1 Tan natan, inararok a kaagian, binasak so saraya a beñgatla pian nakabatan yo so nipaakar ed saray paknaan na Katawan ya akipaknaan to ed amin ya kailalakan na Israel—

2 A sikato so akisalita ed saray Judios, ed panamegley na sañgi na saray masanto a profeta to, manlapu la ed gapo a mampaleksab, manlapu ed sakey a kailalakan anga ed sananey a kailalakan, anga ed say panaon so onsabi a sikara so nipawil ed matua a simbaan tan olopan na Dios; sano sikara so natipon ya onsempet ed saray dalin a tawir da, tan sikara so niletneg ed amin a dalin da a sipan.

3 Nia, inararok a kaagian, salitaen ko so saraya a beñgatla pian mangayaga kayo, tan itangwa yo so saray ulo yo ed ando la ya ando, lapu ed saray bendicion ya iter na Katawan a Dios ed saray anak yo.

4 Tan kabat ko a baleg so seet yo a nananap, dakel ed sikayo, pian nakabatan yo so saray beñgatla ya onsabi; dia ed ontan kabat ko ya amta yo a say laman tayo so nakaukolan a naderal tan ompatey; manwari ya ontan, dia ed saray laman tayo nanengneng tayo so Dios.

5 On, kabat ko ya amta yo a dia ed laman ipanengneng to so inkasikato ed saraman so wala ed Jerusalem, a diman so nanlapuan tayo; lapu ed kanepegan so saya ed limog da; lapu ed nakaukolan ed say makapanyari a Manamalsa a sikato so mampaabeba ed inkasikato pian manmaliw ya oleyan na too ed laman, tan ompatey ya onkana ed amin a totoo, pian amin a totoo paoleyan ed sikato.

6 Tan unong a say patey so ondalan ed amin a totoo, pian nasumpal so mapañgasi a plano na makapanyari a Manamalsa, wala so mapeget a pankaukolan na pakapanyari na kioli ed bilay, tan say kioli ed bilay nakaukolan ya onsabi ed too lapu ed inkigapol; tan say inkigapol sinmabi makaseñgeg ed impankasalanan; tan lapu ed say too so nigapol sikara so ataksing a nisian ed kawalaan na Katawan.

7 Dia ed ontan, nakaukolan so sakey a malaknab a bagat a pamaandi na kasalanan—likud no wala so malaknab a bagat a pamaandi na kasalanan saya a nabulok a laman ag to nisulong so ag-nabulok a laman. Dia ed ontan, say unaan ya inkaokom a sinmabi ed too nakaukolan a nansiansia ed angapo so sampot a dukey. Tan no onia, saya a laman ondukol a nabulok tan natemek ed ina a dalin, ya ag la ombañgon angan kapigan.

8 O say kakabatan na Dios, say panañgasi tan gracia to! Tan nengneng yo, sano say laman so ag la ombañgon lamet say espiritu tayo so kaukolan ya oleyan na saman ya angel a nigapol a nanlapu ed kawalaan na Andi-angaan a Dios, tan sikato so nanmaliw a demonyo, ya ag la ombañgon angan kapigan.

9 Tan saray espiritu tayo manmaliw a siñga sikato, tan manmaliw tayo a demonyo, angeles ed say demonyo, a nakapotan ed kawalaan na Dios tayo, tan mansiansia itayo ed saman so ama na saray tila, ed kasegsegañgan, a siñga sikato; on, ed saman so sakey a pinalsa a nampalikdo ed saray inmuna ya ateng tayo, ya impanmaliw to so inkasikato a siñga angel na liwawa, tan kinewkew to so saray anak na totoo ed maamot a pannununoñgan ed panagpatey tan amin a nengneng na maamot a kimey ed kabiluñgetan.

10 O agay la so kabaleg na kaabigan na Dios tayo, a sikato so añgiparaan na dalan a mañgibulos ed sikatayo manlapu ed bemben na saya a makapataktakot a monanakap; on, saman a monanakap, say patey tan infierno, a saya so tatawagen ko na ipatey na laman, tan ontan met ed ipatey na espiritu.

11 Tan lapu ed dalan na panañgilaban na Dios tayo, a say Masanto a Bugtong na Israel, saya ya ipapatey, ya asalitak la, saya so inkalaman, iawat to so saray inaatey to; a saya ya ipapatey so lubok.

12 Tan saya ya ipapatey ya asalitak, a saya so ipapatey ed espiritu, iawat to so saray inaatey to; a saya ya ipapatey ed espiritu so infierno; dia ed ontan, say patey tan say infierno kaukolan ya iawat da so saray inaatey da, tan say infierno nakaukolan ya iawat to so saray adakep to ya espiritu, tan say lubok nakaukolan ya iawat to so saray laman ya adakep to, tan saray laman tan espiritu na totoo so ompawil ed sakey tan sakey; tan saya dia ed panamegley na pakapanyari na inkioli ed bilay na Masanto a Bugtong na Israel.

13 O agay la so kabaleg na plano na Dios tayo! Tan dia ed biek to nia, say paraiso na Dios kaukolan ya iawat to so espiritu na saray matunong, tan say lubok iawat to so laman na saray matunong; tan say espiritu tan say laman so ompawil ed gendat ya inkasikato lamet, tan amin a totoo manmaliw la ya ag-naderal, tan ag-ompatey, tan sikara so mabilay a kamarerua, a walaan na nagnap a pikakabat a siñga sikatayo ed laman, likud lambeñgat ed say pikakabat tayo manmaliw a nagnap.

14 Dia ed ontan, nawalaan tayo na nagnap a pikakabat ed amin a kasalanan tayo, tan karotakan tayo, tan say ag-inkasaniban tayo; tan saray matunong nawalaan ira na nagnap a pikakabat ed saray gayaga ra, tan say inkamatunong da, lapu ed akawesan ira na inkadalisay, on, angan kolibemben na inkamatunong.

15 Tan nagawa sano say amin a totoo so ondalan la ed unaan a patey ya onarap ed bilay, lapu ed nanmaliw la ra ya ag-ompatey, nakaukolan ya omparungtal ira ed arap na yuroñgan na panañgokoman na Masanto a Bugtong na Israel; tan dia ed saman la so isabi na okom, tan sikara so naokom unong ed masanto a panañgokom na Dios.

16 Tan andi-saew, unong a say Katawan so mabilay, lapu ed say Katawan a Dios sinalita to so saya, tan saya so andi-angaan a salita to, ya ag-nayari ya ag-nagawa, a saray matunong sikara so siansia ni a matunong, tan saray marutak sikara so siansia ni a marutak; dia ed ontan, saraman so marutak so demonyo tan saray angeles to; tan sikara so onla ed andi-angaan ya apoy, a niparaan onkana ed sikara; tan say paniñgel da siñga sakey a dayat na apoy tan azufre, a say dalang to mampaatagey ed ando la ya ando tan angapo so kasampotan to.

17 O agay la so kabaleg tan kaptekan na Dios tayo! Lapu ed sumpalen to ya amin so saray salita to, tan saraya so imbesñgaw to a nanlapu ed sañgi to, tan say gangan to nakaukolan a nasumpal.

18 Balet, nia, saray matunong, saray sasantos na Masanto a Bugtong na Israel, saraman so anisia ed Masanto a Bugtong na Israel, saraman so nantepel ed saray krus na mundo, tan binalaw da so kababaiñgan to nia, sikara so manawir ed panarian na Dios, a saya so niparaan ya onkana ed sikara nanlapu la ed inletneg na mundo, tan say gayaga ra so nagnap ed ando la ya ando.

19 O say sankabalegan a panañgasi na Dios tayo, say Masanto a Bugtong na Israel! Lapu ed ilaban to so saray sasantos to ed saman so makapataktakot a monanakap salanti say demonyo, tan patey, tan infierno, tan saman so dayat na apoy tan azufre, a saya so andi-angaan a kairapan.

20 O agay la so kabaleg na inkasanto na Dios tayo! Lapu ed kabat to ya amin so beñgatla, tan angapo so angan dinan a beñgatla ya ag to kabat.

21 Tan sikato so onsabi dia ed mundo pian ilaban to so amin a too no deñgelen da so voces to; tan nia, liknaen to so sulit na amin a totoo, on, saray sakit na amin a mambibilay a pinalsa, mandapag a lalaki, bibii, tan saray ugogaw, a sikara so miembro na boleg nen Adan.

22 Tan saya so itepel to pian say kioli ed bilay so nagawa ed amin a totoo, pian amin so ontalindeg ed arap to dia ed makabaliksan tan panañgokom ya agew.

23 Tan ingangan to ya amin a totoo so nakaukolan a mambabawi, tan nabiniagan ed ñgaran to, a walaan ira na nagnap a pananisia ed Masanto a Bugtong na Israel, odino andi ag ira nilaban ed panarian na Dios.

24 Tan no ag ira mambabawi tan manisia ed ñgaran to, tan nabiniagan ed ñgaran to, tan mansiansia ya anga ed kasampotan, sikara so naayew; lapu ed say Katawan a Dios, say Masanto a Bugtong na Israel, saraya so sinalita to.

25 Dia ed ontan, initer to so sakey a gangan; tan no angapo so gangan a niiter angapo so dusa; tan no angapo so dusa angapo so tutol; tan no angapo so tutol say panañgasi na Masanto a Bugtong na Israel wala so pakasakop to ed sikara, makaseñgeg ed bagat a pamaandi na kasalanan; tan sikara so nilaban lapu ed pakapanyari to.

26 Lapu ed say bagat a pamaandi na kasalanan sumpalen to so pankaukolan na kaptekan to ed amin na saraman so ag niiter so gangan ed sikara, pian sikara so nilaban ed saman so makapataktakot a monanakap, patey tan infierno, tan ed demonyo, tan say dayat na apoy tan azufre, a saya so andi-angaan a paniñgel; tan sikara so nipawil ed saman a Dios ya añgiter ed sikara na linawa, a sikato so Masanto a Bugtong na Israel.

27 Balet abagey so siopaman a dia ed sikato niiter so gangan, on, a wala ed sikato so amin a gangan na Dios, a siñga sikatayo, tan mankasalanan ed saya, tan daraken to so saray agew na panagsubok ed sikato, lapu ed makapataktakot so kipapasen to.

28 O saman so masilib a plano na saman so sakey a mauges! O say andi-kakanaan, tan say kakapuyan, tan say inkamakolang-kulang na too! Sano sikara so awalaan na aral say nunot da sikara la so makabat, tan ag la ra ondeñgel ed simbawa na Dios, tan saya so ipulisay da ya ibiig, tan ipasen da a makabat la ra ed inkasikara a dili, dia ed ontan, say kakabatan da so makulang-kulang tan ag mañgiter ed sikara na pinanabang. Tan sikara so nabalang.

29 Balet say nawalaan na aral maong no sikara so ondeñgel ed saray simbawa na Dios.

30 Balet abagey so saray mayaman, a sikara so mayaman ed saray beñgatla a nipaakar ed mundo. Tan lapu ed sikara so mayaman balawen da so saray duka, tan pasegsegañgen da so saray maoyamo, tan saray puso ra wala ed saray kayamanan da; dia ed ontan, say kayamanan da sikato so dios da. Tan nia, say kayamanan da so naderal ompatey met kaolop da.

31 Tan abagey so saray telek ya ag ondeñgel; tan sikara so nabalang.

32 Abagey so saray bulag ya ag onnengneng, tan sikara met so nabalang.

33 Abagey so ag agalsiman ed puso, lapu ed say pikakabat ed karelmeñgan da so mamakbak ed sikara ed kasampotan na agew.

34 Abagey so matila, tan sikato so ipelag ed infierno.

35 Abagey so managpatey a mangagala a mampatey, tan sikato so ompatey.

36 Abagey so mangagawa na inkabalangkantis, tan sikara so ipelag ed infierno.

37 On, abagey so saray mañgigagalang ed saray talintao, tan say demonyo na amin a demonyo manliket ed sikara.

38 Tan, dia ed antikey a salita, abagey ya amin so ompatey ed saray kasalanan da; lapu ed sikara so ompawil ed Dios, tan nanengneng da so lupa to, tan mansiansia ra ed saray kasalanan da.

39 O, inararok a kaagian, nunot yo so makapasinagem a kipapasen ed pankasalananan sumpa ed Masanto a Dios, tan say makapataktakot a pañgiabuloy ed saray tanguyor na sakey a masilib. Nunot yo, lapu ed say kanunotan a minomundo so patey, tan say kanunotan a maespiritu so bilay ya andi-angaan.

40 O, inararok a kaagian, talineng yo so saray salitak. Nunot yo so inkamakapanyari na Masanto a Bugtong na Israel. Ag yo ibabaga a sinalitak so saray mairap a beñgatla ed sikayo; tan no onia so gawaen yo, sikayo so onsuknar sumpa ed katuaan; lapu ed sinalitak ed sikayo so saray salita na Manamalsa yo. Kabat ko a saray salita na katuaan so mairap sumpa ed amin a karotakan; balet saray matunong ag da takotan so saraya, lapu ed inaro ra so katuaan tan sikara so ag nagiing.

41 O sirin, inararok a kaagian, ondago kayo ed Katawan, say Masanto a Bugtong. Nunot yo a saray dalan to so matunong. Nengneng yo, say dalan na too so makisir, balet saya so akaunat ed maptek a dalan a paarap ed sikato, tan say managasikaso ed puerta say Masanto a Bugtong na Israel; tan ag to mañgikana na igagangan diman; tan angapo so arum a dalan likud ed saya a puerta; kanian sikato so ag nayari a palikdoen, lapu ed say Katawan a Dios so ñgaran to.

42 Tan siopaman so ontuktok, sikato so mañgilukas; tan say makabat, tan say marunong, tan saraman so mamayaman, a sikara so asibok lapu ed dunong da, tan saray kakabatan da, tan saray kayamanan da—on, sikara so balawen to, tan likud no ibantak da ya ipulisay so saraya a beñgatla, tan ipasen da so inkasikara a makulang-kulang ed arap na Dios, tan onakseb ira ed kaaraleman na panagpaabeba, ag to ra lukasan.

43 Balet saray beñgatla na saray makabat tan saray maalwar so niamot ed sikara ed ando la ya ando—on, saman so liket a niparaan ya onkana ed saray sasantos.

44 O, inararok a kaagian, nunot yo so saray salitak. Nia, ekalen ko so saray kawes ko, tan saraya so ipayag ko ed arapan yo; mampikasi ak ed Dios na kilalaban ko pian nengneñgen to ak ed lawas a masukisok a mata to; dia ed ontan, nakabatan yo ed kasampotan ya agew, sano okomen to so amin a too unong ed saray kimey da, a say Dios na Israel naimatonan to ya impayag ko so kaugsan yo a manlapu ed kamareruak, tan manalalagey ak a katekep na inkaliwawa ed arapan to, tan nipaliis la ed siak so saray dala yo.

45 O, inararok a kaagian, ikaindan yo la so saray kasalanan yo; iyagyag yo so saray gulonggulong na saman so maples a mamalor ed sikayo; ondago kayo ed saman so Dios a sikato so bato a dampay na kilalaban yo.

46 Iparaan yo so saray kamarerua yo ed saman so magloria ya agew sano say kaptekan so niiter ed saray matunong, anga ed say agew na panañgokom, pian ag kayo kebet-kebet ed makapakebyew a takot; pian ag yo nanunotan so saray makapataktakot a kasalanan yo ed inkayadyari, tan napilitan kayo a mañgibeliaw; Masanto, masanto so panañgokom mo, O Katawan a Dios a Makapanyari ed Amin—balet kabat ko so saray kasalanan ko; sinumlang ko so saray gangan mo, tan say impankasalanan ko so kayarian ko; tan say demonyo adakep to ak, kanian siak so adakep ed makapataktakot a kasegsegañgan to.

47 Balet nia, kaagian ko, kanepegan kasi a siak so manliing ed sikayo nipaakar ed makapakebyew a katuaan na saraya a beñgatla? Nepeg kasi ni a pairapen ko so saray kamarerua yo no dalisay so saray kanunotan yo? Siak kasi so malinew ed sikayo unong ed inkalinew na katuaan no sikayo so nabulos ed kasalanan?

48 Nengneng yo, no sikayo so masanto mansalita ak ed sikayo nipaakar ed kasantosan; balet lapu ed ag kayo masanto, tan nenengneñgen yo ak a sakey a managbañgat, dia ed ontan kanepegan a bañgatan takayo nipaakar ed pansumpalan na kasalanan.

49 Nia, say kamareruak kabusol to so kasalanan, tan say pusok magayaga ed inkamatunong; tan idayew ko so masanto a ñgaran na Dios ko.

50 Ondago kayo, kaagian ko, balang sakey a napgaan, ondago kayo ed saray danum; tan siopaman ya naandian na kuarta, dago kayo a manaliw tan mañgan; on, dago kayo a manaliw na alak tan gatas ya angapo so kuarta tan angapo so tatak na bili to.

51 Dia ed ontan, ag yo pangagastosen na kuarta so beñgatla ya andi kakanaan, odino mansagpot kayo ed ag makapenek. Deñgel kayo a siseseet ed siak, tan nunot yo so saray salitak ya imbesñgaw ko; tan ondago kayo ed say Masanto a Bugtong na Israel, tan manliket kayo ed saman so ag naderal, odino taloen na inkauges, tan abuloyan yo so kamarerua yo a manliket ed inkataba.

52 Nia, inararok a kaagian ko, nunot yo so saray salita na Dios yo; mampikasi kayo ed sikato ya andi-tonda ed agew, tan iter yo so pisasalamat ed masanto a ñgaran to ed labi. Pangayaga yo so saray puso yo.

53 Tan nengneng yo agay la so kakanaan na saray paknaan na Katawan, tan agay la so panagkawalo to ed saray anak na totoo; tan lapu ed pakapanyari to, tan say gracia tan panañgasi to, insipan to ed sikatayo a saray boleg tayo ag nayadyari a naderal, unong ed laman, balet sikara so pagnayonen to; tan dia ed saray mantumbok a kailalakan sikara so manmaliw a matunong a sañga ya onkana ed kailalakan na Israel.

54 Tan natan, kaagian ko, mansalita ak ni komon na dakel ed sikayo; balet dia la ed nabuas ituloy ko so nakekeraan ni a salitaen ko. Amen.