1 Tan natan siak, Nephi, ag ko nayari ya isulat so amin a beñgatla a nibañgat ed limog na saray totook; ni say siak so makapanyari ed panagsulat, a siñga ed panagsalita; tan no say sakey a too a mansalita ed tanguyor na pakapanyari na Espiritu Santo, say pakapanyari na Espiritu Santo saya so awiten to ed puso na saray anak na totoo.

2 Balet nia, wala so dakel a paaweten da so saray puso ra sumpa ed Masanto ya Espiritu, kanian saya so angapo so pasen to ed sikara; dia ed ontan, ipulisay da ya ibantak so dakel a beñgatla a nisulat tan ipasen da so saraya a siñga beñgatla ya andi-kakanaan.

3 Balet siak, Nephi, nisulat ko la so saray insulat, tan impasen ko a saya so baleg so kakanaan to tan nagkalalo ni ed saray totook. Lapu ed mampipikasi ak ya andi-tonda ya onkana ed sikara dia ed agew, tan saray matak puyoten to so dañganan ko ed labi niseñgeg ed sikara; tan siak so manakis ed Dios ko ed pananisia, tan amtak a deñgelen to so akis ko.

4 Tan kabat ko a say Katawan a Dios pasantoen to so saray pikakasik onkana ed pakagungona na saray totook. Tan saray salita ya insulat ko ed kakapuyan ko so nagawa a mabiskeg ed sikara; lapu ed kuyoñgen to ra a mangawa na maong; ipakabat to ed sikara so nipaakar ed kaamaan da; tan salitaen to ed sikara si Jesus, tan kuyoñgen to ra a manisia ed sikato, tan mansiansia ya anga ed sampot, a saya so bilay ya andi-angaan.

5 Tan saya so mansalita na ambelat sumpa ed kasalanan, unong ed inkalinew na katuaan; dia ed ontan, angapo so too a mampasnok ed saray salita ya insulat ko likud no sikato so kabiañgan na espiritu na demonyo.

6 Siak so mangloria ed inkalinew; mangloria ak ed katuaan; mangloria ak ed Jesus ko, lapu ed dinundon to so kamareruak ed infierno.

7 Siak so awalaan na panañgasi ed saray totook, tan baleg a pananisiak ed kinen Cristo ya abeten ko so dakel a kamarerua ya angapo so mansa ed yuroñgan na panañgokoman to.

8 Wala so panañgasik ed saray Judio—inkuan ko saray Judio, makaseñgeg say labay ko ya ibaga saraman so nanlapuan ko.

9 Wala met so panañgasik ed saray Gentiles. Balet nengneng yo, lapu ed angapo so panilalok ed sikara likud no mipulañgan ira ed si Cristo, tan onloob ira ed makisir a puerta tan mankurang ira ed maptek a dalan ya onarap ed bilay, tan mansiansia ra ed dalan ya anga ed kasampotan na saray agew na panagsubok.

10 Tan natan, inararok a kaagian, tan ontan met ed saray Judio, tan sikayo a wala ed sampot na dalin, deñgel yo so saraya a salita tan manisia kayo ed si Cristo; tan no ag kayo manisia ed saraya a salita manisia kayo ed si Cristo. Tan no manisia kayo ed si Cristo, manisia kayo ed saraya a salita, lapu ed saraya so salita nen Cristo, tan saraya so initer to ed siak; tan ibañgat to so amin a too a mangawa na maong.

11 Tan no saraya so aliwa a salita nen Cristo, okom yo—si Cristo ipanengneng to ed sikayo, ed pakapanyari tan baleg a gloria, a saraya so salita to, dia ed kaunoran ya agew; tan sikayo tan siak so onalagey a miarapan ed panañgokoman to; tan nakabatan yo a siak so ingangan to a mañgisulat ed saraya a beñgatla, manwari ed kakapuyan ko.

12 Tan mikasi ak ed Ama ed panamegley na ñgaran nen Cristo a dakel ed sikatayo, no ag iñgen amin, so nilaban ed panarian to ed saman so makabaliksan tan kaunoran ya agew.

13 Tan natan, inararok a kaagian, amin a wala ed kailalakan na Israel, tan amin yo a wala ed sampot na dalin, mansalita ak ed sikayo ed voces na sakey a manakis a manlapu ed sapok: Mampatanir ak la ya anga ed saman so makabaliksan ya agew so onsabi.

14 Tan sikayo ya ag mibiang ed kamaoñgan na Dios, tan igalang yo so salita na saray Judio, tan ontan met ed saray salitak, tan saray salita a manlapu ed sañgi na Cordero na Dios, nia, iter ko ed sikayo so patanir ya andi-angaan, lapu ed saraya a salita tutolan to kayo ed kaunoran ya agew.

15 Tan antokaman a kinapotan ko ed dalin, so iparungtal ya onsumpa ed sikayo ed panañgokoman, tan onia so ingangan na Katawan ed siak, tan nakaukolan ya ononor ak. Amen.