Say Komadua a Libro nen Nephi

1 Tan natan agawa a kayari a siak, Nephi, intondak la so pambabañgat ed saray agagik, si ama mi, Lehi, nansalita met na dakel a beñgatla ed sikara, tan inulit to ed sikara, no panon kabaleg a beñgatla so ginawa na Katawan ed sikara ed impañgipaway to ed sikara ed dalin na Jerusalem.

2 Tan sikato so nansalita ed sikara nipaakar ed saray impanalsa da nen wala ni ra ed danum, tan saray panañgasi na Dios ed impañgiligyas to ed bilay da, kanian ag ira naakmon ed dayat.

3 Tan sikato so nansalita met ed sikara nipaakar ed dalin na sipan, a saya so agamoran da—no panon so panañgasi na Katawan ed impañgipasakbay to ya ontaynan kami ed dalin na Jerusalem.

4 Makaseñgeg, nia, inkuan to, siak so akanengneng na payawar, a dia ed saya kabat ko a say Jerusalem so aderal; tan no nansiansia tayo ed Jerusalem pati sikatayo met so inatey.

5 Balet, inkuan to, manwari ya ontan so saray irap tayo, agamoran tayo so dalin na sipan, sakey a dalin ya apili-pili ed saray arum a dalin; sakey a dalin a say Katawan a Dios insipan to ed siak a saya so tawiren na saray boleg ko. On, say Katawan insipan to ed siak so saya a dalin, tan dia ed saray anak ko ya anga ed anga, tan ontan met ed amin na saraman so nitunton manlapu ed arum a bansa dia ed panamegley na lima na Katawan.

6 Dia ed ontan, siak, Lehi, mamprofesiya ak unong ed kimey na Espiritu a wala ed siak, ya angapo so siopaman ya onsabi ed saya a dalin likud no sikara so naawit dia ed panamegley na lima na Katawan.

7 Dia ed ontan, saya a dalin so pinasanto to ed saraman so awiten to dia. Tan sano nagawa a no sikara so manlingkor ed sikato unong ed saray gangan ya initer to, saya so sakey a dalin na kawayañgan ed sikara; dia ed ontan, sikara kapiganman ag naawit ed inkadakep; tan no ontan, saya so lapu ed kaugsan, tan no say kaugesan so ondakel naayew so dalin makaseñgeg ed sikara, balet dia ed saray matunong saya so nabendicionan ed ando la ya ando.

8 Tan nia, sakey a kakabatan a saya a dalin so niamot ni ed pikakabat na saray arum a bansa; tan nengneng yo, dakel a bansa so manlalaglagan ed saya a dalin, kanian angapo so nakeraan a pasen ya onkana a tawiren.

9 Dia ed onia, siak, Lehi, agamoran ko so sipan, unong a saraman so awiten na Katawan a Dios manlapu ed dalin na Jerusalem onoren da so saray gangan to, sikara so onaliguas ed tapew na saya a dalin; tan sikara so niamot ed saray arum a bansa, pian sikara so mankayarian ed saya a dalin onkana ed inkasikara. Tan no sumpalen da so saray gangan to sikara so napapalar dia ed saya a tapew na dalin, tan angapo so manigen-sigen ed sikara, odino manamsam ed dalin a tawir da; tan sikara so manayam a maligen ed ando la ya ando.

10 Balet nengneng yo, sano onsabi so panaon ya onlasay ira ed ag-pananisia, kayari impakaawat da na ontan la a kabaleg a bendicion a nanlapu ed lima na Katawan—ya awalaan ira na pikakabat nipaakar ed inkapalsa na dalin, tan amin a totoo, a nakabatan da so baleg tan makapakelaw a kimey na Katawan manlapu ed inkapalsa na mundo; ya awalaan ira na pakapanyari a niiter ed sikara ed pakagawa na amin a beñgatla lapu ed pananisia; a wala ed sikara so amin a gangan nanlapu ed gapo, tan naawit ira ed panamegley na andi-angaan a kaabigan ed saya ya apili-pili a dalin na sipan—nia, ikuan ko, sano say agew onsabi ya ipulisay da so Masanto a Bugtong na Israel, say tua a Mesias, a Mananundon da tan Dios da, nia, say panañgokom na saman a matunong so onteen ed sikara.

11 On, awiten to so saray arum a bansa ed sikara, tan iter to ed saraya so pakapanyari, tan ekalen to ed sikara so saray dalin a kayarian da, tan gawaen to a sikara so nitaytayak tan nabakbak.

12 On, unong a sakey a kailalakan so onlabas ed sananey wala so onterter a dala, tan baleg a dalaw ed limog da; dia ed ontan, anak ko a lalaki, pirawat ko a nunoten yo; on, pilalek ko a deñgelen yo so saray salitak.

13 O sikayo komon so naliing; naliing ed malet ya ugip, on, angan say ugip ed infierno, tan iyagyag yo so makapataktakot a gulonggulong a saya so amalor ed sikayo, a saraya so gulonggulong ya amalor ed saray anak na totoo, kanian sikara so naawit ed pasen na inkadakep ed kaaraleman na andi-angaan a segsegang tan kaermenan.

14 Liing kayo! tan ombañgon kayo a manlapu ed sapok, tan deñgel yo so saray salita na mangiwgiw ya ateng, a saray sali to ñgalñgali la niparukol ed ambetel tan mareen a lubok, no iner siopaman a managbaroy ag la makapawil; pigara ni ya agew onla ak la ed dalan na amin a dalin.

15 Balet nia, say Katawan dinundon to so kamareruak ed infierno; anengneng ko so gloria to, tan siak so aliktob ed andi-angaan a taklay na aro to.

16 Tan pilalek ko a nunoten yo a sumpalen so saray pananontunan tan say panañgokom na Katawan; nia, saya so kapagaan na kamareruak nanlapu la ed gapo.

17 Say pusok abelatan ed ermen nanlapu la ed sakey a panaon anga ed sananey, lapu ed mapaga ak, ag la piga lapu ed awet na saray puso yo say Katawan a Dios yo onsabi ed naspot a pasnok to ed sikayo, pian sikayo so nataksing tan naderal ed ando la ya ando.

18 Odino, onsabi ed sikayo so ayew ed loob na dakel a kailalakan; tan sikayo so nadalaw dia ed panamegley na espada, tan eras, tan sikayo so nabusol, tan sikayo so nitunton unong ed linawa tan inkadakep na demonyo.

19 O anak ko a lalaki, pilalek ko a saraya a beñgatla ag onsabi ed sikayo, no ag iñgen manmaliw kayo a sakey ya apili tan sakey a totoo a pinabli na Katawan. Balet nia, say linawa to so nasumpal; lapu ed say dalan to so inkamatunong ed ando la ya ando.

20 Tan inkuan to ya: Unong no onoren yo so saray gangan ko sikayo so onaliguas ed saya a dalin; balet no ag yo onoren so saray gangan ko sikayo so nataksing ed arapan ko.

21 Tan natan pian say kamareruak wala komon so gayaga to ed sikayo, tan pian say pusok ontaynan ed saya a mundo a maliket lapu ed sikayo, ya ag ak komon iparukol ed sinagem tan ermen ed dalem na lubok, alagey kayo manlapu ed sapok, anak ko a lalaki, tan manmaliw kayo a lalaki, tan pabiskeg yo so linawa yo ed saksakey a kanunotan tan saksakey a puso, nankakasakey ed amin a beñgatla, pian ag kayo niakar ed inkadakep;

22 Pian ag kayo naayew na ansakit ya ayew; tan ontan met, pian ag kayo makagawa na ag-kapakna na maptek a Dios ed sikayo, nipaakar ed kadederal, on, say andi-angaan a kadederal na kamarerua tan say laman.

23 Liing kayo, anak ko a lalaki; isulong yo so kirlong na inkamatunong. Iyagyag yo so gulonggulong ya amalor ed sikayo, tan paway kayo ed kipapasen ya ag-kabkabat, tan onalagey kayo manlapu ed sapok.

24 Ag kayo la onaalsa sumpa ed agi yo a laki, lapu ed saray kanunotan to so magloria, tan sikato so manusumpal ed saray gangan nanlapu la ed panaon a tinmaynan tayo ed Jerusalem; tan sikato so sakey ya ikakana ed lima na Dios, ed inkiakar tayo dia ed saya a dalin na sipan; no ag lapu ed sikato, sikatayo so inatey la ya amin ed eras dia ed kalawakan; angaman ontan, nampilalekan yo ya ekalen so bilay to; on, tan sikato so nanlikna na mapalalo ya ermen lapu ed sikayo.

25 Tan mapalalo so pagak tan pangiwgiw ko lapu ed sikayo, ompano manirap lamet; tan nia, sikato so pinalsaan yo a nampilalekan to so pakapanyari tan panañgoley ed sikayo; balet kabat ko ya ag to nampilalekan so pakapanyari ni say panañgoley ed sikayo, balet, nampilalek ed gloria na Dios, tan say andi-angaan a pankaabigan yo.

26 Tan sikayo so nanñguroñguro lapu ed sikato so maparungtal ed sikayo. Inkuan yo a sikato so añgikana na makdem a panagsalita; inkuan yo a wala so pasnok to ed sikayo; balet nia, say inkamakdem to saya so inkamakdem na pakapanyari na salita na Dios, a wala ed sikato; tan say tatawagen yo a pasnok saya so katuaan, unong a wala ed Dios, ya ag to nayari ya itepel, lapu ed mabakat ya impañgipanengneng to ed saray inkauges yo.

27 Tan peteg a nakaukolan a say pakapanyari na Dios so wala ed sikato, angan say impañgigangan to ed sikayo a kaukolan yo so ononor. Balet nengneng yo, aliwa a sikato, no ag iñgen say Espiritu na Katawan a wala ed sikato, so añgilokas na sañgi to kanian akapambesñgaw ya ag to nayari ya ikupit.

28 Tan natan anak ko a laki, Laman, tan ontan met ed sika Lemuel tan Sam, tan ontan met ed saray lalaki ya anak ko a sikara so lalaki ya anak nen Ishmael, nia, no deñgelen yo so voces nen Nephi ag kayo nabalang. Tan no sikato so deñgelen yo itilak ko ed sikayo so sakey a bendicion, on, angan say unaan a bendicion ko.

29 Balet no sikayo so ag ondeñgel ed sikato ekalen ko so inmuna a bendicionan ko, on angan say bendicion ko, tan saya so iter ko ed sikato.

30 Tan natan, Zoram, mansalita ak ed sika: Nengneng mo, sika so igagangan nen Laban; angaman ontan, sika so nipaway ed dalin na Jerusalem, tan kabat ko a sika so tua a kaaro na saya so anak ko, si Nephi, ed ando la ya ando.

31 Dia ed ontan, makaseñgeg a sika so matuor saray boleg mo so nabendicionan kaiba na saray boleg to, pian manayam ira a maaliguas ed andukey a panaon ed tapew ed saya a dalin; tan angapo, likud no say inkauges ed limog yo, so manderal odino manigen-sigen ed aliguas yo ed tapew na saya a dalin ed ando la ya ando.

32 Dia ed ontan, no sumpalen yo so gangan na Katawan, say Katawan pasantoen to so saya a dalin ya onkana a kiagelan na saray boleg yo a kaiba na boleg na anak ko a laki.