1 Tan agawa a saray Lamanite so ag pinmegdat a milaban lamet anga ed inlabas ni na samplora a taon. Tan nia, impankimey ko so saray totook, saray Nephite, ed pañgiparaan da ed saray dalin da tan saray ayura ra sumpa ed panaon na laban.

2 Tan agawa a say Katawan inkuan to ed siak: Ipulong mo ed saya a totoo—Mambabawi kayo, tan ondago kayo ed siak, tan mampabiniag kayo, tan ipaalagey yo lamet so simbaan ko, tan sikayo so naligyas.

3 Tan siak so nampulong ed saya a totoo, balet saya so andi-kana; tan ag da atalusan a say Katawan so añgiligyas ed sikara, tan añgiter ed sikara na pankanawnawa na pambabawi. Tan nia pinaawet da so saray puso ra sumpa ed Katawan a Dios da.

4 Tan agawa a dia ed kayari na saya a komasamplo a taon so linmabas, agawa, a say bilang so talora a lasus tan anemaplo a taon nanlapu ed insabi nen Cristo, say ari na saray Lamanite añgipawit na sakey a sulat ed siak, ya añgiter ed siak na pakabat a sikara so mampaparaan ya onla lamet a milaban sumpa ed sikami.

5 Tan agawa ya ingangan ko ed saray totook a mantitipon ira ed dalin na Apalis, dia ed sakey a ciudad a wala ed ketegan, diman ed makisir a basbas ya onarap ed saray dalin a mamaabalaten.

6 Tan diman so añgipasenan mi ed saray ñgayew mi, pian napatonda mi so saray ñgayew na Lamanite, pian angapo so nakayarian da ed saray dalin mi; dia ed onia sinalimbeñgan mi sumpa ed sikara ed amin na ñgayew mi.

7 Tan agawa a dia ed komatlo a lasus tan anemaplo tan sakey a taon saray Lamanite so linmeksab ed ciudad na Apalis a milaban sumpa ed sikami; tan agawa ed saman a taon sikara so tinalo mi, dia ed onia sikara lamet so amawil ed saray dili a dalin da.

8 Tan dia ed komatlo a lasus tan anemaplo tan dua a taon sikara lamet so linmeksab a milaban ed sikami. Tan sikara so tinalo mi lamet, tan dakel ed sikara so apatey mi, tan saray inaatey da so imbantak ed dayat.

9 Tan natan, lapu ed saya a baleg a beñgatla a saray totook, saray Nephite, a ginawa ra, ginapoan da so mampasirayew ed dili a biskeg da, tan ginapoan da so mansamba ed arap na tawen ya ombales ira lapu ed dala na saray kaagian da a pinatey na saray kabusol da.

10 Tan insamba ra ed saray tawen, tan ontan met ed trono na Dios, a sikara so ompegdat a milaban ed saray kabusol da, tan sikara so batañgen da ed tapew na dalin.

11 Tan agawa a siak, Mormon, so sigpot la ya ag ko inawat manlapu ed saya a panaon so panmaliw ko a manunaan tan sakey a pañgulo na saya a totoo, lapu ed karelmeñgan tan karumsisan da.

12 Nia, siak so añgipañgulo ed sikara, manwari ya ontan so karelmeñgan da sikara so impañgulok la ya amin piga-piga ed laban, tan sikara so inanarok, unong ed aro na Dios a wala ed siak, ed amin a pusok; tan say kamareruak initer ko ed pikakasi ed Dios ko ed dukey na sanagew lapu ed sikara; manwari ya ontan, saya so angapo so pananisia, lapu ed awet na saray puso ra.

13 Tan amitlo la a sikara so inlaban ko ed lima na saray kabusol da, tan sikara so ag nambabawi ed saray kasalanan da.

14 Tan sanen sikara so nansamba ed amin ya insebel ed sikara na Katawan tayo tan Manañgilaban a Jesu Cristo, sikara so onla ed saray kabusol da pian milaban ira, tan ibales da ed inkasikara so dala na saray kaagian, nia say voces na Katawan so sinmabi ed siak, a nankuan:

15 Say kababales kayarian ko, tan siak so nanpabayar; tan lapu ed saya a totoo so ag nambabawi kayari na impañgilaban ko ed sikara, nia, sikara so nataksing ed tapew na dalin.

16 Tan agawa a sigpot ya ag ak inmabuloy ya onla sumpa ed saray kabusol ko; tan ginawak so unong ed saray ingangan ed siak na Katawan; tan siak so tinmalindeg ya ag ginmalaw a tasi pian ipanengneng ko ed mundo so saray beñgatla ya anengneng tan nadñgel ko, unong ed impanengneng na Espiritu a sikato so nampaneknek ed saray beñgatla ya onsabi.

17 Dia ed ontan mansulat ak ed sikayo, a Gentiles, tan ontan met ed sika, kailalakan na Israel, sano ongapo la so kimey, a sika so ñgalñgali la akaparaan ya ompawil ed dalin a tawir mo;

18 On, nia, mansulat ak ed amin a sampot na dalin; on, dia ed sikayo, labindua a tribo na Israel, a sikayo so naokom unong ed saray kimey yo ed panamegley na saray labindua a pinili nen Jesus a nanmaliw a disipulos to ed dalin na Jerusalem.

19 Tan mansulat ak met ed saray nakdaan ed saya a totoo, a sikara so okomen na saray labindua a pinili nen Jesus ed saya a dalin; tan sikara so okomen na saraman so arum a labindua a pinili nen Jesus dia ed dalin na Jerusalem.

20 Tan saraya a beñgatla so impanengneng na Espiritu ed siak; dia ed ontan isulat ko ed sikayo ya amin. Tan lapu ed saya a pamaakaran isulat ko ed sikayo, pian nakabatan yo a sikayo ya amin so ontalindeg ed arap na panañgokoman nen Cristo, on, balang sakey a kamarerua a kabiañgan na amin a totoo ed boleg nen Adan; tan sikayo so nakaukolan ya ontalindeg pian sikayo so naokom ed saray kimey yo, balang la no saraya so maong odino mauges;

21 Tan ontan met pian manisia kayo komon ed evangelio nen Jesu Cristo, a saya so wala ed limog yo; tan ontan met na saray Judio, a sikara so totoo a paknaan na Katawan, pian nawalaan ira na sakey ni a tasi likud ed saman so anengneng da tan nadñgel da, a si Jesus, sikato so pinatey da, sikato so peteg a si Cristo tan peteg a Dios.

22 Tan pilalek ko a nakuyong takayo ya amin ed sampot na dalin a mambabawi tan mamparaan ya onalagey ed yuroñgan a panañgokoman nen Cristo.