1 Tan nia, say Katawan, a Katawan na saray Ejercito, ekalen to ed Jerusalem tan Juda, so lubir na panagpagoran tan say tayukor, say amin ya abasto a tinapay, tan say amin a tambak na danum—

2 Say makapanyari a too, tan say too na bakal, say okom, tan say profeta, tan say maalwar, tan say matakken a too;

3 Say kapitan na limamplo, tan say mapagalang a too, tan say managsimbawa, tan say masilib a managgawa, tan say maong a mansalita a managtalompati.

4 Tan iter ko so saray ugogaw ed sikara a manmaliw a prinsipe ra, tan saray ugogaw ya ankekelag so mañgoley ed sikara.

5 Tan saray totoo so napasegsegang, balang sakey ed sananey, tan balang sakey ed kaabay to; say ogaw mandeen ed sikato a dili a mapanta sumpa ed say matakken a too, tan saray makabos sumpa ed saray magalang;

6 Sano say sakey a too so bembenan to so agi to a laki ed abong na ama to, tan mankuan: Sika wala so kawes mo, sika so mañgoley ed sikami, tan aleg a saya a kaderal so nagawa ed leksab na limam—

7 Dia ed saman ya agew sikato so mansamba, a kuan to: Ag ak manmaliw a managtambal; lapu ed dia ed dalem na abong ko angapo so tinapay ni say kawes; ag yo ak gagawaen a manañgoley na saray totoo.

8 Lapu ed say Jerusalem aderal, tan say Juda so nagba, niseñgeg ed saray dila ra tan saray kagagawa ra so sumpa ed Katawan, a saya so anugsog ed mata na gloria to.

9 Say kanengneñgan na saray lupa ra so mantasi sumpa ed sikara, tan sikato so mañgiparungtal ed saray kasalanan da a siñga say Sodoma, tan ag da nayari ya iamot so saya. Abagey so saray kamarerua ra, lapu ed tinumañgan da na kaugsan so inkasikara a dili.

10 Ibagam ed saray matunong a saya so maabig ed sikara; lapu ed sikara so mañgan ed buñga na saray kagagawa ra.

11 Abagey so saray marelmeng, lapu ed sikara so nabalang, lapu ed say tumang na lima da so ompawil ed sikara!

12 Tan saray totook, ugogaw so saray managpasegsegang ed sikara, tan saray bibii so mañgoley ed sikara. O totook, saraman so manañgitunton ed sika so gapo na saray liñgom tan deralen da so dalan na saray basbas mo.

13 Say Katawan manalalagey a mantutol; tan manalalagey a mañgokom ed saray totoo.

14 Say Katawan onloob ed panañgokoman a kaiba na saray matakken a totoo to tan saray prinsipe ra; lapu ed kinan yo so kaubasan tan saray sinamsam yo ed saray duka a wala ed saray kaaboñgan yo.

15 Anto so labay yo ya ibaga? Binakbak yo so saray totook a ginuygoy, tan giniling yo so lupa na saray duka, kuan na Katawan a Dios na saray Ejercito.

16 Kaaruman to nia, say Katawan inkuan to: Lapu ed saray bibii ya anak na Sion so mapanta, tan dia ed panagakar da mataltalker so saray teñger da tan makmakdem so kalilingis da, a say panagakar da maandawes so kakikiwi ra, tan kiling-kiling so saray sali ra—

17 Dia ed ontan say Katawan dusaen to na kekgang so lomonlomunan na saray bibii ya anak na Sion, tan say Katawan naalmo to so saray maamot a kabiañgan da.

18 Dia ed saman ya agew say Katawan, ekalen to so biskeg na saray kiling-kiling a palaguygoy da, tan saray iket a takoko ra, tan saray malimpek a dalig a siñga bulan;

19 Saray kolintas tan saray pulseras, tan saray pandong;

20 Saray suklob na buek, saray palaguygoy ed bikking, tan berber na ulo, tan saray pabaliñgit, tan saray ikaw;

21 Saray singsing, tan pakaw na eleng;

22 Saray mansasalat a kawes, tan saray kolibemben, tan saray pandong, tan saray panagkulet na buek;

23 Saray salming, tan saray pino a lienso, tan saray talukbong, tan saray pandong.

24 Tan nagawa, imbes ya ambaliñgit ya añgob onsalat so bañget; tan imbes a balkes, lubir; tan imbes a mauksoy a buek, inkayangyang; tan imbes ya abel a salimbeng na eges, abel a magasal; inkapoolan imbes ya inkagangana.

25 Saray lalakim napelag ira ed espada tan saray makapanyarim ed bakal.

26 Tan saray puerta to so maniñgel tan manermen; tan angapo so onkitakitaw, tan sikato so onyurong ed tapew na dalin.