1 Tan natan asumpal ko la so kasulatan nipaakar ed inkaderal na saray totook, saray Nephite. Tan agawa a sikami so nankurang ed arap na saray Lamanite.

2 Tan siak, Mormon, nansulat ak ed ari na saray Lamanite, tan pilalek ko ed sikato ya iabuloy to ed sikami a tiponen mi so saray totoo mi ed dalin na Cumorah, dia ed sakey a pukdol a tatawagen na Cumorah, tan diman so pilabanan mi ed sikara.

3 Tan agawa a say ari na saray Lamanite iniabuloy to ed siak so beñgatla a pilalek ko.

4 Tan agawa a sikami so nankurang a linma ed dalin na Cumorah, tan impaalagey mi so saray abong-abong mi ya abel ed kaliber-liber na pukdol na Cumorah; tan diman so dalin a kawalaan na dakel a danum, ilog, tan subol; tan dia so ilalo mi ya ontaluna ed saray Lamanite.

5 Tan sanen komatlo a lasus tan walomplo tan apat a taon so linmabas, atipon mi ya amin so saray nakdaan ed totoo mi diman ed dalin na Cumorah.

6 Tan agawa a kayari mi ya atipon so amin a totoo mi ed sakey a pasen ed dalin na Cumorah, nia siak, Mormon, ginapoan ko la so onmasiken; tan lapu ed amtak a saya la so sampot a pilaban na saray totook, tan lapu ed siak so ginangan na Katawan ya ag ko papaulyanan so saray kasulatan ya iniawat da a nanlapu la ed kaamaan mi, a saraya so sagrado, so napelag ed lima na saray Lamanite (lapu ed saray Lamanite deralen da so saraya) dia ed ontan ginawak so saya a kasulatan ya inaon ko ed saray piligo nen Nephi, tan iniamot ko diman ed pukdol na Cumorah so amin a kasulatan ya inmatalek ed siak ed panamegley na lima na Katawan, likud lambeñgat ed saray pigara a piligo a saraya so initer ko ed say laki ya anak ko a Moroni.

7 Tan agawa a saray totook, kaiba ra so saray kaasawaan da tan saray anak da, natan anengneng da la so saray ñgayew na Lamanite a mankukurang a mamapaarap ed sikara; tan dia ed saman a makakebyew a takot ed patey so mamapano ed pagew na amin a makasalanan, a sikara so nanalagar ya awaten da.

8 Tan agawa a sikara so sinmabi a milaban sumpa ed sikami, tan balang sakey a kamarerua napno na kebyew lapu ed kinarakel na bilang da.

9 Tan agawa a dinugpaan da so saray totook ed panamegley na espada, tan pabekang, tan pana, tan wasay, tan amin a nengneng na agamil ed bakal.

10 Tan agawa a saray totook so inaatey, on, angan say samplora a libo a kaolop ko, tan siak so niparukol ya asugatan dia ed pegley da; tan siak so nilabsanan da ya ag da sinampotan so bilay ko.

11 Tan sanen sikara so sinmipot tan apatey da la ya amin so saray totook, likud lambeñgat ed duamplo tan apat ed sikami (sakey ed sikara so say laki ya anak ko a Moroni) tan sikami so akaligyas ed saray inatey a totoo mi, anengneng mi ed kaimbuasan, sanen saray Lamanite so amawil la ed campo ra, a nanlapu ed tuktok na pukdol na Cumorah, say samplora a libo ed saray totook so inatey, a siak so wala ed unaan ya añgipañgulo ed sikara.

12 Tan anengneng mi met so samplora a libo ya impañgulo nen anak ko a Moroni.

13 Tan nia, saray samplora a libo nen Gidgiddonah so inatey, tan sikato met so wala ed pegley da.

14 Tan si Lamah met so inatey a kaiba to saray samplora a libo to; tan si Gilgal so inatey kaiba to so saray samplora a libo to; tan inatey met si Limhah kaiba to so saray samplora a libo to; tan si Jeneum so inatey a kaiba to so saray samplora a libo to; tan si Cumenihah, tan si Moronihah, tan si Antionum, tan si Shiblom, tan si Shem, tan si Josh, sikara so inaatey kaiba ra so saray asamplora a libo na balang sakey ed sikara.

15 Tan agawa a wala ni so samplora met ya inatey ed panamegley na espada, a kaiba ra so asamplora a libo ra; on, angan amin a totook, likud lambeñgat ed saraman so duamplo tan apat a kaibak, tan ontan met ed pigara ya akaligyas a binmatik ed saray bansa ed abalaten, tan pigara ya akikasakey ed saray Lamanite, so inatey; tan say laman, tan saray pokel, tan saray dala so nitayak ed tapew na dalin, lapu ed saraya so tinaynan na saray lima a nampatey ed sikara a nabulok ed dalin, tan namekmek, tan ompawil ed nanlapuan da ya ina a dalin.

16 Tan say kamareruak so apaldua ed paniñgel, lapu ed saray apatey ed saray totook, tan siak so manakis;

17 O sikayo a malilimgas, panon so insian yo ed dalan na Katawan! O sikayo a malilimgas, panon so impañgipulisay yo ed si Jesus, a lawas lukas so saray taklay to a mañgawat ed sikayo!

18 Nia, no saya so ag yo komon ginawa, ag kayo komon inatey. Balet nia, sikayo so inatey, tan paneermenan ko so inkabalang yo.

19 O sikayo a malilimgas a lalaki tan bibii ya anak, sikayo ya ama tan ina, sikayo ya asawa a lalaki tan asawa a bibii, sikayo a malilimgas, panon a sikayo so inatey!

20 Balet nia, sikayo so naandi la, tan say ermen ko ag to kayo la napapawil.

21 Tan say agew magano la ya onsabi sano say laman yo ya ompatey isulong to so laman ya ag-ompatey, tan saraya namimigmig a laman a nabulok dia ed magano manmaliw la ya ag-nabulok a laman; tan dia ed ontan sikayo so nakaukolan ya ontalindeg ed arap na yuroñgan na panañgokoman nen Cristo, pian sikayo so naokom unong ed saray kimey yo; tan no bilang sikayo so matunong, dia ed saman sikayo so nabendicionan a kaiba na kaamaan yo a sikara so linma la ya inmuna nen say sikayo.

22 O no sikayo komon so nambabawi sakbay na saya a baleg a kadederal a sinmabi ed sikayo. Balet nia, sikayo so linma la, tan say Ama, on, say Andi-Angaan ya Ama ed tawen, kabat to so kipapasen yo; tan gawaen to ed sikayo so unong ed kaptekan tan panañgasi to.