1 Tan natan agawa a dia ed komatlo a lasus tan anemaplo tan talo a taon saray Nephite so linma a pinmegdat a kaolop da so saray ñgayew da a milaban sumpa ed saray Lamanite, diman ed paway na dalin na Apalis.

2 Tan agawa a saray ñgayew na Nephite so asunson ira lamet a papawil ed dalin na Apalis. Tan legan ni a sikara so mabanal, sakey a balo a sabi a ñgayew na saray Lamanite so dinmugpa ed sikara; tan sikara so awalaan na makapaermen a bakal, dia ed onia saray Lamanite kinayarian da so ciudad na Apalis, tan pinatey da so dakel ed saray Nephite, tan sikara so akaala na dakel ya adakep.

3 Tan saray nakdaan so binmatik tan tinmipon ira ed saray manaayam ed ciudad na Teancum. Natan say ciudad na Teancum so wala ed ketegan a gilig na dayat; tan saya met so asinger ed ciudad na Apalis.

4 Tan say makaseñgeg saray ñgayew na Nephite sikara so linma ed saray Lamanite kanian ginmapo a sikara so nabakbak; tan no aliwa a lapu ed saman, saray Lamanite angapo komon so pakapanyari ra ed sikara.

5 Balet, nia, say panañgokom na Dios aboten to a labsanan so saray marelmeng; tan lapu ed saray marelmeng kanian saray marelmeng so nadusa; lapu ed saray marelmeng so mamapagalaw ed puso na saray anak na totoo onkana ed pamaterter na dala.

6 Tan agawa a saray Lamanite nangawa ra na paraan ya onla sumpa ed ciudad na Teancum.

7 Tan agawa a dia ed komatlo a lasus tan anemaplo tan apat a taon saray Lamanite so linma sumpa ed ciudad na Teancum, pian nakayarian da met so ciudad na Teancum.

8 Tan agawa a sikara so apasener tan asunson na saray Nephite. Tan sanen saray Nephite anengneng da ya asunson da so saray Lamanite sikara lamet so nampasirayew ed dili a biskeg da; tan sikara so linma ed pakapanyari ra a dili, tan kinayarian da lamet so ciudad na Apalis.

9 Tan natan saraya ya amin a beñgatla so agawa, tan nilibo so saray inaatey a nantupag ed saray Nephite tan saray Lamanite.

10 Tan agawa a say komatlo a lasus tan anemaplo tan anem a taon so linmabas, tan saray Lamanite so linma lamet a milaban ed saray Nephite; tan iñgen saray Nephite so ag ni ra nambabawi ed saray mauges a ginagawa ra, balet sikara ni so nampatuloy ed karelmeñgan da ya andi-tonda.

11 Tan ag nayarian na dila ya ipaliwawa, odino nayarian ya isulat na too so nagnap a pañgipaliwawa ed makapataktakot a kanengneñgan na dala tan dakel a panagpatey a wala ed limog na saray totoo, mandapag ed saray Nephite tan saray Lamanite; tan say balang sakey a puso so inmawet, kanian nanliketan da so mampaterter na dala ya andi-tonda.

12 Tan angapo ni nen saman so ontan la a kinabaleg na karelmeñgan ed limog na amin ya anak nen Lehi, ni angan dia ed limog na amin ya kailalakan na Israel, unong ed salita na Katawan, a siñga dia ed limog na saya a totoo.

13 Tan agawa a saray Lamanite naala ra a kinayarian so ciudad na Apalis, a saya lapu ed say bilang da so pinalabsanan to so bilang na saray Nephite.

14 Tan sikara met so nankurang ya amaarap sumpa ed ciudad na Teancum, tan sinunson da a pinapaway so saray manaayam diman, tan inala ra so dakel ya adakep mandapag a bibii tan ugogaw, tan sikara so ginawa ra a bagat ed saray dios da a talintao.

15 Tan agawa a dia ed komatlo a lasus tan anemaplo tan pito a taon, saray Nephite lapu ed pasnok da ed saray Lamanite ed impañgibagat da so saray bibii tan anak da, sikara so linma sumpa ed saray Lamanite ya awalaan na mapalalo a baleg a pasnok, dia ed onia tinalo da lamet so saray Lamanite, tan asunson da ra a pinapaway ed saray dalin da.

16 Tan saray Lamanite so ag la ra linma lamet sumpa ed saray Nephite anga ed komatlo a lasus tan pitumplo tan lima a taon.

17 Tan dia ed saya a taon sikara so linma sumpa ed saray Nephite ed amin a pakayari ra; tan ag la ra nabilang lapu ed kinarakel na bilang da.

18 Tan nanlapu la ed saya a panaon saray Nephite ag la ra tinmaluna ed saray Lamanite, balet ginapoan da ra a panisen a siñga say linaew ed sinag na agew.

19 Tan agawa a saray Lamanite so linma ed ciudad na Apalis; tan diman wala so makapaermen a bakal ya agawa ed dalin na Apalis, a dia ed saya tinalo ra so saray Nephite.

20 Tan sikara lamet so tinmaynan ed arapan da, tan sikara so linma ed ciudad na Boaz; tan diman sikara so tinmalindeg sumpa ed saray Lamanite dia ed mapalalo a talek, a dia ed onia sikara so ag tinalo na saray Lamanite ya anga ed sanen sikara so linma lamet ed komadua a panaon.

21 Tan sanen sikara so linma ed komadua a panaon, saray Nephite so asunson tan pinapatey da ed mapalalo a karakel a panagpatey; saray bibii tan ugogaw da so imbagat da lamet ed saray talintao ra.

22 Tan agawa a saray Nephite so binmatik lamet a nanlapu ed arapan da, ya inawit da ya amin so saray manaayam diman, mandapag ed saray baley tan saray bario.

23 Tan natan siak, Mormon, dia ed impakanengneng ko a saray Lamanite ñgalñgali da la naala so saman a dalin, dia ed ontan siak so linma ed pukdol na Shim, tan inalak ya amin so kasulatan ya iniamot nen Ammaron nipaakar ed Katawan.