1 Nia siak, Moroni, isumpal ko so saray kasulatan nen amak, a si Mormon. Nia, wala so pigara labat a beñgatla ya isulat ko, a saraya a beñgatla so ingangan nen amak.

2 Tan natan agawa a kayari na saman so baleg tan makapataktakot a laban ed Cumorah, nia, saraman so Nephite ya akabatik ed saray bansa a mamaabalaten, sikara so inanopan na saray Lamanite anga ed sikara ya amin so aderal.

3 Tan si amak so pinatey da met, tan siak labat so nakdaan a mañgisulat ed makapaermen ya agawa ya inkaderal na saray totook. Balet nia, sikara so angapo la, tan sumpalen ko so gangan nen amak. Tan no siak so pateyen da, saya so ag ko amta.

4 Dia ed ontan siak so mansulat tan iamot ko so saray kasulatan ed dalem na dalin; tan no iner so laen ko ag la makana ed siak.

5 Nia, si amak ginawa to so saya a kasulatan, tan insulat to a wala so gagala to nia. Tan nia, saya so isulat ko met no wala ni pasen ed saray piligo, balet angapo la; tan angapo met so minak, lapu ed bokbukor ko. Si amak so apatey ed laban, tan amin a kakanayon ko, tan angapo so kakaarok odino pasen a nayari a laen ko; tan no panon karokey a say Katawan abuloyan to ak ni a mambilay saya so ag ko amta.

6 Nia, apat a lasus taon so linmabas nanlapu la ed insabi na Katawan tan Manañgilaban tayo.

7 Tan nia, saray Lamanite inanopan da so saray totook, saray Nephite, manlapu ed sakey a ciudad ya anga ed sananey tan manlapu ed sakey a pasen ya anga ed sananey, ya anga ed sikara so naupot; tan agay la so inkapaktak da; on, baleg tan makapakelkelaw so inkaderal na saray totook, a Nephite.

8 Tan nia, say lima na Katawan so nangawa ed saya. Tan nia met, saray Lamanite sikara so mambabakal ed sakey tan sakey; tan say amin a tapew na dalin so andi-tonda a pateyan tan panagpaterter na dala; tan angapo so angan sakey a makapikabat ed itonda na bakal.

9 Tan natan, nia, angapo la so nikuan ko nipaakar ed sikara, tan angapo la likud lambeñgat ed saray Lamanite tan saray matatakew so nakdaan ed tapew na dalin.

10 Tan angapo so angan sakey a makapikabat ed tua a Dios likud ed saray disipulos nen Jesus, a sikara so atilak ed dalin ya anga ed say karelmeñgan na saray totoo ontan la a kinabaleg kanian say Katawan ag to la nitepel a sikara so miayam ed saray totoo; tan no sikara so wala ni ed tapew na dalin angapo so too a makapikabat.

11 Balet nia, si amak tan siak anengneng mi ra, tan sikara so nampulong ed sikami.

12 Tan siopaman a makaawat ed saya a kasulatan, tan saya so ag to balawen makaseñgeg ed saray ag-inkagnap a wala ed saya, sikato met lamlamang so nawalaan na babaleg a pikakabat ed beñgatla nen say saraya. Nia, siak si Moroni; tan no nayari, gawaen ko ya amin a beñgatla pian nakabatan yo.

13 Nia, sampotan ko la so pansalitak nipaakar ed saya a totoo. Siak so anak nen Mormon, tan si amak so kailalakan nen Nephi.

14 Tan siak a dili lamlamang so añgiamot ed saya a kasulatan onkana ed Katawan; saray piligo angapo la so bili to, lapu ed gangan na Katawan. Tan peteg ya inkuan to ya angapo so siopaman a makaala pian sikato so makagungona; balet saray kasulatan baleg so bili ra; tan siopaman so mañgipaway ed saraya ed liwawa, sikato so bendicionan na Katawan.

15 Tan angapo so nawalaan na pakapanyari a mañgipaway ed saya ed liwawa likud no saya so initer ed sikato na Dios; tan linawa na Dios a saya so nagawa ya igena labat ed gloria to, odino dia ed kaabigan na saray kadaanan tan abayag la a nitayak a totoo ya akipaknaan na Katawan.

16 Tan mapalar so saman so mañgipaway ed saya ed liwawa; tan saya so naawit ya ompaway manlapu ed biluñget ya onla ed liwawa, unong ed salita na Dios; on, saya so nipaway manlapu ed dalin, tan saya so onsinag ya ompaway manlapu ed biluñget, tan saya so onsabi ed pikakabat na saray totoo; tan saya so nagawa ed pakapanyari na Dios.

17 Tan no wala so saray liñgo saya so liñgo na too. Balet nia, angapo so amta mi a liñgo; angaman ontan say Dios kabat to so amin a beñgatla; dia ed ontan, siopaman a mambalaw, manalwar ag la piga sikato so wala ed kaatapan na apoy ed infierno.

18 Tan siopaman so mankuan: Ipanengneng yo ed siak, odino sikayo so nabakbak—manalwar ag la piga nigangan to so saman so insebel na Katawan.

19 Tan nia, saman lamlamang so masiglat a mañgokom sikato so masiglat a naokom met; lapu ed unong ed saray kimey to saya so pañgawatan to na upa to; dia ed ontan, siopaman so mamakbak sikato met so bakbaken, na Katawan.

20 Nia so inkuan na masanto a kasulatan—say too ag to mamakbak, ni say sikato so mañgokom; lapu ed say panañgokom kayarian ko, inkuan na Katawan, tan say kababales siak so makankayarian met, tan siak so manpabayar.

21 Tan siopaman so mañgibesñgaw na sanok tan busol sumpa ed kimey na Katawan, tan sumpa ed saray totoo ya akipaknaan na Katawan a sikara so wala ed kailalakan na Israel, tan ikuan to: Deralen tayo so kimey na Katawan, tan say Katawan ag to la nunoten so paknaan a ginawa to ed kailalakan na Israel—saya met lamlamang so wala ed kaatapan a nabatang tan ibuntok ed apoy;

22 Lapu ed saray andi-angaan a gagala na Katawan so mampatuloy, anga ed amin a sipan to so nasumpal.

23 Anap yo so saray profesiya nen Isaias. Nia, saraya so ag ko la isulat. On, nia ikuan ko ed sikayo, a saraman so sasantos a linma la ya akaona nen say siak, a sikara so nankayarian ed saya a dalin, sikara so onkelyaw, on, angan manlapu ed sapok sikara so onkelyaw ed Katawan; tan unong a say Katawan so mabilay nunoten to so paknaan a ginawa to ed sikara.

24 Tan amta to so saray pikakasi ra, a saraya so makaseñgeg ed saray kaagian da. Tan amta to so pananisia ra, tan dia ed ñgaran to nayarian da ya iyalis so saray palandey; tan dia ed ñgaran to nayarian da a payegyegen so dalin; tan dia ed pakapanyari na salita to agawa ra a nigeba ed dalin so saray pañgawan; on, angan say manliob a pugon ag to ra nayari a sakitan, ni saray atap a monanakap odino madita ya oleg, lapu ed pakapanyari na salita to.

25 Tan nia, saray pikakasi ra so onkana met ed saman so ingena na Katawan a mañgipaway ed saraya a beñgatla.

26 Tan angapo so siopaman a mankuan a saraya so ag onsabi, tan petepeteg a saraya so nagawa, lapu ed say Katawan so nansalita ed saraya; tan manlapu ed dalin saraya so onsabi, ed panamegley na lima na Katawan, tan angapo so makasamper ed saya; tan saya so onsabi ed sakey ya agew sano ikuan da ya angapo la so saray milagro; tan saya so onsabi ya angan siñga sakey so mansasalita a nanlapu ed saray inaatey.

27 Tan saya so onsabi sano saray dala na saray sasantos so onakis ed Katawan, makaseñgeg ed saray maamot a pannununoñgan tan kimey na kabiluñgetan.

28 On, saya so onsabi ed sakey ya agew sano say pakapanyari na Dios so niburi, tan saray simbaan so manmaliw a marutak tan nipaatagey ed kinon na saray puso ra; on, angan dia ed sakey ya agew sano saray pañgulo na saray simbaan tan saray managbañgat so ontalindeg ed kinon na saray puso ra, angan dia ed panibeg da ed saray miembro na simbaan da.

29 On, saya so onsabi ed sakey ya agew sano nareñgelan so saray pool, tan mabiskeg a dagem, tan kelpa na asewek ed saray ag-kabat a dalin;

30 Tan wala met so nareñgelan a saray bakal, dalamurom na bakal, tan yegyeg ed nanduroma a pasen.

31 On, saya so onsabi ed sakey ya agew sano wala so baleg a karotakan ed amin a tapew na dalin; wala so saray pateyan, tan takewan, tan tilaan, tan palikdoan, tan inkabalangkantis, tan amin a nengneng na karumsisan; sano dakel la so mañgikuan: Gawam so saya, odino gawam so saman, tan angapo so kakanaan to, lapu ed say Katawan iabuloy to so saray onia ed sampot ya agew. Balet abagey la so siñga saraya, lapu ed sikara so wala ed sankapaitan a kipapasen tan ed inkasiñger ed kasalanan.

32 On, saya so onsabi ed sakey ya agew sano wala so saray simbaan a nipatalindeg a mankuan: Ondago kayo dia, tan lapu ed saray kuarta yo napirdona so saray kasalanan yo.

33 O sikayo a marelmeng tan masekder a teñger a totoo, akin kasi añgipaalagey kayo na saray simbaan pian sikayo so makagamor na gungona? Akin kasi pinikewet yo so masanto a salita na Dios, pian awiten yo so kadodusa ed saray kamarerua yo? Nia, onnengneng kayo ed saray puyan na Dios; tan nia, onsabi so panaon ed saman ya agew sano saraya a beñgatla so andi-saew a nasumpal.

34 Nia, say Katawan impanengneng to ed siak so saray makana tan makapakelaw a beñgatla nipaakar ed saman so nakaukolan ya onsabi ed ag mabayag, ed saman ya agew sano saraya a beñgatla so onsabi ed limog yo.

35 Nia, siak so misalita ed sikayo a siñga wala kayo dia, tan angaman angapo kayo dia. Balet nia, si Jesu Cristo impanengneng to kayo ed siak, tan kabat ko so saray kimey yo.

36 Tan kabat ko a sikayo so mankokurang ed kinon na saray puso yo; tan angapo likud labat ed pigara ya ag da impaatagey so inkasikara ed kinon na saray puso ra, lapu ed panagsulong na saray mararakep a kawes, onkana ed ibegan, tan busolan, tan panagluko, tan panamasegsegang, tan amin a nengneng na panagkasalanan; tan saray simbaan yo, on, angan balang sakey, so nanmaliw a marutak makaseñgeg ed kinon na saray puso yo.

37 Tan nia, inararo yo so kuarta, tan saray kakanen yo, tan saray mararakep a kawes yo, tan say panagparakep na saray simbaan yo, a nagkalalo ni nen say panañgaro yo ed saray duka tan mankakaukolan, saray mansasakit tan saray wala ed irap.

38 O sikayo a managdutak, sikayo a mansimpisimpitan, sikayo a managbañgat, ya ilalako yo so inkasikayo ed saman so naderal, akin kasi dinutakan yo so masanto a simbaan na Dios? Akin kasi ambaing yo ya akoen ed inkasikayo so ñgaran nen Cristo? Akin kasi ag yo nunoten a babaleg ni so bili na andi-angaan a liket nen say kasegsegañgan a kapiganman ag ompatey—lapu ed dayew na mundo?

39 Akin kasi pararakepen yo so inkasikayo ed saraman so angapo so bilay to, tan iñgen itepel yo so saray nanaerasan, tan saray mankaukolan, tan saray alakseban, tan saray mansasakit tan saray wala ed irap ya onlabas ed sikayo, tan ag yo ra imanoen?

40 On, akin kasi ipaalagey yo so maamot a karumsisan pian makagamor kayo na gungona, tan paulyan yo a saray balo sikara so manermen ed arap na Katawan, tan ontan met ed saray ulila ya onermen ed arap na Katawan, tan ontan met ed dala na kaamaan da tan saray asawa ra a lalaki a sikara so onakis ed Katawan manlapu ed dalin, onkana ed kababales ed saray ulo yo?

41 Nia, say espada na kababales so akasabit ed petek yo; tan say panaon asinger la ya onsabi pian ibales to so dala na saray sasantos ed sikayo, lapu ed ag to la nitepel so saray nañgis da.