1 Abagey so saray manañgipaakseb na saray aliwa a matunong a gangan, tan saray managsulat na makapaermen ya impaakseb da;

2 Ya ag da derleñgen so saray mankaukolan na kaokom, tan ekalen da so pankatunoñgan na saray duka ed saray totook, pian saray bibii a balo so degkeman da, tan sikara so mantakew ed saray ulila ed ama!

3 Tan anto so gawaen yo ed agew na kadodusa, tan kabokbukoran ya onsabi a manlapu ed arawi? siopa so laen yo a batikan a kerewan na tulong? tan iner so pañgitilakan yo ed saray gloria yo?

4 No angapo ak sikara so ontewek ed saray nipañgaw, tan sikara so napelag ed saray pinapatey. Lapu ed saraya ya amin say pasnok to ag onarawi, balet say lima to siansia ni ya akaunat.

5 O sikayo ya Asirio, say baston na pasnok ko tan say tayukor a wala ed lima da so gapo na sanok da.

6 Sikato so ibakik ya onsumpa ed sakey a mapakunwari a bansa, tan sumpa ed saray totoo a kawalaan na sanok ko pian iter ko ed sikato so susumpalen ya alaen to so saray asamsam, tan alaen to so saray adakep tan gatin-gatinan to ra a siñga pitek ed saray karsada.

7 Akin ya aliwa ya onia so talus to, ni say puso to onia so kanunotan to; balet dia ed otel na puso to labay to a deralen tan taksiñgen so bansa ya aliwa a pigpigara.

8 Tan inkuan to: Ag kasi saray prinsipe k sikara met lamlamang so arari?

9 Aliwa kasi a say Calno so Carkemis? Aliwa kasi a say Hamat so Arpad? Aliwa kasi a say Samaria so Damasco?

10 Unong a say limak impatalindeg to so saray panarian na saray talintao, tan saray pinanday a talintao sikara so tinmaluna ed Jerusalem tan Samaria;

11 Ag ko kasi gawaen, so unong ed ginawak ed Samaria tan saray talintao to, ya ontan met so gawaen ko ed Jerusalem tan saray talintao to?

12 Dia ed onia nagawa sano say Katawan so asumpal to la ya amin so kimey to ed Palandey na Sion tan Jerusalem, dusaen ko so buñga na mataba a puso na ari na Asiria, tan say gloria ed indeñgan to.

13 Tan inkuan to: Dia ed panamegley na biskeg na limak tan say kakabatan ko ginawak so saraya a beñgatla; lapu ed maalwar ak, tan inekal ko so pankeketegan na saray totoo, tan tinakew ko so saray kayamanan da, tan pinaabebak so saray manaayam a siñga mabayani a too;

14 Tan say limak arumog to siñga ubong so say kayamanan na saray totoo, tan unong a say sakey tiponen to so iknol ya atilak tinipon ko ya amin so dalin; tan angapo so siopaman a makagalaw na payak, odino mañgilukas na sañgi, odino makauni.

15 Mampasirayew kasi so sakey a wasay ed inkasikato a dili sumpa ed managwasay? Mambalegbalegan kasi so lagari ed inkasikato sumpa ed mañgigagalaw ed sikato? Siñga say sakey a baston so igalaw to so inkasikato sumpa ed mañgitatagey ed sikato, odino say sakey a tayukor itagey to so inkasikato a dili a siñga aliwa a kiew!

16 Dia ed ontan say Katawan, say Katawan na saray Ejercito, ibaki to ed limog na saray matataba, so inkaebeng; tan dia ed leksab na gloria to selselan to so sakey a dalang a siñga dalang na sakey ya apoy.

17 Tan say silew na Israel so onkana a sakey ya apoy, tan say Masanto a Bugtong to onkana a sakey a dalang, tan ompool tan upoten to so saray sabit to tan saray dika ed loob na sanagew;

18 Tan upoten to so gloria na kakiewan to, tan say mabuñga a kaalugan to, mandapag a kamarerua tan laman; tan nagawa a siñga sanen say managawit na laylay so naandian na liknaan.

19 Tan say nakeraan ed saray kakiewan na takel to so pigpigara, a say sakey ya ogaw isulat to so saraya.

20 Tan nagawa ed saman ya agew, a saray nakdaan ed Israel, tan saray akabatik a nanlapu ed kailalakan nen Jacob, ag la ra lamet ontolok ed saman so amakbak ed sikara, balet ontolok ira ed Katawan, say Masanto a Bugtong na Israel, dia ed katuaan.

21 Saray nakdaan so ompawil, on, angan saray nakdaan nen Jacob, anga ed makapanyari a Dios.

22 Tan angaman saray totoom Israel so siñga buer ed dayat, iñgen say kera ed sikara so ompawil; say kaupot a nigangan so onlipua katekep na inkamatunong.

23 Tan say Katawan a Dios na saray Ejercito so nannunot na kaderal, na angan amin a dalin.

24 Dia ed ontan, onia so inkuan na Katawan a Dios na saray Ejercito: O sikayo a totook a manaayam ed Sion, ag kayo ontatakot ed saray Asirio; sikato so mamakbak ed sikayo ed panamegley na baston, tan itagey to so tayukor sumpa ed sikayo a siñga miolibay ed Egipto.

25 Tan iñgen dia ed magano a bekta, tan say sanok ko so ontonda, tan say pasnok ko ed kaderal da.

26 Tan say Katawan na saray Ejercito kewkewen to a pagalawen so sakey a panamairap onkana ed sikato unong ed impampatey ed Midian diman ed bato na Oreb, tan unong a say baston to so wala ed dayat ontan met itagey to a siñga miolibay ed Egipto.

27 Tan nagawa ed saman ya agew a say belat na sasakbaten naekal a manlapu ed takeb mo, tan say pako naekal ed teñger mo, tan say pako so naderal lapu ed sika so alanaan.

28 Sikato so sinmabi ed Ayat, sikato so nipalima ed Migron; dia ed Micmas tinipon to so saray karwahe to.

29 Sikara so akabaliksat la ed dalan; tan diman la ra inmugip ed Geba, si Rama antakot; si Geba na Saul, so tinmaynan.

30 Ikelyaw mo so voces, O bii ya anak na Gallim; paulyan mo a nareñgel ed Lais, O duka ya Anathoth.

31 Si Madmena so apaalis, saray manaayam ed Gebim tinipon da so inkasikara ya ontaynan.

32 Iñgen sikato ni so mansiansia ed Nob ed saman ya agew; yegyegen to so lima to sumpa ed palandey na sakey a bii ya anak na Sion, say pukdol na Jerusalem.

33 Nengneng yo, say Katawan, say Katawan na saray Ejercito lakanaten to so sañga ed makapataktakot; tan saray atatagey ed kanengneñgan so nabatang; tan saray mapaatagey so napaabeba.

34 Tan palaspasen to so saray kakdelan ed saray katakelan ed panamegley na balatyang, tan say Libano napelag lapu ed sakey a makapanyari.