Say Libro nen Jacob
Laki ya Agi nen Nephi

1 Tan nia, agawa a limamplo tan lima a taon so linmabas la nanlapu ed panaon a si Lehi so tinmaynan ed Jerusalem; dia ed onia, si Nephi initer to ed siak, Jacob, so sakey a gangan nipaakar ed saray ankelag a piligo, a dia ed saya saraya a beñgatla so nitatak.

2 Tan initer to ed siak, Jacob, so sakey a gangan ya isulat ko ed saraya a piligo so pigara ed saray beñgatla ya isisipen ko a makana; ya ag ak mansulat, likud no daiset labat, nipaakar ed awaran na saraya a totoo a sikara so atawag a totoo nen Nephi.

3 Lapu ed inkuan to a say awaran na saray totoo to so nepeg ya itatak ed sananey a piligo to, tan iagel ko so saraya a piligo tan saraya so iawat ed saray boleg ko, manlapu ed sakey a kailalakan ya anga ed ontumbok a kailalakan.

4 Tan sano bilang wala so saray pulong a sagrado, odino puyan a makana, odino profesiya, ya itatak ko so paulo na saraya a piligo, tan saraya so salitaen ko ed angaan a nayari, makaseñgeg ed kinen Cristo, tan onkana ed saray totook.

5 Lapu ed pananisia tan baleg a pampilalek, saya so peteg a nipatnag ed sikami so nipaakar ed saray totook, no anto so saray beñgatla a nagawgawa ed sikara.

6 Tan awalaan kami met na dakel a puyan, tan say espiritu na dakel a panagprofesiya; dia ed onia, kabat mi si Cristo tan say panarian to, a saya so onsabi.

7 Dia ed onia nankimey kami a siseseet ed limog na saray totoo mi, pian no nayari nakuyong mi ra ya ondago ed Cristo, tan minabang ira ed kaabigan na Dios, pian sikara so makaloob ed painawaan to, ag la piga no dia ed antokaman a pamaakaran isamba to ed sanok to ya ag ira makaloob, a siñga dia ed sugsog ed saray agew na pananukso sanen saray anak na Israel so wala ed kalawakan.

8 Dia ed ontan, pilalek mi ed Dios a nakuyong mi so amin a totoo ya ag onalsa sumpa ed Dios, ag la piga sikato so ag napilitan a mampasnok, balet pian amin a totoo so manisia ed kinen Cristo, tan muriaen da so impatey to, tan sakbaten da so krus to tan akoen da so kababaiñgan na mundo; dia ed ontan, siak, Jacob, inalak ed siak a dili so panumpal ko ed gangan nen agik a laki a si Nephi.

9 Natan si Nephi ginmapo la ya ontakken, tan anengneng to ya ag mabayag sikato la so ompatey; dia ed ontan, nilanaan to so sakey a too a manmaliw ya ari tan sakey a manañgoley ed saray totoo to natan, unong ed panañgoley na saray arari.

10 Saray totoo lapu ed alablabas a panañgaro ra ed si Nephi, lapu ed sikato so baleg a manañgiagel ed sikara, ya inkana to so espada nen Laban ed impañgiagel to ed sikara, tan lapu ed sikato so nankimey ed amin ya agew to ya onkana ed saray kaabigan da—

11 Dia ed ontan, saray totoo nampilalekan da a natilak a pakanodnunotan so ñgaran to. Tan no siopa so manoley ya ontumbok ed pasen to sikato so tawagen na saray totoo, a komadua a Nephi, komatlo a Nephi, tan amin a mansasaguinunor unong ed panañgoley na saray arari; tan dia ed onia sikara so tawagen na saray totoo, ya angan anto ni so sananey a ñgaran to a peteg.

12 Tan agawa a si Nephi so inatey.

13 Natan saray totoo ya aliwa a Lamanite so Nephite; manwari ya ontan, sikara so atawag a saray Nephite, Jacobite, Josephite, Zoramite, Lamanite, Lemuelite, tan Ishmaelite.

14 Balet siak, Jacob, dia ed kayari to nia ag ko la ra pambibiigan ed saraya a ñgaran, no ag tawagen ko ra a saray Lamanite so saraman so labay da a deralen so saray totoo nen Nephi, tan saray mikaaro ed si Nephi sikara so tawagen ko a saray Nephite, odino saray totoo nen Nephi, unong ed saray oley na arari.

15 Tan natan agawa a saray totoo nen Nephi, a wala ed pakaoley na komadua ya ari, ginapoan da a paaweten so saray puso ra, tan pinenek da so inkasikara ed siñga saray marelmeng a kagagawa, a siñga si David ed kadaanan a nampilalek a nawalaan na dakel ya asawa tan kamalala, tan ontan met ed si Solomon, ya anak to.

16 On, tan ginapoan da met so mananap na dakel a balitok tan pilak, tan ginapoan da so mampaatagey na linawa a siñga dia ed kinon.

17 Dia ed ontan siak, Jacob, initer ko ed sikara so saray salita dia ed impambañgat ko ed sikara ed templo, kayari ya agamoran ko ya inmuna so saya a pañgibaki na Katawan.

18 Tan siak, Jacob, tan si agik a laki a si Joseph so apasanto kami a sacerdote tan managbañgat ed saya a totoo ed panamegley na lima nen Nephi.

19 Tan sineetan mi so kimey mi ed Katawan, ya inako mi so saray susumpalen, ya eebatan mi so kasalanan na saray totoo ed tapew na dili ya olo mi no ag mi ibañgat ed sikara so saray salita na Dios ed naspot a seet; dia ed ontan, dia ed pankimey mi a siseseet saray dala ra so ag onla ed saray kawes mi; no andi say dala ra so onla ed saray kawes mi, tan ag kami narumog ya angapo so mansa ed kaunoran ya agew.