1 Tan natan, siak, Nephi, mansalita ak nipaakar ed saray profesiya a sinalita nen amak, nipaakar ed si Jose, a sikato so niakar ed Egipto.

2 Tan nengneng yo, peteg a sikato so namprofesiya nipaakar ed amin a boleg to. Tan saray profesiya ya insulat to, angapo so babaleg ya ontaluna. Tan improfesiya to so nipaakar ed sikami, tan saray mantumbok a kailalakan mi; tan saraya so nisulat ed piligo a gansa.

3 Dia ed onia, kayari a sinampotan nen amak so nansalita nipaakar ed saray profesiya nen Jose, tinawag to so saray anak nen Laman, saray anak to a lalaki, tan saray anak to a bibii, tan inkuan to ed sikara: Nengneng yo, anak ko a lalaki, tan anak ko a bibii, a sikayo a lalaki ya anak tan bibii ya anak na unaan ya anak ko, pilalek ko a deñgelen yo so saray salitak.

4 Lapu ed say Katawan a Dios inkuan to: Unong a sumpalen yo so saray gangan ko, sikayo so ombulaslas ed saya a dalin; tan unong ya ag yo onoren so saray gangan ko sikayo so nisian ed arapan ko.

5 Balet nia, lalaki ya anak ko tan bibii ya anak ko, ag ko nayarian so onlasur ed lubok ko likud no itilak ko ed sikayo so bendicion ko; tan nia, kabat ko no ombaleg kayo ed nepeg a laen yo ag kayo onarawi ed saya.

6 Dia ed ontan, no sikayo so naayew, nia, itilak ko so bendicion ko ed sikayo, pian say inkaayew yo so nayari a naekal ed sikayo tan saya so ebatan ed saray ulo na saray atateng yo.

7 Dia ed ontan, lapu ed bendicion ko say Katawan a Dios ag to nitepel a nabalang kayo; dia ed ontan, sikato so mapañgasi ed sikayo tan dia ed saray boleg yo ed ando la ya ando.

8 Tan agawa a kayari impansampot na impansalita nen amak ed saray lalaki ya anak tan bibii ya anak nen Laman, kinaukolan to a saray lalaki ya anak tan bibii ya anak nen Lemuel so naawit ed arapan to.

9 Tan sikato so nansalita ed sikara, a nankuan: Nengneng yo, lalaki ya anak ko tan bibii ya anak ko, a lalaki ya anak tan bibii ya anak na komadua a laki ya anak ko; nia itilak ko ed sikayo so mipara a bendicion ya intilak ko ed saray lalaki ya anak tan bibii ya anak nen Laman; Dia ed ontan, sikayo so ag nasigpot a naderal; balet dia ed kasampotan saray boleg yo so nabendicionan.

10 Tan agawa nen kayari a nansalita si amak ed sikara, nia, nansalita ed saray lalaki ya anak nen Ishmael, on, anga ed saray kabobung to.

11 Tan dia ed kayari a sinampotan so impansalita to ed sikara, nansalita ed kinen Sam, a nankuan: Mapalar ka, tan saray boleg mo; lapu ed tawiren mo so dalin a siñga si agim a Nephi. Tan saray boleg mo so nibilang ed boleg to; tan sika so miolibay ed si agim a laki, tan say boleg mo so miolibay met ed boleg to; tan sikayo so napapalar ed amin ya agew yo.

12 Tan agawa a kayari a si amak, Lehi, so nansalita ed amin a kabobung to, unong ed liknaan na dili a puso to tan unong met ed Espiritu na Katawan a wala ed sikato, sikato la so tinmakken. Tan agawa a sikato so inatey, tan impumpon.

13 Tan agawa ya aliwa a dakel ya agew kayari na impatey to, si Laman tan si Lemuel tan saray lalaki ya anak nen Ishmael so nampasnok ira ed siak niseseñgeg ed bilin na Katawan.

14 Tan siak, Nephi, apilit ak a nansalita ed sikara, unong ed salita to; tan nansalita ak na dakel a beñgatla ed sikara, tan ontan met nen amak, kasakbayan na impatey to; dakel ed saraya a salita so nitatak ed saray sananey a piligok; lapu ed dakel so kabiañgan na awaran a nisulat ed saray sananey a piligok.

15 Tan dia ed saray tapew to nia itatak ko so saray beñgatla a pilalek na kamareruak, tan dakel ni ed saray masanto a kasulatan a nitatak ed saray piligo a gansa. Tan say kamareruak manliket ed saray masanto a kasulatan, tan say pusok sinonunot ed saraya, tan saraya so insulat ko a pakaaralan tan pakagungonaan na saray anak ko.

16 Nengneng yo, say kamareruak manliket ed saray beñgatla nipaakar ed Katawan; tan say pusok sinonunot ya andi-tonda ed saray beñgatla ya anengneng tan nadñgel ko.

17 Manwari ya ontan, angaman dia ed sankabalegan a kaabigan na Katawan, ed impañgipanengneng to ed siak na saray baleg tan makapakelaw a kimey to, say pusok nandaydayew: O masegsegang a too a saya so kipapasen ko! On, say pusok maermen lapu ed laman ko; say kamareruak napno na dageyem lapu ed saray kaugesan ko.

18 Siak so abalang, lapu ed saray tukso tan saray kasalanan a saraya so mainomay a mangonigon ed siak.

19 Tan sano pampilaleken ko so mangayaga, say pusok managlem lapu ed saray kasalanan ko; manwari ya ontan, kabat ko no siopa so nanmatalekan ko.

20 Say Dios ko sikato so tinmulong ed siak; intabin to ak ed saray segsegang ko ed kalawakan; tan siak so iniagel to ed saray danum na baleg a kaaraleman.

21 Pinano to ak na panañgaro to, anga ed kaupot na laman ko.

22 Kinewkew to so saray kabusol ko, anga ed sikara so akaseñgeg ya ongiwgiw ed arapan ko.

23 Nia, dineñgel to so kerew ko ed agew, tan initer to ed siak so kakabatan dia ed panamegley na payawar ed panaon na labi.

24 Tan dia ed agew lalo ak a sinmibeg ed baleg a pikakasik ed arapan to; on, say voces ko inkelyaw ko ed tagey; tan saray angeles so linmasor tan nantalima ed siak.

25 Tan dia ed payak na Espiritu to say laman ko niakar ed arawi ed mapalalo ya atagey a palandey. Tan saray matak a dili so akanengneng na ankakabaleg a beñgatla, on, mapalalo a baleg a tuloy ed sakey a too; dia ed ontan nigangan ed siak ya ag ko isulat so saraya.

26 O sirin, no anengneng ko so saraya a baleg a beñgatla, no say Katawan lapu ed panagkawalo to ed saray anak na totoo dinalaw to so saray totoo ed ontan a kinabaleg na panañgasi, akin say pusok so manakis tan say kamareruak manayam ed patar na kaermenan, tan say laman ko so nadarak ya andi-kakanaan, tan say biskeg ko so onkapoy, makaseñgeg ed saray kairapan ko?

27 Tan akin ya ontolok ak ed kasalanan, lapu ed laman ko a makapoy? On, akin ya iter ko so dalan ed tukso, pian saman so sakey a mauges so nawalaan na pasen ed pusok pian deralen to so kareenan ko tan panliknaen to so kamareruak? Akin mampasnok ak makaseñgeg ed kabusol ko?

28 Bañgon ka, kamareruak! Ag ka la ontetewek ed kasalanan. Mangayaga ka, O pusok, tan ag mo la iiter so pasen ed kabusol na kamareruak.

29 Ag ka la mampapasnok lamet lapu ed saray kabusol ko. Ag mo tatantanan so biskeg ko lapu ed saray kairapan ko.

30 Mangayaga ka, O pusok, tan iyakis mo ed Katawan, tan ikuan mo: O Katawan, sika so idaydayew ko ed ando la ya ando; on, say kamareruak so mangayaga ed sika, Dios ko, tan bato a dampay na kilalaban ko.

31 O Katawan, ag mo dundonen so kamareruak? Ag mo ak kasi ilaban ed lima na saray kabusol ko? Ag mo ak kasi gawaen ya ongiwgiw ed bekta a kiwala na kasalanan?

32 Komon saray puerta na infierno so andi-tonda a nakapotan ed arapan ko, makaseñgeg say pusok so maermen tan say espirituk so mambabawi! O Katawan, ag mo pa ikakapot so saray puerta na inkamatunong mo ed arapan ko, pian mankurang ak ed dalan na abeba a patar, pian maptek ak ed malinis a dalan!

33 O Katawan, balkot mo ak na kolibemben na inkamatunong mo! O Katawan, igawaan mo ak na dalan a mañgipaliis ed saray kabusol ko! Gawam pa Katawan so dalan ko a maptek ed arapen ko! Ag ka pa mañgipasen na katiloran ed dalan ko—balet linisan mo so dalan ko ed arapen ko tan ag mo pa aalaren so dalan ko, no ag saray dalan na kabusol ko.

34 O Katawan, wala ed sika so talek ko, tan sika so panmatalekan ko ed ando la ya ando. Ag ko iter so talek ko ed taklay na laman; lapu ed kabat ko a naayew so siopaman ya iter to so talek to ed taklay na laman. On, naayew so siopaman ya iter to so talek to ed too, odino gawaen to a laman so taklay to.

35 On, kabat ko a say Dios, iter to a mabunlok ed saman so onkerew. On, say Dios ko iter to ed siak, no onkerew ak na ag-aliwa; dia ed ontan, ikelyaw ko so voces ko ed sika, on, siak so onnañgis ed sika, Dios ko, say bato a dampay na inkamatunong ko. Nia, say voces ko onsegep ed sika ed ando la ya la ando, sika so bato a dampay ko tan andi-angaan a Dios ko. Amen.