan tua angapo la so malikeliket ed limog na amin a totoo a pinalsa na lima na Dios.

17 Angapo so saray matatakew, ni saray managpatey, ni say wala so saray Lamanite odino saray arum ira a ñgaran a mansampot ed saray ite; balet sikara so saksakey, ya anak nen Cristo, tan mananawir ed panarian na Dios.

18 Tan agay la so inkapalar da! Tan say Katawan binendicionan to ra ed amin a kimey da; on, angan sikara so abendicionan to tan inmaliguas ira anga ed say sanlasus tan samplo a taon so linmabas; tan saray unaan a kailalakan ed panaon nen Cristo so linmabas, tan angapo so baliñgaan ed saman a dalin.

19 Tan agawa a si Nephi, sikato so añgisinop ed saya a kaunoran a kasulatan, (tan insinop to ya inlaok ed saman so piligo nen Nephi) so inatey la, tan si anak to ya Amos so añgisinop a sinmublay ed sikato; tan insinop to ya intipon met ed saray piligo nen Nephi.

20 Tan saya so insinop to ed loob na walomplo tan apat a taon, tan wala ni nen saman so kareenan ed saman a dalin, likud ed melag a kabiañgan na saray totoo a sikara so inmalsa sumpa ed simbaan tan inala ra ed inkasikara so ñgaran a Lamanite; dia ed onia, wala lamet so nanmaliw a Lamanite ed saman a dalin.

21 Tan agawa a si Amos so inatey met, (tan saya so sanlasus tan siamaplo tan apat a taon nanlapu ed insabi nen Cristo) tan say laki ya anak to ya Amos so sinmublay ed sikato ya añgisinop; tan intipon to met ed saray piligo nen Nephi; tan saya so nisulat met ed libro nen Nephi, a saya a libro.

22 Tan agawa a duara a lasus a taon la so linmabas; tan say komadua a kailalakan so linmabas la ya amin likud lambeñgat ed pigara.

23 Tan natan siak, Mormon, labay ko a nakabatan yo a saray totoo so dinmakel, dia ed onia tinmayak la ra ed amin a tapew na dalin, tan sikara so nanmaliw a mapalalo a mayaman, lapu ed saray aliguas da ed si Cristo.

24 Tan natan, dia ed saya a komadua a lasus tan sakey a taon wala so ginmapo ed limog da a nampaatagey ed kinon, a siñga say panagsulong na saray ankabli a kawes, tan amin a kanengneñgan na mabli a perlas, tan saray beñgatla a mararakep ed mundo.

25 Tan nanlapu ed saman a panaon saray kayarian da tan saray tagano ra so nanmaliw la a binokbukoran da ya angapo la so pinanabang na saray arum.

26 Tan ginapoan da so pambibiigan unong ed balitang na panagbilay; tan ginapoan da so mampaalagey na saray simbaan ed inkasikara a dili pian sikara so makagungona, tan ginapoan da ya iburi so tua a simbaan nen Cristo.

27 Tan agawa a sanen linmabas so duara a lasus tan samplo a taon dakel so saray simbaan ed saman a dalin; on, dakel la so saray simbaan a kunwari kabat da si Cristo, balet ag da birbiren na karaklan so saray evangelio to, dia ed onia inawat da so amin a kanengneñgan na karelmeñgan, tan sikara so nantalima na sagrado ed sikato a saya so nisebel lapu ed ag-makanepegan.

28 Tan saya a simbaan so dinmakel a mapalalo lapu ed karelmeñgan, tan lapu ed pakapanyari nen Satanas a saya so amemben ed saray puso ra.

29 Tan lamet, wala ni so sakey a simbaan ya ag-mamirbir ed si Cristo; tan pinasegsegang da so peteg a simbaan nen Cristo, lapu ed saray panagpaabeba ra tan pananisia ra ed si Cristo; tan sikara so binabalaw-balaw da lapu ed saray dakel a milagro ya agawa ed limog da.

30 Dia ed onia inkana da so pakapanyari tan pakaoley ed saray disipulos nen Jesus a saraya so tinmilak ed sikara, tan sikara so impisok da ed pañgawan; balet dia ed pakapanyari na salita na Dios, a wala ed sikara, saray pañgawan so apaldua, tan sikara so linma a nangawa na saray makapakelaw a milagro ed limog da.

31 Manwari ya ontan, tan angaman ed saraya ya amin a milagro, saray totoo pinaawet da so saray puso ra, tan sikara so nampilalekan da a pateyen, angan siñga saray Judio ed Jerusalem a nampirawatan da a pateyen si Jesus, unong ed salita to.

32 Tan sikara so imbubontok da ed pugon na apoy, tan sikara so pinmaway ya angapo so sakit ya inawat da.

33 Tan sikara met so imbuntok da ed kuloñgan na saray atap a monanakap, tan sikara so akigalaw-galaw ed saray atap a monanakap a siñga sakey ya ogaw a manamamayo ed a kilaw na karnero; tan sikara so pinmaway ed limog na saraya, ya ag ira asakitan.

34 Manwari ya ontan, saray totoo pinaawet da so saray puso ra, lapu ed sikara so inwanwan na dakel a sacerdote tan saray tila-tila a profeta a mamapaalagey na dakel a simbaan, tan mangawa na amin a kanengneñgan na karelmeñgan. Tan binakbak da so saray totoo nen Jesus; balet saray totoo nen Jesus so ag binmales. Tan dia ed onia sikara so linmasay ed ag-pananisia tan karelmeñgan, manlapu ed sakey a taon tan anga ed sakey a taon, anga ed inlabas na duara a lasus tan talomplo a taon.

35 Tan natan agawa dia ed saya a taon, on, dia ed komadua a lasus tan talomplo tan sakey a taon, wala so baleg ya inkaapag ed limog na saray totoo.

36 Tan agawa a dia ed saya a taon wala so linmetaw a totoo a tatawagen na Nephite, tan sikara so peteg a mananisia ed si Cristo; tan dia ed limog da wala so tatawagen na saray Lamanite a—saray Jacobite, tan saray Josephite, tan saray Zoramite;

37 Dia ed onia saray peteg a mananisia ed si Cristo, tan saray peteg a manañgigalang ed si Cristo, (a dia ed limog da wala diman so saray talora a disipulos nen Jesus a sikara so tinmilak) sikara so atawag na Nephite, tan saray Jacobite, tan saray Josephite, tan saray Zoramite.

38 Tan agawa a saraman so ag-añgawat ed evangelio so atawag a saray Lamanite, tan saray Lemuelite, tan saray Ishmaelite; tan sikara so ag linmasay ed ag-pananisia, balet mabulos so linawa ra ya inmalsa sumpa ed evangelio nen Cristo; tan imbañgat da so saray anak da ya ag manisia, angan siñga say kaamaan da, nanlapu la ed gapo, so inlasay da.

39 Tan saya so lapu ed karelmeñgan tan karumsisan na kaamaan da, angan siñga nen gapo. Tan sikara so nibañgat a busolen da so saray anak na Dios, angan siñga saray Lamanite so nibañgat a busolen da so saray anak nen Nephi a nanlapu la ed gapo.

40 Tan agawa a say komadua a lasus tan apataplo tan apat a taon so linmabas, tan onia so kipapasen na saray totoo. Tan saraman so lalo a marelmeng a kabiañgan na saray totoo so binmiskeg, tan nanmaliw a mapalalo a dakel nen saray totoo na Dios.

41 Tan impatuloy da ni so mampaalagey na simbaan ya onkana ed inkasikara, tan pinarakep da ed amin a kanengneñgan na saray ankabli a beñgatla. Tan onia so inlabas na komadua a lasus tan limamplo a taon, tan ontan met na komadua a lasus tan anemaplo a taon.

42 Tan agawa a saray marelmeng a kabiañgan na saray totoo ginapoan da lamet ya iletneg so saray maamot a samba tan pannununoñgan nen Gadianton.

43 Tan saraman met so totoo ya atawag a totoo nen Nephi ginapoan da so manmaliw a mankinon ed saray puso ra, lapu ed mapalalo a kayamanan da, tan nanmaliw ira a mapasirayew a siñga saray kaagian da, a Lamanite.

44 Tan nanlapu ed saya a panaon saray disipulos ginapoan da so onermen lapu ed saray kasalanan na mundo.

45 Tan agawa a sanen linmabas so talora a lasus a taon, mandapag a saray totoo nen Nephi tan saray Lamanite so nanmaliw a mapalalo a marelmeng so sakey siñga ed sakey.

46 Tan agawa a saray matatakew a Gadianton so tinmayak ed amin a tapew na dalin; tan angapo la so matunong likud labat ed saray disipulos nen Jesus. Tan balitok tan pilak so insinop da a sawaan, tan sikara so nangagawa na antokaman a saliwan ed amin a kanengneñgan na saliwan.

47 Tan agawa a kayari na talora a lasus tan lima a taon so linmabas, (tan saray totoo so siansia ni a marelmeng) si Amos inatey; tan say agi to a laki, a si Ammaron, so añgisinop ed saray kasulatan a sinmublay ed sikato.

48 Tan agawa a sanen linmabas so talora a lasus tan duamplo a taon, si Ammaron, lapu ed sikato so sinebelan na Espiritu Santo, iniamot to so saray kasulatan a saraya so sagrado—on, angan amin a sagrado a kasulatan a saraya so nanaawatan da manlapu ed sakey a kailalakan ya anga ed sananey, a saraya so sagrado—angan ed talora a lasus tan duamplo a taon manlapu ed saman so insabi nen Cristo.

49 Tan saraya so iniamot to ed Katawan, pian saraya lamet so onsabi ed saray nakdaan ed kailalakan nen Jacob, unong ed saray profesiya tan saray sipan na Katawan. Tan dia ed onia nansampot so saray kasulatan nen Ammaron.