1 Tan agawa a siak so linma ed limog na saray Nephite, tan nambabawi ak ed saray samba a ginawak ya ag ko la ra tuloñgan; tan initer da lamet ed siak so sankaatageyan a pakapanyari ed ñgayew da, tan say pakanengneng da siak so makapañgilaban ed sikara ed saray kairapan da.

2 Balet nia, angapo so ilalok, lapu ed sikakabat ak la ed panañgokom na Katawan ya onsabi ed sikara; tan sikara so ag nambabawi ed saray kaugsan da, balet sikara so akipoligesgesan makaseñgeg ed saray bilay da ya ag ira tinmawag ed Saman so amalsa ed sikara.

3 Tan agawa a saray Lamanite so linma sumpa ed sikami legan a sikami so ombabatik a paonla ed ciudad na Jordan; balet nia, sikara so asunson ya apasener kanian ag da naala so ciudad ed saman a panaon.

4 Tan agawa a sikara so linma sumpa ed sikami lamet, tan apagnayon mi so ciudad. Tan wala ni so arum a ciudad ya apagnayon met na saray Nephite, a saray sinalimbeng to so amasakbay ed sikara kanian ag ira makaloob ed bansa a wala ed arapan mi, a deralen da so saray manaayam ed saman a dalin mi.

5 Balet agawa a dinan man a dalin so nalabsanan mi, tan saray manaayam diman so ag ni nantitipon ed loob, sikara so dineral na saray Lamanite, tan saray baley da, tan saray bario, tan saray ciudad so pinoolan da na apoy; tan onia so inlabas na komatlo a lasus tan pitumplo tan siam a taon.

6 Tan agawa a dia ed komatlo a lasus tan walomplo a taon saray Lamanite lamet so linma a milaban sumpa ed sikami, tan sikami so tinmalindeg sumpa ed sikara a sitatalek; balet saya ya amin so andi-kana, lapu ed baleg so bilang da kanian ginatin-gatinan da so saray totoo na Nephite ed sali ra.

7 Tan agawa a sikami lamet so binmatik tan saraman so say batik da maples nen saray Lamanite sikara so akapaliis, tan saraman so say batik da so matantan nen say batik na saray Lamanite sikara so apanis tan aderal.

8 Tan natan nia siak, Mormon, ag ko pilalek so mamairap ed saray kamarerua na totoo ed pañgiparungtal ko ed sikara na makapataktakot a kanengneñgan na dala tan dakel a panagpatey a siñga say naimatonan ko ed dili a matak; balet siak, dia ed pikakabat ko ed saraya a beñgatla so andi-saew a nakaukolan a nakabatan, tan amin a beñgatla ya akaamot so nepeg a naibawag manlapu ed tuktok na saray kaaboñgan—

9 Tan ontan met say pikakabat ed saraya a beñgatla so nakaukolan ya onsabi ed saray nakdaan ed saraya a totoo, tan ontan met ed saray Gentiles, a say Katawan so añgikuan a sikara so mañgibuyak ed saya a totoo, tan saya a totoo so nibilang ya andi-kana ed limog da—dia ed ontan mansulat ak na antikey, ya ag ko la labay ya isulat so nagnap a pakatungtoñgan ed saray beñgatla ya anengneng ko, lapu ed gangan a naawat ko, tan ontan met pian ag kayo la nawalaan na baleg ya ermen lapu ed karelmeñgan na saya a totoo.

10 Tan natan nia, saya so salitaen ko ed saray boleg da, tan ontan met ed saray Gentiles a wala so pililikna ra ed kailalakan na Israel, pian napatnagan da tan nakabatan no iner so nanlapuan na saray bendicion a sinmabi ed sikara.

11 Tan amtak lapu ed saraya sikara so onermen ed doknal ya agawa ed kailalakan na Israel; on, sikara so onermen ed inkaderal na saya a totoo; onermen ira lapu ed saya a totoo so ag nambabawi pian sikara komon so nilakap na taklay nen Jesus.

12 Natan saraya a beñgatla so nisulat ya onkana ed saray nakdaan ed kailalakan nen Jacob; tan saraya so nisulat ed saya a kanengneñgan, lapu ed kakabatan ed Dios a say karelmeñgan ag to awiten so saraya ed sikara; tan saraya so niamot ya onkana ed Katawan pian saraya so onsabi ed pakagnap na panaon to a dili.

13 Tan saya so gangan ya inawat ko; tan nia, saraya so onsabi unong ed gangan na Katawan, no nanengneng to so pankanepegan, unong ed kakabatan to.

14 Tan nia, saraya so onsabi ed ag-panisia ed saray Judio; tan lapu ed saya a gagala saraya so onsabi—pian sikara so nakuyong a si Jesus sikato so Cristo, say Anak na mabilay a Dios; pian say Ama awiten to, dia ed panamegley na Inararo to, so makabaliksan tan andi-angaan a gagala to, ed pañgipawil to ed saray Judio, odino say amin ya kailalakan na Israel, dia ed dalin a tawir da, a saya so initer ed sikara na Katawan a Dios da, ed pakasumpal na paknaan to;

15 Tan ontan met a say boleg na saya a totoo lalo komon a nagnap so pananisia ra ed evangelio to, a saya so onsabi ed sikara manlapu ed saray Gentiles; tan saya a totoo so nitaytayak, tan manmaliw ira a magket, sakey a marutak, tan makadimla a totoo, ya alablabas ni ya ag nayarian ya ipaliwawa na dila ed saray wala ed limog mi, on, angan saray wala ed limog na saray Lamanite, tan saya lapu ed ag da panisia tan say panaglingkor da ed saray talintao.

16 Tan nia, say Espiritu na Katawan tinmonda la ya ontotulong ed kaamaan da; tan angapo la ed sikara si Cristo tan Dios ed mundo; tan sikara so asunson a siñga taep a nipapalir na dagem.

17 Sikara nen saman so makapalikliket a totoo, tan si Cristo so managpastol da; on, sikara ni iñgen so inwanwan na Dios Ama.

18 Balet natan, nengneng yo, sikara so inwawanwan nen Satanas, a siñga taep ya ipapalir na dagem, odino siñga say baluto ya ibumbuntatok na daluyon, ya angapo so layag to odino pataga, odino angapo so beñgatla a mañgigiya ed sikato; tan no anto so kipapasen to nia, ontan met so kipapasen da.

19 Tan nia, say Katawan insinop to so bendicion ed sikara, a saya komon so naawat da ed dalin, onkana ed saray Gentiles a mankayarian ed dalin.

20 Balet nia, nagawa a sikara so sunsonen tan ibuyak na saray Gentiles; tan kayari a sikara so asunson tan nitayak na saray Gentiles, nia, dia ed ontan say Katawan nunoten to so paknaan a ginawa to ed si Abraham tan ed amin ya kailalakan na Israel.

21 Tan ontan met say Katawan nunoten to so pikakasi na saray matunong, a saraya so insegep da ed sikato onkana ed sikara.

22 Tan dia ed ontan, O sikayo a Gentiles, panon so italindeg yo ed arapan na pakapanyari na Dios, likud a sikayo so mambabawi tan ikaindan yo so saray kagagawa yo a mauges?

23 Ag yo kasi amta a wala kayo ed lima na Dios? Ag yo kasi amta a wala ed sikato so amin a pakapanyari, tan dia ed sankaatageyan a gangan to say mundo so nalukot a siñga papil?

24 Dia ed ontan, mambabawi kayo, tan mampaabeba kayo ed inkasikayo ed arap to, ag la piga sikato so onsabi a sankaawit to so kaptekan sumpa ed sikayo—ag la piga sakey a nakdaan ed boleg na Jacob so onla ed limog yo a siñga sakey a leon, tan pisay-pisayen to kayo ed ankekelag, tan angapo so makapañgilaban.