1 Tan natan siak, Nephi, sampotan ko la so pamprofesiyak ed sikayo, inararok a kaagian. Tan ag ak la mansulat likud ed pigara a beñgatla, a saraya so kabat ko ya andi-saew ya onsabi a nagawa; ni say mansulat ak ni likud ed saray pigara a salita nen agik a laki a si Jacob.

2 Dia ed ontan, saray beñgatla ya insulat ko so magenap la ed siak, likud lambeñgat ed pigara a salita a saraya so nakaukolan ya isalitak nipaakar ed saray doctrina nen Cristo; dia ed ontan, mansalita ak ed sikayo a malinlinew, unong ed saray kalinewan na saray profesiyak.

3 Lapu ed say kamareruak manliket ed inkalinew; tan dia ed onia a kanengneñgan say Katawan a Dios mankimey ed saray anak na totoo. Lapu ed say Katawan a Dios so mañgiter na liwawa ed pakatalus; tan sikato so nansalita ed saray totoo unong ed saray salita ra, ya onkana ed pakatalus da.

4 Dia ed ontan, pilalek ko a nunoten yo a nansalita ak ed sikayo nipaakar ed saman so profeta ya impanengneng na Katawan ed siak, a sikato so maminiag ed Cordero na Dios, a sikato so makaekal ed saray kasalanan na mundo.

5 Tan natan, no say Cordero na Dios, sikato bilang masanto, wala so pankaukolan to a nabiniagan ed danum, pian nasumpal to so amin ya inkamatunong, O sirin, kaonoñgan so pankaukolan tayo a nagkalalo, ya aliwa itayo a masanto, a nabiniagan, on, angan ed danum!

6 Tan natan, labay ko a tepeten ed sikayo, inararok a kaagian, no iner a say Cordero na Dios so asumpal to so amin ya inkamatunong ed panamegley na inkabiniagan to ed danum?

7 Ag yo kasi kabat a sikato so masanto? Balet angaman ontan a sikato so masanto, impanengneng to ed saray anak na totoo ya, unong ed laman pinaabeba to so inkasikato ed arapan na Ama, tan tinasian to ed Ama a sikato so ontulok ed sikato ed panumpal to ed saray gangan to.

8 Dia ed ontan, sanen kayari inkabiniagan to ed danum say Espiritu Santo so linmeksab ed sikato ed kanengneñgan na sakey a malapati.

9 Tan lamet, saya so pañgipanengneng to ed saray anak na totoo so kaptekan na dalan, tan say inkamakisir na puerta, a saya so looban da, tan sikato so nangawa na pañgaligan ed sikara.

10 Tan inkuan to ed saray anak na totoo: Tumbok yo ak. Dia ed ontan, inararok a kaagian, natumbok tayo kasi si Jesus likud no sikatayo so matulok a manumpal ed saray gangan na Ama?

11 Tan say Ama, inkuan to: Mambabawi kayo, mambabawi kayo, tan mampabiniag kayo ed ñgaran na Inararok ya Anak.

12 Tan ontan met, say voces na Anak so sinmabi ed siak, a nankuan: Siopaman ya abiniagan ed ñgaran ko, dia ed sikato iter na Ama so Espiritu Santo, a siñga ed siak; Dia ed ontan, ontumbok kayo ed siak, tan gawaen yo so saray beñgatla ya anengneng yo a ginawak.

13 Dia ed ontan, inararok a kaagian, kabat ko a no ontumbok kayo ed Anak, ed sigpot a gagala na puso, ya angapo so pankunkunwari tan angapo so pampalikdo ed arapan na Dios, balet katekep na matua a gagala, a mambabawi kayo ed saray kasalanan yo, a tasian yo ed Ama a siaabubon kayo a mañgako ed inkasikayo so ñgaran nen Cristo, ed panamegley na biniag—on, dia ed panumbok yo ed Katawan tan Manañgilaban yo ya anga ed dalem na danum, unong ed salita to, nia, dia ed ontan awaten yo so Espiritu Santo; on, tan dia ed saya onsabi so biniag na apoy tan Espiritu Santo; tan makapansalita kayo unong ed dila na saray angeles, tan ibelyaw yo so pandayew ed Masanto a Bugtong na Israel.

14 Balet, nengneng yo, inararok a kaagian, onia so insabi na voces na Anak ed siak, a nankuan: Kayari impambabawi yo ed saray kasalanan yo, tan tinasian yo ed Ama a maabuloy kayo a manumpal ed saray gangan ko, ed panamegley na biniag ed danum, tan inawat yo la so biniag ed apoy tan Espiritu Santo, tan makapansalita kayo ed balo a salita, on, angan ed salita na saray angeles, tan kayari to nia siak so iburi yo, magmaong ni a sikayo so ag la akapikabat ed siak.

15 Tan areñgel ko so voces a nanlapu ed Ama, a nankuan: On, saray salita na Inararok so tua, tan matuor. Siopaman a mansiansia ya anga ed sampot, sikato met lamlamang so nilaban.

16 Tan natan, inararok a kaagian, kabat ko a lapu ed saya likud no say sakey a too so mansiansia a mananos ya anga ed sampot, ed itumbok to ed saray pañgaligan ya initer na Anak na mabilay a Dios, sikato so ag nilaban.

17 Dia ed ontan, gawa yo so saray beñgatla ya imbagak ed sikayo ya anengneng ko a say Katawan yo tan Mananundon yo saraya so gawaen to; tan, lapu ed saya a pamaakaran saraya so nipanengneng ed siak, pian nakabatan yo so dalan a looban yo. Tan say dalan a saya so looban yo so pambabawi tan biniag ed danum; tan dia ed ontan onsabi so pamaandi na saray kasalanan yo ed panamegley na apoy tan Espiritu Santo.

18 Tan dia ed ontan sikayo so wala la ed maptek tan makisir a dalan ya ompugta ed bilay ya andi-angaan; on, sikayo so akaloob la ed dalan; agawaan yo la so unong ed gangan na Ama tan say Anak; tan inawat yo so Espiritu Santo, a sikato so mantasi ed Ama tan say Anak, dia ed panumpal na sipan a ginawa to, a no onloob kayo ed dalan sikayo so naawat.

19 Tan natan, inararok a kaagian, kayari a sikayo so wala la ed saya a maptek tan makisir a dalan, ontepet ak no kasi asumpal la ya amin? Nia, ikuan ko ed sikayo, Andi; lapu ed sikayo so ag ni akasabi a sigpot likud ed panamegley na salita nen Cristo ed ag-nagiing a pananisia ed sikato, ya awalaan na nagnap a talek ed saray kaabigan to a sikato so makapanyari a mañgilaban.

20 Dia ed ontan, sikayo so ondesdes ya ondago a katekep so ag-nagiing a pananisia ed si Cristo, ya awalaan na nagnap a mandarlang ya ilalo, tan sakey ya aro ed Dios tan amin a totoo. Dia ed ontan, no sikayo so ondesdes ya ondago, a manliket ed saray salita nen Cristo, tan mansiansia kayo ya anga ed kasampotan, nia, onia so inkuan na Ama: Sikayo so nawalaan na andi-angaan a bilay.

21 Tan natan, nengneng yo, inararok a kaagian, saya so dalan; tan angapo la so sananey ni a dalan odino ñgaran a niiter ed leksab na tawen a kilabanan na too ed panarian na Dios. Tan natan, nia, saya so doctrina nen Cristo, say alenleneg tan tua a doctrina na Ama, tan say Anak, tan say Espiritu Santo, a saksakey a Dios ya andi-angaan. Amen.