1 Tan wala so ompaway a baston a manlapu ed pugnel nen Jesse, tan sakey a sañga ya ontubo a manlapu ed saray lamut to.

2 Tan say Espiritu na Katawan manayam ed sikato, say espiritu na karonuñgan tan pakatalus, say espiritu na panagsimbawa tan pakayari, say espiritu na kakabatan tan takot ed Katawan;

3 Tan gawaen to a masiglat ed pakatalus nipaakar ed takot ed Katawan; tan ag to mañgokom lapu ed pakanengneng na saray mata to, ni say mampasnok lapu ed pakadñgel na saray layag to.

4 Balet dia ed panamegley na inkamatunong okomen to so saray duka; tan mampasnok a sinimbang ed saray maoyamo na dalin; tan bakbaken to so dalin na baston na sañgi to, tan dia ed panamegley na sibok na saray bibil to pateyen to so saray marelmeng.

5 Tan say inkamatunong so balkes na saray banel to, tan say katuoran so balkes na saray awak to.

6 Say lubo so miayam ed saray kilaw a karnero, tan say leopardo so midukol ed kilaw a kanding, tan say kilaw a baka tan say malangwer a leon man-iba ed kabkaban; tan say melag ya ogaw so mampastol ed sikara.

7 Tan say baka tan say oso man-iba ra a mankabkab; saray kilaw da so maniiba ya ondukol; tan say leon, dayami so kanen to a siñga baka.

8 Tan say mansuso ya ogaw mangalaw ed abot na saray kamuntok, tan say apakso ya ogaw iyan to so lima to ed balaong na tadioco.

9 Ag ira mankabil odino manderal ed amin na saray masanto a palandey ko, lapu ed say dalin so napano na pikakabat ed Katawan, a siñga say danum a laknaban to so dayat.

10 Tan dia ed saman ya agew wala so sakey a lamut nen Jesse, a saya so onalagey a sakey a pakabirbiran na saray totoo; a dia ed saya so anapen na saray Gentiles, tan say painawa to so magloria.

11 Tan nagawa ed saman ya agew say Katawan ipasen to lamet so lima to ed komadua a panaon pian bawien to so nakdaan ed saray totoo to a sikara so natilak, a manlapu ed Asiria, tan manlapu ed Egipto, tan manlapu ed Patros, tan manlapu ed Kush, tan manlapu ed Elam, tan manlapu ed Sinar, tan manlapu ed Hamat, tan manlapu ed saray pulo na dayat.

12 Tan mañgipatalindeg na sakey a pakabirbiran ya onkana ed saray bansa, tan tiponen to so saray impulisay na Israel, tan tiponen to so saray imbuboyak na Juda a manlapu ed saray apatira a sukong na dalin.

13 Say ibeg nen Efraim met so ontaynan, tan saray kabusol na Juda so nataksing; si Efraim ag la onibeg ed Juda, tan say Juda ag to la guloen so Efraim.

14 Balet sikara so ondugpa a manlapu ed palandey a kawalaan na saray Filisteo a mampaarap ed sagur; tulisanen da so saray wala ed bokig a mantitipon; iyan da so lima da ed tapew na Edom tan Moab; tan saray anak nen Ammon so ontoluk.

15 Tan say Katawan sigpot a deralen to so dila na dayat na Egipto; tan dia ed panamegley na mabiskeg a dagem to pagalawen to so lima to ed tapew na ilog, tan saya so bakbaken to ed pitora a kolos, tan gawaen to a saray totoo so manakar ed ekat.

16 Tan wala so maawang a karsada ya onkana ed saray nakdaan a totoo to a natilak, manlapu ed Asiria, a siñga nen saman ed Israel dia ed agew sanen sikato so pinmaway ed dalin na Egipto.