1 Tan natan, Jacob, mansalita ak ed sika: Sika so unaan a nianak ed saray agew na kairapan ko ed kalawakan. Tan nia, dia ed impanogaw mo nantepel ka na kairapan tan dakel ya ermen, lapu ed magasal ya ugali na saray agagim.

2 Angaman ontan, sika Jacob say unaan ya anak ko ed loob na kalawakan, kabat mo so kinabaleg na Dios; tan pasantoen to so saray intepel mo a kairapan onkana ed pankaabigan mo.

3 Dia ed ontan, say kamareruam so nabendicionan, tan sika so miayam ya angapo so kaatapan ed si agim, a si Nephi; tan saray agew mo so ondalan ya onkana ed panlingkor ed Dios mo. Dia ed ontan, kabat ko a sika so adundon, lapu ed inkamatunong na Mananundon mo; tan anengneng mo a dia ed inkagnap na panaon sikato so onsabi a mañgawit na kilalaban ed saray totoo.

4 Tan anengneng mo ed kalangweran mo so gloria to; dia ed ontan, sika so mapalar angan siñga saraman so pampuloñgan to ed laman; lapu ed say Espiritu sikato met lamlamang, karoman, natan, tan dia ed ando la ya ando. Tan say dalan niparaan a nanlapu la ed inkagapol na too, tan say kilalaban bulos.

5 Tan saray totoo malaglaem so inkabilin da pian amta da ya ibiig so maong ed mauges. Tan say gangan niiter ed saray totoo. Tan dia ed gangan angapo so laman a wala ed katunoñgan; odino, dia ed panamegley na gangan saray totoo so nataksing. On, lapu ed inkadalin a gangan sikara so ataksing; tan ontan met, unong ed maespiritu a gangan sikara so nabalang manlapu ed saray maong, tan manmaliw ira a pakaskasi ed ando la ya ando.

6 Dia ed ontan, say kadundon onsabi tan dia ed panamegley na Masanto a Mesias; lapu ed sikato so napno na gracia tan katuaan.

7 Nengneng yo, insaklang to so inkasikato a bagat ya onkana ed kasalanan, ya onebat ed saray kasampotan na gangan, onkana ed saray amin a walaan na puso a maermen tan mambabawi ya espiritu; tan angapo so angan siopaman a makaebat ed saray kasampotan na gangan.

8 Dia ed ontan, agay la a kabaleg so kakanaan na pangawa ed saraya a beñgatla dia ed pikakabat na saray manaayam ed dalin, pian nakabatan da ya angapo so laman a makapanayam ed kawalaan na Dios, no ag dia ed panamegley na kaabigan, tan panañgasi, tan gracia na Masanto a Mesias, a mañgibagat na bilay to unong ed inkalaman, tan alaen to lamet unong ed pakapanyari na Espiritu, pian nagawa so kioli ed bilay na saray inaatey, lapu ed sikato so onuna ya ombañgon.

9 Dia ed ontan, sikato so unaan a buñga ya onkana ed Dios, lapu ed sikato so onkana a manamegley ed saray amin ya anak na saray totoo; tan siopaman a manisia ed sikato so nilaban.

10 Tan lapu ed panamegley to ed amin, amin a totoo so ondago ed Dios; dia ed ontan, sikara so ontalindeg ed arapan to, pian sikara so okomen to unong ed katuaan tan inkasanto a wala ed sikato. Dia ed ontan, saray sampot na gangan ya initer na Masanto a Bugtong, nipaakar ed kagawa na dusa a nitekep, a saya a dusa ya akatekep so sumlang ed saman so liket a nitekep, pian saya so onebat ed saray sampot na bagat na pamaandi na kasalanan—

11 Tan peteg a nakaukolan, a wala so sumlang ed amin a beñgatla. No andi, unaan ya anak ko ed kalawakan, say inkamatunong ag nayari a nagawa, ni say karelmeñgan, ni say inkasanto odino kasegsegang, ni say maong odino mauges. Dia ed ontan, amin a beñgatla nakaukolan a manlauk a siñga saksakey; dia ed ontan, no saya so manmaliw a saksakey a laman nakaukolan a mansiansia ya inatey, ya angapo so bilay ni say patey, ni say kabulok odino say ag-kabulok, liket odino segsegang, ni say makalikna odino kaandian na liknaan;

12 Dia ed ontan, saya so kaukolan a napalsa ed sakey a beñgatla ya andi-kana; dia ed ontan angapo so getma na pansumpalan na inkapalsa to. Dia ed ontan, saya a beñgatla nakaukolan a deralen to so kakabatan na Dios tan saray andi-angaan a gagala to, tan ontan met ed pakapanyari, tan say panañgasi, tan say kaptekan na Dios.

13 Tan no ibagam ya angapo so gangan, ibagam met ya angapo so kasalanan. No ibagam ya angapo so kasalanan, ibagam met ya angapo so inkamatunong. Tan no angapo so inkamatunong angapo so liket. Tan no angapo so inkamatunong odino liket angapo so dusa ni say segsegang. Tan no onia so saraya a beñgatla angapo so Dios. Tan no angapo so Dios angapo tayo, ni say dalin; lapu ed angapo so apalsa a beñgatla, ni say mangawa odino gawaen; dia ed ontan, amin a beñgatla so naandi.

14 Tan natan, anak ko a lalaki, salitaen ko so saraya a beñgatla ya onkana ed pankaabigan tan pakaaral yo; lapu ed wala so Dios, tan pinalsa to so amin a beñgatla, mandapag a saray tawen tan say dalin, tan amin a beñgatla a lugan to, mandapag a beñgatla a mangawa tan saray beñgatla a gawaen.

15 Tan pian iparungtal so saray andi-angaan a gagala to dia ed kasampotan na too, kayari to a pinalsa so saray unaan ya ateng tayo, tan saray ayep ed uma tan saray manok ed liwang, tan dia ed antikey a salita, amin a beñgatla a pinalsa, nakaukolan a wala so sumlang; angan say nisebel a buñga so sumlang ed kiew na bilay; say sakey masamit tan say sananey so ampait.

16 Dia ed ontan, say Katawan a Dios initer to ed too pian ongalaw ed inkasikato a dili. Dia ed ontan, say too ag to nayarian so mangawa na nipaakar ed inkasikato likud no sikato so natanguyor na sakey odino say sananey.

17 Tan siak, Lehi, unong ed saray beñgatla ya abasak, nakaukolan ko ya ipasen a sakey ya angel na Dios, unong ed saman so nisulat, so naplag a nanlapu ed tawen; dia ed ontan, sikato so nanmaliw a demonyo, tan nampilalekan to so mauges ed arapan na Dios.

18 Tan lapu ed sikato so naplag a nanlapu ed tawen, tan sikato so nanmaliw a pakaskasi ed ando la ya ando, inanap to met so panmaliw a pakaskasi na amin a katooan. Dia ed ontan, inkuan to ed si Eva, on, angan saman lamlamang so matakken ya oleg, a sikato so demonyo, a sikato so ama na amin a tila, dia ed ontan inkuan to: Mañgan ka ed saya a nisebel a buñga, tan sika so ag ompatey, balet manmaliw ka a siñga Dios, nakabatan mo so maong tan mauges.

19 Tan kayari ya añgan si Adan tan si Eva ed nisebel a buñga sikara so adagdag a papaway ed tanamanan na Eden, pian bokalkalen da so dalin.

20 Tan sikara so nanilalak; on, angan say boleg na amin a dalin.

21 Tan saray agew na saray anak na totoo so aparukey, unong ed linawa na Dios, pian mambabawi ra legan a wala ra ed laman; dia ed ontan, say kipapasen da nanmaliw a kipapasen na panagsubok, tan say panaon da so aparukey, unong ed saray gangan ya initer na Katawan a Dios ed saray anak na totoo. Tan initer to so gangan ya amin a too so kaukolan a mambabawi; lapu ed impanengneng to ed amin a too a sikara so abalang, lapu ed impankasalanan na saray ateng da.

22 Tan natan, nia, no si Adan ag akapankasalanan ag nigapol, balet sikato komon so nansiansia a nanayam ed tanamanan na Eden. Tan amin a beñgatla a pinalsa so nansiansia komon ed gendat a kipapasen da unong ed gapo na inkapalsa ra; tan sikara komon so nansiansia ya ando la ya ando, tan angapo so kasampotan.

23 Tan sikara so ag awalaan komon na saray anak; dia ed ontan sikara komon so nansiansia ed kipapasen ya angapo so pikakabat, angapo so gayaga, lapu ed ag da akabatan so segsegang; angapo so gagawaen da a maong, lapu ed ag da kabat so kasalanan.

24 Balet nia, amin a beñgatla so agawa unong ed kakabatan na saman so makapikabat na amin a beñgatla.

25 Si Adan nigapol pian saray totoo narapat da so kaplesan a pasen da; tan saray totoo onia ra, pian sikara so nawalaan na gayaga.

26 Tan say Mesias onsabi ed inkagnap na panaon, pian dundonen to so saray anak na totoo ed inkigapol. Tan lapu ed sikara so adundon ed inkigapol nanmaliw ira a bulos ed ando la ya ando, a sikakabat ed maong tan mauges; a gawaen da so labay da ed inkasikara a dili tan aliwa a sikara so ganganen ed gawaen da, likud lambeñgat ed dusa unong ed gangan dia ed baleg tan sampot ya agew, unong ed saray gangan ya initer na Dios.

27 Dia ed ontan, saray totoo bulos ira unong ed laman; tan amin a beñgatla so niiter ed sikara unong ed pankaabigan na too. Tan sikara so bulos a mampili na kawayañgan tan andi-angaan a bilay, dia ed baleg a Manamegley na saray totoo, odino mampili ed inkadakep tan patey, unong ed inkadakep tan pakapanyari na demonyo; lapu ed pampilpilalekan to a say amin a too manmaliw a pakaskasi a siñga sikato.

28 Tan natan, anak ko a lalaki, pirawat ko ya onnengneng kayo ed makapanyari a Manamegley, tan ondeñgel kayo ed saray ankabaleg a gangan to; tan sikayo komon so matuor ed saray salita to, tan pilien yo so andi-angaan a bilay, unong ed linawa na Masanto ya Espiritu to;

29 Tan ag yo pilien so andi-angaan a patey, unong ed kaliktan na laman tan kaugsan a wala ed saya, a mañgiter na pakapanyari ed espiritu na demonyo a manakep, a mañgiguyor ed sikayo ed infierno, pian sikato so mañgoley ed sikayo ed dili a panarian to.

30 Asalitak ed sikayo so saray pigara a salita ya onkana ed sikayo ya amin, anak ko a lalaki, ed saray kaunoran ya agew ko ed subok; tan pinilik so saray maong a biang, unong ed sinalita na saray profeta. Tan angapo so arum a gagalak likud ed andi-angaan a pankaabigan na saray kamarerua yo. Amen.