Tekap 7
Si Isaias so nansalita a siñga Mesias—Say Mesias so nawalaan na dila na saray makabat—Iter to so beneg to ed saray managbakbak—Sikato so ag nakewkew—Ipareng ed Isaias 50. Ñgalñgali 559–545 S.C.
1 On, tan onia so inkuan na Katawan: Impulisay takayo, odino sikayo so imbantak ko ed ando la ya ando? Lapu ed onia so inkuan na Katawan: Iner so kawalaan na kasulatan ed impañgisian ed si ina yo? Siopa kasi so añgiteran ko ed sikayo, odino siopa ed saray akautañgan ko so añgilakoan ko ed sikayo? On, siopa kasi so añgilakoan ko ed sikayo? Nengneng yo, lapu ed saray kaugesan yo inlako yo so inkasikayo, tan lapu ed saray kasalanan yo nisian si ina yo ed sikayo.
2 Dia ed ontan, sanen onsabi ak, angapo so too; sanen tinmawag ak, on, angapo so onebat, O kailalakan na Israel, apatikey kasi so limak ya ag ak la makadundon, odino angapo kasi so pakapanyarik a mañgilaban? Nengneng yo, dia ed sanok ko pinamagak so dayat, impanmaliw ko so saray ilog a katakelan tan saray sira nabulok lapu ed saray danum so minmaga, tan inatey ira lapu ed inkapgaan.
3 Kinubotan ko so saray tawen na kabiluñgetan, tan ginawak so abel a sako a kawes da.
4 Say Katawan a Dios initer to ed siak so dila na saray makabat, pian nakabatan ko no panon so pañgibagak na salita unong ed panaon ed sika, O kailalakan na Israel. Sano wala ed sika so gulo na kanunotan sikato so ombañgon a kinabuasan. Liiñgen to so layag ko ya ondeñgel a siñga saray makabat.
5 Say Katawan a Dios nilukasan to so layag ko, tan ag ak sinmungay, ni say binmeneg ak.
6 Initer ko so beneg ko ed saray managbakbak, tan saray aping ko ed saray managbagot na buek. Ag ko inamot so lupak ed kababaiñgan tan ed panlukda.
7 Lapu ed say Katawan a Dios tuloñgan to ak, dia ed ontan ag ak manmaliw ya ag-makatalos. Dia ed ontan imparungtal ko so lupak a siñga sakey a pamingki, tan kabat ko ya ag ak ombaing.
8 Tan say Katawan asinger, tan siak so sinekderan to. Siopa so onsaluñgat ed siak? Mankakasakey itayo ya onalagey. Siopa so kabusol ko? Paulyan yo a sikato so onasinger ed siak, tan sikato so bakbaken ko ed panamegley na biskeg na sañgik.
9 Lapu ed say Katawan a Dios tuloñgan to ak. Tan amin a mantutol ed siak, nia, sikara ya amin so ontakken a siñga daan a kawes, tan saray gamugamo opoten to ra a kanen.
10 Siopa ed limog yo so antakot ed Katawan, a matolok ed voces na igagangan to, a mankurang ed kabiluñgetan tan angapo so liwawa?
11 Nengneng yo amin yo a manselsel na apoy, a niliktob yo so inkasikayo ed saray kidiam, mankurang kayo ed liwawa na apoy yo tan dia ed saray kidiam a sinelselan yo. Saya so naala yo manlapu ed dili a limak—sikayo so ondukol ed ermen.