1 Natan siak, Nephi, mansalita ak nipaakar ed saray salita ya insulat ko, a saraya so asalita ed panamegley na sañgi nen Isaias. Tan nia, si Isaias so nansalita na dakel a beñgatla a mairap a talusan na dakel ed saray totook; lapu ed ag da kabat so kanengneñgan na panagprofesiya ed limog na saray Judio.

2 Lapu ed siak, Nephi, ag ko imbañgat ed sikara so saray dakel a beñgatla a nipaakar ed ugali na saray Judios; saray kimey da so kimey na kabiluñgetan, tan saray kagagawa ra so kagagawa na karumsisan.

3 Dia ed onia, mansulat ak ed saray totook, tan dia ed amin na saraman so mañgawat ed saraya a beñgatla ya isulat ko, pian nakabatan da so saray panañgokom na Dios, a saya so onsabi ed amin a bansa, unong ed saray salita ya imbalikas to.

4 Dia ed ontan, talineng yo, O sikayo a totook, a wala ed kailalakan na Israel, tan deñgel kayo ed saray salitak; lapu ed saray sinalita nen Isaias aliwa a malinew ed sikayo, angaman ontan saraya so malinew ed saray napno na espiritu na profesiya. Balet iter ko ed sikayo so sakey a profesiya, unong ed espiritu a wala ed siak; dia ed ontan mamprofesiya ak unong ed kalinewan a wala ed siak a nanlapu ed saman so panaon ya intaynan ko manlapu ed Jerusalem a kaibak si amak; tan nengneng yo, say kamareruak manliket ed saray kalinewan nipaakar ed saray totook, pian makaaral ira.

5 On, tan say kamareruak manliket ed saray salita nen Isaias, lapu ed siak so pinmaway a nanlapu ed Jerusalem, tan saray dili a matak anengneng da so saray beñgatla a nipaakar ed saray Judio, tan kabat ko a saray Judio atalusan da so saray beñgatla nipaakar ed saray profeta, tan angapo so arum a totoo a makatalus ed saray beñgatla a nisalita ed saray Judio a siñga sikara, likud no sikara so nibañgat nipaakar ed saray beñgatla ya unong met ed saray Judio.

6 Balet nia, siak, Nephi, ag ko imbañgat ed saray anak ko so siñga inkibañgat na saray Judio; balet nengneng yo, siak, ed inkasiak a dili, nanayam ak ed Jerusalem, kanian amtak so saray pasen ed kaliber-liber; tan sinaglawik ed saray anak ko so nipaakar ed saray panañgokom na Dios, a saya so agawa ed limog na saray Judio, ed saray anak ko, unong ed amin a sinalita nen Isaias, tan saraya so ag ko la insulat.

7 Balet nia, ipatuloy ko so saray dili a profesiyak, unong ed dili a kalinewan ko, a dia ed saya kabat ko ya angapo so too a naliñgo; angaman ontan, dia ed saray agew a nasumpal so saray profesiya nen Isaias saray totoo peteg a nakabatan da, dia ed saray panaon sano saraya so nagawa.

8 Dia ed onia, saraya so walaan na kakanaan ed saray anak na totoo, tan siopaman a mañgipasen a saraya so aliwa ya onia, dia ed sikara so pisalitaan ko, tan saray salita ipasakey ko ed saray dili a totook; lapu ed kabat ko a saya walaan na baleg a kakanaan ed sikara ed saray kaunoran ya agew, tan dia ed saman ya agew natalusan da so saraya; dia ed onia, onkana ed pankaabigan da saraya so insulat ko.

9 Tan unong a say sakey a kailalakan so aderal ed limog na saray Judio lapu ed karelmeñgan, angan ontan met sikara so aderal manlapu ed sakey a kailalakan ya anga ed sananey a kailalakan unong ed saray karelmeñgan da; tan angapo so angan siopaman ed sikara ya aderal likud no saya so impasakbay na profeta na Katawan.

10 Dia ed ontan, saya so nibaga la ed sikara nipaakar ed kaderal a saya so onsabi ed sikara a tampol kayari intaynan nen amak ed Jerusalem; angaman ontan, pinaawet da so saray puso ra; tan unong ed profesiyak sikara so aderal, likud ed saray inawit da ya adakep ed Babilonia.

11 Tan saya natan so salitaen ko lapu ed espiritu a wala ed siak. Tan manwari ya ontan a sikara so inawit ya impaway sikara so ompawil lamet, tan kayarianen da so dalin na Jerusalem; dia ed ontan, sikara so nipawil lamet ed dalin a tawir da.

12 Balet, nengneng yo, nawalaan ira na bakal, tan dalamurom na saray bakal; tan no saman ya agew so onsabi a say Bugbugtong ya Anak na Ama, on, say Ama na tawen tan dalin, so omparungtal ed sikara ed laman, nia, sikato so ag da awaten, lapu ed saray karelmeñgan da, tan awet na saray puso ra, tan talker na saray teñger da.

13 Nengneng yo, sikato so ipasak da ed krus, tan dia ed kayari pañgiloob da ed sikato ed sakey a lubok dia ed loob na talora ya agew sikato so onoli ed bilay manlapu ed saray inaatey, katekep na panagpaabig a wala ed saray payak to; tan amin a manisia ed ñgaran to so nilaban ed panarian na Dios. Dia ed ontan, say kamareruak mangayaga a mañgiprofesiya nipaakar ed sikato, lapu ed anengneng ko la so agew to, tan say pusok pinabaleg to so masanto a ñgaran to.

14 Tan nia nagawa a kayari a say Mesias so onoli a manlapu ed saray inaatey, tan imparungtal to so inkasikato ed saray totoo, tan dia ed unong na karakel a manisia ed ñgaran to, nia, say Jerusalem so naderal lamet; tan abagey so saray onlaban sumpa ed Dios tan saray totoo na simbaan to.

15 Dia ed ontan, saray Judio so nitaytayak ed amin a bansa; on, tan angan say Babilonia so naderal met; dia ed ontan, saray Judio so nataytayak ed saray arum a bansa.

16 Tan kayari kataytayak da, tan say Katawan a Dios sikara so binakbak to ed panamegley na arum a bansa ed loob na dakel a kailalakan, on, angan manlapu ed sakey a kailalakan anga ed sananey a kailalakan anga ed sikara so nakuyong a manisia ed si Cristo, ya anak na Dios, tan say bagat a pamaandi na kasalanan a saya so malaknab ya onkana ed amin a katooan—tan sano onsabi so saman ya agew a sikara so manisia ed si Cristo, tan mañgigalang ira ed Ama ed ñgaran to, a katekep so dalisay a puso tan saray malinis a lima, tan ag la ra mantatalaran ed sananey ni a Mesias, iñgen, dia ed saman a panaon, say agew onsabi a nakaukolan a sikara so manisia ed saraya a beñgatla.

17 Tan say Katawan iteen to so lima to lamet ed komadua a panaon pian ipawil to so totoo to manlapu ed inkabalang tan inkapelag a kipapasen. Dia ed ontan, ituloy to so mangawa na makapakelaw a kimey tan sakey a pakelaw ed limog na saray anak na totoo.

18 Dia ed ontan, awiten to so saray salita to ed sikara, a saraya a salita so mañgokom ed sikara ed kaunoran na agew, tan saraya so niiter ed sikara ed gagala pian sikara so nakuyong ed tua a Mesias, a sikato so ag da inawat; tan dia ed pañgoyong ed sikara ya ag la ra mantatalaran ed sananey ni a Mesias ya onsabi, lapu ed angapo la so antokaman ya onsabi, likud no saya so aliwa a tua a Mesias a mañgibalang ed saray totoo; lapu ed wala so saksakey ya alenleneg a Mesias a sinalita na saray profeta, tan saya a Mesias sikato so ag-inawat na saray Judio.

19 Lapu ed unong ed salita na saray profeta, say Mesias onsabi ed anem a lasus taon manlapu ed taon ya intaynan nen amak ed Jerusalem; tan unong ed salita na saray profeta, tan ontan met ed salita na angel na Dios, say ñgaran to so Jesu Cristo, say Anak na Dios.

20 Tan natan, kaagian ko, siak so nansalita ed malinew pian ag kayo naliñgo. Tan unong a say Katawan a Dios so mabilay a sikato so añgipaway ed Israel a nanlapu ed dalin na Egipto, tan initer to ed kinen Moises so pakapanyari pian tambalen to so saray bansa kayari a sikara so kinetket na madita ya oleg, no itañgay da so mata ra ed oleg ya impaatagey to ed arapan da, tan ontan met initer to so pakapanyari ed sikato a bakbaken to so bato tan say danum so ompaway; on, nia ikuan ed sikayo, ya unong a saraya a beñgatla so tua, tan unong a say Katawan a Dios so mabilay, angapo so arum a ñgaran a niiter ed leksab na tawen likud lambeñgat ed saya a Jesu Cristo, a sikato so sinalitak, no iner say too nilaban.

21 Dia ed ontan, makaseñgeg ed saya a pamaakaran say Katawan a Dios insipan to ed siak a saraya a beñgatla ya isulat ko so nisinop tan niagel ed kadederal, tan nipalima ed saray boleg ko, manlapu ed sakey a kailalakan anga ed sananey a kailalakan, pian say sipan so nasumpal ed si Jose, a say boleg to ag kapiganman napaksot legan a saya a dalin so akatalindeg.

22 Dia ed ontan, saraya a beñgatla so onla manlapu ed sakey a kailalakan anga ed sananey a kailalakan legan ya akatalindeg so dalin; tan saraya so ondalan unong ed linawa tan kaliktan na Dios; tan saray bansa a mankakayarian na saraya so naokom unong ed saray salita a nisulat.

23 Lapu ed mansasagpot kami a siseseet a mansulat, pian nakuyong mi so saray anak mi, tan ontan met ed saray kaagian mi, a manisia ed si Cristo, tan pian makapipulañgan ira ed Dios; lapu ed kabat mi a saya so lapu ed gracia kanian sikatayo so nilaban kayari na amin a nayarian tayo a gawaen.

24 Tan, manwari ya ontan manisia kami ed si Cristo, susumpalen mi so gangan nen Moises, tan sikami so ag-nagiing ya mantatalaran ed si Cristo, anga ed say gangan so nasumpal.

25 Tan, lapu ed saya a pamaakaran say gangan so niiter; dia ed ontan say gangan nanmaliw ya inatey ed sikatayo, tan binmilay itayo ed si Cristo lapu ed pananisia tayo; iñgen susumpalen tayo so ley makaseñgeg ed saray gangan.

26 Tan sikami so mansasalita nipaakar ed si Cristo, mangagayaga kami ed si Cristo, ipopulong mi si Cristo; mamproprofesiya kami nipaakar ed si Cristo, tan mansusulat kami unong ed saray profesiya mi, pian saray anak mi nakabatan da no iner so señgeg a panlapuan na kapirdona na saray kasalanan da.

27 Dia ed ontan mansasalita kami nipaakar ed gangan pian saray anak mi nakabatan da so say inkaandi-kakanaan na gangan; tan sikara, dia ed pikabat da ed inkaandi-kakanaan na gangan, mantalaran ed saman so bilay a wala ed kinen Cristo, tan nakabatan da so makaseñgeg ed inkiiter na gangan. Tan kayari a say gangan so asumpal ed kinen Cristo, pian ag da la paaweten so saray puso ra sumpa ed sikato sano say gangan so nepeg la ya ipulisay.

28 Tan natan nia, sikayo a totook, sikayo so totoo ya awalaan na matalker a teñger; dia ed ontan, nansalita ak ed sikayo ed malinew, pian ag nayari ya ag yo natalusan. Tan saray salita ya imbalikas ko so onalagey a pamaneknek sumpa ed sikayo; lapu ed saraya so malaem la a mañgibañgat ed siopaman a too ed matua a dalan; lapu ed say matua a dalan so say panisia ed kinen Cristo tan sikato so ag yo iboburi; lapu ed pañgiburi yo ed sikato iburi yo met so saray profeta tan say gangan.

29 Tan natan nia, ikuan ed sikayo a say tua a dalan so say panisia ed kinen Cristo, tan sikato so ag yo iboburi; tan si Cristo so Masanto a Bugtong na Israel; dia ed ontan nakaukolan ya ontewek kayo ed arap to, tan sikara so igalang yo ed amin a pakayari yo, nunot, tan biskeg, tan amin a kamarerua yo, tan sano saya so gawaen yo kapiganman ag kayo nibantak ed paway.

30 Tan, unong a saya so kanepegan, nakaukolan a sumpalen yo so saray gagawaen tan tutuntonen na Dios anga ed kasumpal na gangan a saraya so niiter ed kinen Moises.