1 Tan natan mansalita ak ed sika, Joseph, say sankaunoran ya anak ko. Sika so nianak ed kalawakan na saray irirap ko; on, dia ed saray agew na sangkabalegan ya ermen ko sika so inlokun nen inam.

2 Tan say Katawan pasantoen to met ed sika so saya a dalin, a saya so apili-pili a dalin, ya onkana a tawir mo tan tawiren na saray boleg mo kaiba so saray kaagian mo, onkana ed ligen mo ed ando la ya ando, no peteg kayo a matuor ed pañgonor ed saray gangan na Masanto a Bugtong na Israel.

3 Tan natan, Joseph, say sankaunoran a nianak, ya impaway ko ed kalawakan na saray irirap ko, say Katawan bendicionan to ka ed ando la ya ando, tan say boleg mo ag ira nasigsigpot a naderal.

4 Tan nengneng mo, sika so buñga na banel ko; tan siak so kabolegan nen Jose a sikato so niakar ya adakep ed Egipto. Tan agay la so kabaleg na saray paknaan na Katawan a ginawa to ed si Jose.

5 Dia ed ontan, si Jose so peteg ya anengneng to so saray agew tayo. Tan agamoran to so sipan na Katawan, a manlapu ed buñga na saray banel to say Katawan a Dios ipatalindeg to so matunong a sañga onkana ed kailalakan na Israel; aliwa a say Mesias, no ag sakey a sañga ya apoter a nisian, angaman ontan, pian nanunotan ed saray paknaan na Katawan a say Mesias iparungtal ed sikara ed saray kaunoran ya agew, ed espiritu na pakapanyari, onkana ed pañgipaway to ed sikara ed kabiluñgetan ya onla ed liwawa—on, manlapu ed niamot a kabiluñgetan tan manlapu ed inkadakep paarap ed kawayañgan.

6 Tan si Jose peteg a nampaneknek, a nankuan: Sakey a makapikabat ed linawa na Dios so ipatalindeg na Katawan a Dios, a sikato so manmaliw ya apili-pili a makapikabat ed linawa na Dios ed buñga na saray banel ko.

7 On, si Jose peteg ya inkuan to: Onia so inkuan na Katawan ed siak: Sakey ya apili a makapikabat ed linawa na Dios so italindeg ko ed buñga na saray banel mo; tan sikato so manuna a galgalañgen ed limog na buñga na saray banel mo. Tan dia ed sikato iter ko so gangan a gawaen to so sakey a kimey onkana ed buñga na saray banel mo, ed saray kaagian to, a saya baleg so kakanaan to ed sikara, angan dia ed pakaawit to ed sikara ed pikakabat ed saray paknaan a saya so ginawak ed saray ama yo.

8 Tan iter ko ed sikato so sakey a gangan ya angapo so sananey a kimey a gawaen to, likud ed say kimey ya igangan ko ed sikato. Tan sikato so gawaen ko a baleg ed arap na saray matak; lapu ed sikato so mangawa na saray kimey ko.

9 Tan sikato so baleg a siñga si Moises, a sikato so inkuan ko ya ipatalindeg ko, a mañgilaban ed saray totook, O kailalakan na Israel.

10 Tan ipatalindeg ko si Moises, a mañgilaban ed saray totook ed ipaway da ed dalin na Egipto.

11 Balet sakey a makapikabat ed linawa na Dios so ipatalindeg ko ed buñga na saray banel mo; tan dia ed sikato iter ko so pakapanyari a mañgawit na saray salitak ya onkana ed boleg na saray banel mo—tan aliwa a say pañgawit to labat ed saray salitak, kuan na Katawan, balet nipaakar ed pañgoyong to ed sikara ed saray salitak, a saya so sinmabi ed limog da.

12 Dia ed ontan, say buñga na saray banel mo sikara so mansulat; tan say buñga na saray banel nen Juda so mansulat; tan saman so isulat na buñga na saray banel mo, tan ontan met ed isulat na buñga na saray banel na Juda, sikara so ontubo a dua, a mañgewkew na tila-tila a doctrina tan mampaabeba ed saray baliñgaan, tan mañgiletneg na kareenan ed limog na buñga na saray banel mo, tan awiten to ra ed pikakabat ed saray ama ra ed kaunoran ya agew, tan ontan met ed pikakabat ed saray paknaan ko, kuan na Katawan.

13 Tan manlapu ed kakapuyan sikato so nagawa a mabiskeg, ed saman ya agew sano say kimey ko ongapo ed limog na amin a totook, onkana ed kipawil mo, O kailalakan na Israel, kuan na Katawan.

14 Tan onia so impamprofesiya nen Jose, a nankuan: Nia, sakey a makapikabat ed linawa na Dios so bendicionan na Katawan; tan saraman so pampilalekan da a sikato so deralen da sikara so nakewkew; lapu ed saya a sipan, ya agamoran ko ed Katawan, nipaakar ed buñga na saray banel ko, so nasumpal. Nia, ag ak manduarua ed kasumpal na saya a sipan.

15 Tan say ñgaran to natawag a kaboloy ko; tan sikato so kañgaranan nen ama to. Tan sikato so siñga siak; lapu ed say beñgatla, ya awiten na Katawan ed dili a lima to, ed panamegley na pakapanyari na Katawan so mañgawit ed saray totook ed kilalaban.

16 On, onia so impañgiprofesiya nen Jose: Amtak a peteg so saya a beñgatla, iñgen amtak a peteg so sipan nen Moises; lapu ed say Katawan inkuan to ed siak, pagnayonen ko so boleg mo ed ando la ya ando.

17 Tan say Katawan inkuan to: Mañgipatalindeg ak na sakey a Moises; tan iter ko so pakapanyari ed sikato ed sakey a tayukor; tan iter ko so panañgokom ed sikato ed panamegley na kasulatan. Iñgen ag ko bulosan so dila to, a sikato so mansalita na dakel, lapu ed sikato ag ko gawaen a makapanyari ed panagsalita. Balet isulat ko ed sikato so gangan ko, ed panamegley na tamoro na limak a dili; tan mangawa ak na tagasalita ya onkana ed sikato.

18 Tan say Katawan inkuan to met ed siak: Ipatalindeg ko ed buñga na saray banel mo; tan mangawa ak na sakey a tagasalita ya onkana ed sikato. Tan siak, nia, iter ko ed sikato ya isulat to so buñga na saray banel mo; onkana ed buñga na saray banel mo; tan say tagasalita na saray banel mo so mañgiparungtal.

19 Tan saray salita ya isulat to so saray salita ya unong ed kakabatan ko so nakaukolan ya onla ed buñga na saray banel mo. Tan manmaliw a siñga saray buñga na banel mo so onkelyaw a manlapu ed sapok; lapu ed kabat ko so saray pananisia ra.

20 Tan sikara so mampulong na pambabawi a manlapu ed sapok; on, angan say pambabawi ed saray kaagian da, angan dia ed kayari ilabas na dakel a kailalakan ed sikara. Tan nagawa a saray nañgis da onlabas, iñgen unong ed linew na saray salita ra.

21 Lapu ed saray pananisia ra saray salita ra so manlapu ed sañgik ya onla ed saray kaagian da a sikara so buñga na saray banel mo; tan say kakapuyan na saray salita ra so pabiskegen ko ed saray pananisia ra, onkana a pakanunot ed paknaan ko a saya so ginawak ed saray ama yo.

22 Tan natan, nia, anak ko a laki a Joseph, unong ed saya a kanengneñgan so impamprofesiya nen amak nen inmuna a panaon.

23 Dia ed ontan, lapu ed saya a paknaan sika so mapalar; tan say boleg mo so ag naderal, lapu ed deñgelen da so saray salita na libro.

24 Tan wala so onalagey a makapanyari ed limog da, a sikato so mangawa na dakel a kaabigan, mandapag ed salita tan dia ed gawa, lapu ed sikato so sakey ya ikakana ed lima na Dios, kaiba so kabaleg a pananisia, pian mangawa na ankakabaleg a pakelaw, tan gawaen to so beñgatla a baleg ed imaton na Dios, ed pañgawit na dakel a kipawil ed kailalakan na Israel, tan nipaakar ed boleg na saray agagim.

25 Tan natan, mapalar ka, Joseph. Nengneng mo, sika so melag ni; dia ed ontan deñgel ka ed saray salita na agim, si Nephi, tan nagawa ed sika so unong ed saray salita ya imbalikas ko. Nodnunot mo so saray salita na ompapatey ya amam. Amen.