1 Balet, nengneng yo, dia ed saray kaunoran ya agew, odino dia ed agew na saray Gentiles—on, nia amin a bansa na saray Gentiles tan ontan met ed saray Judios, mandapag a saraman so onsabi ed saya a dalin tan saraman so wala ed arum a pasen na saya a dalin, on, dia ed amin a dalin na mundo, nia, sikara so nabuek ed inkarelmeng tan amin a nengneng na karumsisan—

2 Tan sano saman ya agew so onsabi sikara so dalawen na Katawan na saray Ejercito, ed panamegley na karul tan yegyeg, tan ed sakey a baleg ya iñgal, tan bagyo, tan mabiskeg a bagyo, tan dalang na mañgupot ya apoy.

3 Tan amin a bansa ya onlaban sumpa ed Sion, tan siopaman a mangulo ed sikato, so siñga sakey a kugip ed labi na payawar; on, saya so nagawa ed sikara, angan siñga narasan a too a mankukugip, tan nia sikato so mañgan balet sikato so ombañgon tan say kamarerua to angapo so iyan to; odino siñga sakey a too a napgaan a mankukugip, tan nia sikato so oninum balet sikato so ombañgon tan nia sikato so naandian na liknaan, tan say kamarerua to so nawalaan na panlabay a mañgan; on, angan ontan met na saray karaklan ed amin na bansa a milaban sumpa ed Palandey na Sion.

4 Tan nia, amin yo a mangagawa na karelmeñgan, tonda kayo ed inkasikayo tan onkelaw, lapu ed mankelyaw kayo, tan onakis; on, sikayo so nabuek balet aliwa a lapu ed alak, sikayo so mantugingging balet aliwa a lapu ed mabiskeg ya iinumen.

5 Tan nengneng yo, say Katawan inkalbo to ed sikayo so espiritu na malet ya ugip. Tan nia, inlikdem yo so saray mata yo, tan ag yo inawat so saray profeta; tan saray manañgoley yo, tan saray makanengneng ed linawa na Dios sinakbuñgan to lapu ed saray karelmeñgan yo.

6 Tan nagawa a say Katawan a Dios awiten to ed sikayo so saray salita na sakey a libro, tan saraya so salita na saraman so naugip la.

7 Tan nengneng yo, say libro so nakapotan; tan dia ed dalem na libro wala diman so puyan a nanlapu ed Dios, manlapu ed gapo na mundo ya anga ed sampot to nia.

8 Dia ed ontan, lapu ed saray beñgatla ya akakapot, saray beñgatla ya akakapot ag niawat ed saray agew na karelmeñgan tan karumsisan na saray totoo. Dia ed ontan say libro so niamot ed sikara.

9 Balet say libro so niiter ed sakey a too, tan iter to so salita na libro, a saraya so salita na saray wala la ed sapok a naugip, tan iawat to so saraya a salita ed sananey;

10 Balet saray salita ya akakapot ag to iawat, ni say iawat to so libro. Lapu ed say libro so nakapotan ed panamegley na pakapanyari na Dios, tan say puyan ya akapotan ed libro so nisinop anga ed nagnap a panaon na Katawan, a saraya so ompaway; tan nia, iparungtal to so amin a beñgatla nanlapu ed inletneg na mundo anga ed kasampotan to.

11 Tan onsabi so agew a saray salita na libro a saraya so akapotan so nabasa ed tuktok na saray kaaboñgan; tan saraya so nabasa lapu ed pakapanyari nen Cristo; tan amin a beñgatla so niparungtal ed saray anak na totoo ed siopaman a wala ed limog na saray anak na totoo, tan sano siopaman so miandoan anga ed sampot na dalin.

12 Dia ed ontan, dia ed saman ya agew sano say libro so niawat ed sakey a too ya asalitak la, say libro so niamot ed mata na mundo, tan angapo so mata a makanengneng likud ed saray talora a tasi so makanengneng ed saya, lapu ed pakapanyari na Dios, likud ed saman so too ya añgiawatan na libro; tan sikara so mamaneknek ed katuaan na libro tan saray beñgatla a wala diman.

13 Tan angapo so siopaman a makanengneng ed saya, likud ed pigara ya unong ed linawa na Dios, a mañgiter na pamaneknek ed salita to ed saray anak na totoo; lapu ed say Katawan a Dios inkuan to a say salita na saray matuor so mansalita a siñga nanlapu ed saray inaatey.

14 Dia ed ontan, say Katawan a Dios ituloy to so pañgipaway to ed saray salita na libro; tan manlapu ed sañgi na ontan la a karakel na mantasi a sikara so kaliktan to so pañgiletnegan to na saray salita to; tan abagey so siopaman ya ag mañgawat ed salita na Dios!

15 Balet nengneng yo, nagawa a say Katawan a Dios ikuan to ed saman so pañgiteran to na libro: Alam so saraya a salita ya ag akapotan tan itolor mo ed sananey, pian ipanengneng to ed sakey a walaan na aral, a kuan to: Basam so saraya, pikasik ed sika. Tan say walaan na aral so mankuan: Awit mo dia so libro, tan basaen ko.

16 Tan natan, lapu ed gloria na mundo tan pian naala to so gungona onia so ikuan to, tan aliwa ya onkana ed gloria na Dios.

17 Tan say too ikuan to: Ag ko dia naawit so libro, lapu ed saya so akapotan.

18 Dia ed saman ikuan na walaan na aral: Ag ko nabasa so saya.

19 Dia ed ontan nagawa, a say Katawan a Dios iawat to lamet so libro tan saray salita a lugan to ed saman so angapo so aral; tan saman so too ya angapo so aral ikuan to: Aliwa ak a di-aral.

20 Dia ed ontan say Katawan a Dios ikuan to ed sikato: Saray di-aral ag da basaen so saya, lapu ed saraya so impulisay da, tan nagawak so saray dili a kimey ko; dia ed ontan basam so saray salita ya iter ko ed sika.

21 Ag mo didiwiten so saray beñgatla ya akapotan, tan saya so ipaway ko ed nagnap a panaon ko; pian ipanengneng ko ed saray anak na totoo a nayarian ko a gawaen so saray dili a kimey ko.

22 Dia ed ontan, sano abasam la so saray salita ya ingangan ko ed sika, tan naalam la so saray tasi ya insipan ko ed sika, dia ed ontan kapotan mo so libro lamet, tan saya so iamot mo ed siak, pian niagel ko ed kaderal so saray salita ya ag mo ni abasa, anga ed nanengneng ko a manepeg ed kakabatan ko a dili so pañgipakabat ko ed amin a beñgatla ed saray anak na totoo.

23 Tan nia, siak so Dios; tan siak so sakey a Dios na saray milagro; tan ipanengneng ko ed mundo a siak angapo so pidumaan ko karoman, natan, tan ando la ya ando; tan ag ak mankimey ed limog na saray anak na totoo likud no unong ed pananisia ra.

24 Tan lamet nagawa a say Katawan ikuan to ed saman so mambasa ed saray salita a niiter ed sikato:

25 Tan unong a saya a totoo so onasinger ed siak ed panamegley na sañgi ra, tan dia ed bibil da siak so igalang da, balet iniarawi ra so puso ra ed siak, tan say takot da ed siak so imbañgat na saray tutuntonen na totoo—

26 Dia ed ontan, ituloy ko so pangawak na makapakelaw a kimey ed limog na saya a totoo, on, sakey a makapakelaw a kimey tan sakey a pakelaw, tan say kakabatan na saray makabat tan saray di-aral so naandi, tan say pakatalus na saray maalwar saya so niamot.

27 Tan abagey so saraman so mananap pian niamot da so saray simbawa ra manlapu ed Katawan! Tan saray kimey da so wala ed biluñget; tan ikuan da: Siopa so makanengneng ed sikami, tan siopa so makapikabat ed sikami? Tan ikuan da met: Petepeteg, say impañgipigar yo ed beñgatla so pablien a siñga pitek na managdamili. Balet nia, ipanengneng ko ed sikara, kuan na Katawan na saray Ejercito, a kabat ko ya amin so saray kimey da. Kasi say kimey ibaga to ed nangawa ed sikato, ag to ak ginawa? Odino say sakey a beñgatla a tinibukel a plano so mañgibaga ed saman so nangawa, angapo so pakatalus to?

28 Balet nengneng yo, kuan na Katawan na saray Ejercito: Ipanengneng ko ed saray anak na totoo ya agangano ni a bekta tan say Libano so nanmaliw a mabuñga a kaalugan; tan say mabuñga so pablien da a siñga takel.

29 Tan dia ed saman ya agew, saman so telek nareñgel to so saray salita na libro, tan saray mata na saman so bulag nanengneng da manlapu ed ag pakabirbir tan manlapu ed kabiluñgetan.

30 Tan saray maoyamo met so ondakel, tan say gayaga ra wala ed Katawan, tan saray duka ed limog na saray totoo mangayaga ra ed Masanto a Bugtong na Israel.

31 Lapu ed angapo so duarua ya unong a say Katawan so mabilay nanengneng da a say sakey a makapataktakot so manmaliw ya andi-kana, tan say mapasnok so naupot, tan amin a mambabantay ed karelmeñgan so nataksing;

32 Tan saraman so mangawa ed sakey a too na kagapolan lapu ed salita, tan mañgigaton na sakey a kalot ed puerta ya onkana ed saman so mansimbawa, tan ipaliis to so matunong a maptek ed beñgatla ed andi-kakanaan.

33 Dia ed ontan, onia so inkuan na Katawan, ya anundon ed kinen Abraham, nipaakar ed kailalakan nen Jacob: Si Jacob ag la natan ombaing ni say lupa to so ag la omposisaw.

34 Balet sano nanengneng to so saray anak to, say kimey na saray limak, ed pegley to, pasantosen da so ñgaran ko, tan pasantosen da so Masanto a Bugtong nen Jacob, tan takotan da so Dios na Israel.

35 Saraman met so aliñgo ed espiritu so nawalaan na pakatalus, tan saray ñguroñguro makaaral ira na doctrina.