1 Tan dia ed saman ya agew ikuan mo: O Katawan, sika so idayew ko; angaman nampasnok ka ed siak nen saman say pasnok mo naandi, tan aligliwa mo ak.

2 Nia, say Dios so manañgilaban ko; manmatalek ak, tan ag ak ontakot; lapu ed say Katawan a Jehova so biskeg tan cancion ko; sikato met so nanmaliw a kilalaban ko.

3 Dia ed ontan, katekep na gayaga onasol ka na danum ed saray bubon na kilalaban.

4 Tan dia ed saman ya agew ikuan yo: Idayew so Katawan, ontawag ed ñgaran to, ibawag yo so saray gawa to ed limog na totoo, saglawi yo pian say ñgaran to so nitanduro.

5 Mancancion ed Katawan: lapu ed sikato so nangawa na saray sankamaoñgan a beñgatla, saya so kabat na lapag na dalin.

6 Ibelyaw tan ieyag mo, sika a manaayam ed Sion; lapu ed makapanyari so Masanto a Bugtong na Israel a wala ed pegley mo.