Say Libro nen Mormon

1 Tan natan siak, Mormon, gawaen ko so kasulatan na saray beñgatla a mandapag ya anengneng tan nadñgel ko, tan saya so tawagen ko a Libro nen Mormon.

2 Tan dia ed saman a panaon ya impañgiamot nen Ammaron ed saray kasulatan a nipaakar ed Katawan, sikato so linma ed siak, (mantaon ak la na samplora, tan ginapoan ko la so manaral unong ed kanengneñgan na aral na saray totook) tan si Ammaron inkuan to ed siak: Apatnagan ko a sakey ka a mareen ya ogaw, tan masiglat ka a manimano;

3 Dia ed ontan, sano mantaon ka la na ñgalñgali duamplo tan apat pilalek ko a nunoten mo so saray beñgatla a naimanom ed saraya a totoo; tan sano ongenap ka la ed saman a taon onla ka ed dalin na Antum, dia ed sakey a pukdol a saya so tatawagen a Shim; tan diman insinop ko ed Katawan so amin a masagrado a nitatak nipaakar ed saya a totoo.

4 Tan nia, alaen mo ed inkasika so saray piligo nen Nephi, tan say nakekeraan itilak mo ed pasen a kawalaan to; tan itatak mo ed saray piligo nen Nephi so amin a beñgatla a naimanom nipaakar ed saya a totoo.

5 Tan siak, Mormon, lapu ed sakey ak a kapolian nen Nephi, (tan say ñgaran nen amak Mormon) anunotan ko so saray beñgatla ya ingangan nen Ammaron ed siak.

6 Tan agawa a siak, lapu ed labinsakey a taon ko la, siak so inawit nen amak ed dalin a mamaabalaten, angan dia ed dalin na Zarahemla.

7 Say amin a tapew na dalin so nanmaliw la ya asakoban na saray paalagey, tan saray totoo agay la so karakel da ya siñga lawari buer na dayat.

8 Tan agawa ed saya a taon wala so ginmapo a sakey a bakal ed baetan na saray Nephite, a sikara so nanoolop a Nephite, tan saray Jacobite tan saray Josephite tan saray Zoramite; tan saya a bakal so wala ed baetan na saray Nephite, tan saray Lamanite tan saray Lemuelite tan saray Ishmaelite.

9 Natan saray Lamanite tan saray Lemuelite tan saray Ishmaelite, so atawag a Lamanite, tan saray duara ya olop so Nephite tan Lamanite.

10 Tan agawa a ginmapo so bakal ed limog da diman ed saray ketegan na Zarahemla, ya asinger ed danum na Sidon.

11 Tan agawa a saray Nephite akatipon ira na baleg a bilang na totoo, ya angan sinmulok ni ed bilang a talomplo a libo. Tan agawa ya awalaan ira ed saya met a taon na pigara a laban, a dia ed saya saray Nephite tinalo da so saray Lamanite tan dakel so pinatey da ed sikara.

12 Tan agawa a saray Lamanite imbabawi ra ya insener so saray gagala ra, tan wala so kareenan ed saman a dalin; tan say kareenan nampatuloy ed loob na apat taon, ya angapo so tinmerter a dala.

13 Balet say karelmeñgan so tinmaluna ed amin a tapew na dalin, a dia ed saya say Katawan iniarawi to so saray inararo to a disipulos to, tan say kimey na milagro tan panagtambal so tinmonda lapu ed karelmeñgan na saray totoo.

14 Tan angapo so palabo a nanlapu ed Katawan, tan say Espiritu Santo so ag sinmabi ed siopaman, lapu ed saray karelmeñgan da tan ag da pananisia.

15 Tan siak, lapu ed mantaon ak la na labinlima tan siñga mareen la so kanunotan ko, dia ed onia siak so dinalaw na Katawan, tan atawayan ko tan akabatan ko so kaabigan nen Jesus.

16 Tan nampeleñgan ko so mampulong ed saya a totoo, balet akopit so sañgik, tan siak so asebelan a mampulong ed sikara; tan nia ginagala ra so onalsa sumpa ed Dios da; tan saray inararo a disipulos so niarawi ed paway na dalin, makaseñgeg ed karelmeñgan da.

17 Balet tinmilak ak ed limog da, balet asebelan ak a mampulong ed sikara, lapu ed inkaawet na saray puso ra; tan lapu ed awet na saray puso ra say dalin so naayew makaseñgeg ed sikara.

18 Tan saraya so matatakew a Gadianton, a sikara so wala ed limog na saray Lamanite, tinayakan da so dalin, dia ed onia saray manaayam diman ginapoan da ya iamot so saray kayamanan da ed dalem na dalin; tan saraya so nanmaliw ya andanglel, lapu ed say Katawan inayew to so dalin, kanian ag da la nabembenan, odino napukpokan so saraya lamet.

19 Tan agawa a wala so saray panag-anito, tan silib na manananem, tan majik; tan say pakapanyari na mauges so tinmayak ed amin a tapew na dalin, angan ed say impakasumpal na amin a salita nen Abinadi, tan ontan met nen Samuel a Lamanite.