1 Tan natan, mansalita ak met onkana ed saraman so ag manisia ed si Cristo.

2 Nia, manisia kayo kasi ed agew na dalaw yo—nia, sano say Katawan so onsabi, on, angan saman so baleg ya agew sano say dalin so nalukot siñga sakey ya alokot a papil, tan saray elemento ed mundo so natunaw lapu ed ontan la a petang, on, dia ed saman a baleg ya agew sano sikayo so naawit ya ontalindeg ed arap na Cordero na Dios—dia ed saman nayarian yo kasi ni ya ibaga ya angapo so Dios?

3 Dia ed saman nayarian yo ni kasi ya ibeneg si Cristo, odino nayarian yo so onnengneng ed Cordero na Dios? Nayarian yo kasi ya ipasen a makapiayam kayo ed sikato a walaan na pikakabat ed saray kasalanan yo? Ipasen yo kasi a nayarian yo so maliket a miayam ed saman a masanto a Manamalsa, sano saray kamarerua yo so nasisigen-sigen na pikakabat ed saray kasalanan yo ya andi-tonda a kinabusol so saray gangan to?

4 Nia, ikuan ko ed sikayo a lalo a masegsegang so piayam yo ed sakey a masanto tan maptek a Dios, ed silong na pikakabat ed saray karotakan yo ed arap to, nen say piayam yo a kaiba so saray naayew a kamarerua ed infierno.

5 Tan nia, sano sikayo so naawit a makanengneng ed inkalakseb yo ed arap na Dios, tan ontan met ed gloria na Dios, tan say inkasanto nen Jesu Cristo, saya so manelsel na dalang ya ag nasebseban ya apoy ed sikayo.

6 O sirin sikayo ya ag-manisia, pawil kayo ed Katawan; akis kayo na maksil ed Ama ed ñgaran nen Jesus, ag la piga sikayo so nayari a narumog ya andi-mansa, dalisay, malimgas, tan amputi, lapu ed inkalinis yo ed dala na Cordero, dia ed saman a makabaliksan tan sampot ya agew.

7 Tan lamet mansalita ak ed sikayo a mañgiburi ed saray puyan na Dios, tan ikuan yo a saraya so linmabas la, ya angapo la so saray puyan, ni saray profesiya, ni saray palabo, ni say panagtambal, ni say panagsalita na saray salita, tan say panañgipatalus ed saray salita;

8 Nia ikuan ko ed sikayo, saman so mañgiburi ed saraya a beñgatla ag to amta so evangelio nen Cristo; on, ag to abasa so saray masanto a kasulatan; no bilang, saraya so ag to atalusan.

9 Ag yo kasi abasa a say Dios sikato lamlamang nen karoman, natan, tan ed ando la ya ando, tan dia ed sikato angapo so panmalismalis ni say anino na pañgoman-oman?

10 Tan natan, no nonunoten yo ed inkasikayo so sakey a dios a manmalismalis, tan dia ed sikato wala so anino na pañgoman-oman, dia ed ontan say nonunoten yo ed inkasikayo a dili so sakey a dios ya aliwa a Dios na saray milagro.

11 Balet nia, ipanengneng ko ed sikayo so sakey a Dios na saray milagro, angan say Dios nen Abraham, tan say Dios nen Isaac, tan say Dios nen Jacob; tan sikato met lamlamang so saman a Dios ya amalsa ed saray tawen tan say dalin, tan amin a beñgatla a wala diman.

12 Nia, sikato so amalsa ed si Adan, tan dia ed si Adan sinmabi so inkigapol na too. Tan makaseñgeg ed inkigapol na too sinmabi si Jesu Cristo, angan say Ama tan say Anak; tan lapu ed si Jesu Cristo sinmabi so inkadundon na too.

13 Tan lapu ed inkadundon na too, a sinmabi lapu ed si Jesu Cristo, sikara so naawit a nipawil ed arapan na Katawan; on, saya so makaseñgeg kanian amin a totoo so adundon, lapu ed say impatey nen Cristo inawit to so kioli ed bilay, a saya so añgawit na pakadundon manlapu ed andi-angaan ya ugip, manlapu ed saya ya ugip amin a totoo so ombañgon ed panamegley na pakapanyari na Dios sano ontanul so trompita; tan sikara so ondago, mandapag a melag tan baleg, tan amin so ontalindeg ed okoman to, lapu ed sikara so adundon tan naukbaran manlapu ed andi-angaan a siñger na patey, a saya a patey sikato so patey na laman.

14 Tan dia ed saman onsabi so panañgokom na Masanto a Bugtong ed sikara; tan dia ed saman onsabi so panaon a saraman so marutak sikara ni so siansia a marutak; tan saraman so matunong sikara ni a siansia so matunong; saraman so maliket sikara ni a siansia so maliket; tan saraman so ag-maliket sikara ni a siansia so ag-maliket.

15 Tan natan, O sikayo a mannonunot ni ed inkasikayo na sakey a dios ya ag to makagawa na saray milagro, ontepet ak ed sikayo, saraya ya amin a beñgatla kasi so linmabas la, a saraya so sinalitak? Say kasampotan kasi so sinmabi la? Nia ikuan ko ed sikayo, Andi; tan say Dios ag ni tinmonda a Dios na saray milagro.

16 Nia, ag kasi saray beñgatla a ginawa na Dios so makapakelaw ed saray mata tayo? On, tan siopa so makatalus ed saray makapakelaw a kimey na Dios?

17 Siopa so mañgikuan ya aliwa a milagro a dia ed salita to wala so tawen tan dalin; tan dia ed pakapanyari na salita to apalsa to so too a nanlapu ed sapok na dalin; tan lapu ed pakapanyari na salita to agawa so saray milagro?

18 Tan siopa so mañgikuan a si Jesu Cristo ag to ginawa so dakel a makapakelaw a milagro? Tan wala so dakel a makapakelaw a milagro a ginawa na lima na saray apostoles.

19 Tan no wala so saray milagro ya agawa, akin say Dios so tinmonda la a sakey a Dios na milagro tan iñgen sikato ni a siansia so sakey ya ag lawas mañguuman a Manamalsa. Tan nia, ikuan ko ed sikayo sikato so ag mañguuman; no ontan sikato la so ontonda a Dios; tan sikato so ag-tinmonda a Dios tan sikato so Dios na saray milagro.

20 Tan say makaseñgeg no akin sikato so tinmonda a mangawa na saray milagro ed limog na saray anak na totoo so lapu ed sikara so linmasay ed ag pananisia, tan tinmaynan ira ed matua a dalan, tan ag da kabat so Dios a sikato so nepeg a panmatalekan da.

21 Nia, ikuan ko ed sikayo a siopaman a manisia ed si Cristo, ya ag manduarua, antokaman a kerewen to ed Ama ed ñgaran nen Cristo saya so niiter ed sikato; tan saya a sipan so onkana ed amin, anga ed kasampotan na dalin.

22 Tan nia, onia so inkuan nen Jesu Cristo, say anak na Dios, ed saray disipulos to a sikara so tinmilak, on, tan ontan met ed amin da na saray disipulos to, a narereñgel na saray karaklan: Onla kayo ed amin a sankamundoan, tan ipulong yo so evangelio ed amin a pinalsa;

23 Tan saman so manisia tan nabiniagan sikato so nilaban, balet saman so ag manisia sikato so naayew;

24 Tan saraya a pakapatnagan so ontumbok ed saray manisia—dia ed ñgaran ko papawayen da so saray demonyo; mansalita ra na balo a salita; nabembenan da so saray oleg; tan no makainum ira na beñgatla a samal sikara so ag nasakitan na saya; itapew da so saray lima da ed saray mansasakit tan saraya so onabig;

25 Tan siopaman a manisia ed ñgaran ko, ya ag manduarua, dia ed sikato paeletan ko so amin a salitak, angan dia ed sampot na dalin.

26 Tan natan, nia, siopa so makatalindeg sumpa ed saray kimey na Katawan? Siopa so mañgiburi ed saray imbaga to? Siopa so onalsa sumpa ed pakapanyari na biskeg na Katawan? Siopa so mambalaw ed saray kimey na Katawan? Siopa so mambalaw ed saray anak nen Cristo? Nia, sikayo a managbalaw ed saray kimey na Katawan, sikayo so onkelaw tan nabalang.

27 O sirin ag kayo mambabalaw, tan ag kayo met ontataynan, balet deñgel yo so saray salita na Katawan, tan kerew yo ed Ama ed ñgaran nen Jesus so saray antokaman a beñgatla a nakaukolan yo. Ag kayo manduarua, balet manisia kayo, tan ongapo kayo a siñga panaon na kadaanan, tan ondago kayo ed Katawan ed amin a puso yo, tan kimeyan yo so kilalaban yo a dili a tekep na takot tan giwgiw ed arap to.

28 Manmaliw kayo a makabat ed saray agew na panagsubok yo; lukpos yo ed inkasikayo so amin ya inkarutak; ag kayo onkekerew, pian saya so upoten yo ed kaalakan na laman yo, balet kerew kayo ed sitatalek ya ag-nagiing, pian ag kayo ontolok ed tukso, balet manlingkor kayo ed matua tan mabilay a Dios.

29 Asikaso yo a sikayo so ag abiniagan ya ag-manepeg; asikaso yo ya ag kayo mañgan ed sacramento nen Cristo ya ag-manepeg; balet asikaso yo a gawaen yo so amin a beñgatla ed manepeg tan saya so gawaen yo ed ñgaran nen Jesu Cristo, say anak na Dios a mabilay; tan no saya so gawaen yo, tan mansiansia kayo ya anga ed sampot, kapiganman sikayo so ag nibantak ed paway.

30 Nia, siak so misalita ed sikayo a siñga siak so mansasalita a manlapu ed saray inaatey; lapu ed kabat ko a niiter ed sikayo so saray salitak.

31 Ag yo ak babalawen lapu ed ag ko inkagnap, ni say si amak, lapu ed ag to met inkagnap, ni saray nansulat ya unaan ni nen say sikato; balet iter yo so pisasalamat ed Dios imparungtal to ed sikayo so saray ag mi inkagnap, pian manmaliw kayo a lalo a makabat nen say sikami.

32 Tan natan, nia, insulat mi so saraya a kasulatan unong ed kakabatan mi, ed saray letra a tatawagen ed limog mi a pinasimbalo ya Egipto, a nipalima tan inuman mi; unong ed kanengneñgan na panagsalita mi.

33 Tan no komon saray piligo so magenap ed kabaleg na saraya so insulat mi ed Hebreo; balet say salita a Hebreo so inuman mi met; tan no komon dia ed salita a Hebreo so impañgisulat mi, nia, angapo komon so saray ag inkagnap ed saray kasulatan mi.

34 Balet say Katawan amta to so saray beñgatla ya insulat mi, tan ontan met angapo so arum a totoo so makapikabat ed salita mi; tan lapu ed angapo so arum a totoo a makapikabat ed salita mi, dia ed onia sikato so añgiparaan na sakey a pamaakaran a pañgipatalus ed saraya.

35 Tan saraya a beñgatla so nisulat pian napunas mi ed saray kawes mi so dala na saray kaagian mi, a sikara so linmasay ed ag-pananisia.

36 Tan nia, saraya a beñgatla a pilalek mi nipaakar ed saray kaagian mi, on, angan say kipawil da ed pikakabat ed si Cristo, saraya so unong ed pikakasi na amin a sasantos a nanayam ed saman a dalin.

37 Tan komon say Katawan a Jesu Cristo ebatan to so saray pikakasi ra unong ed pananisia ra; tan komon say Dios Ama nunoten to so paknaan a ginawa to ed kailalakan na Israel; tan komon sikara so bendicionan to ed andi-angaan, ed panamegley na pananisia ed ñgaran nen Jesu Cristo. Amen.