1 Likud ed saya, say salita na Katawan inkuan to ed siak: Mañgala ka na baleg a lukot, tan isulat mo ed pluma na too, so nipaakar ed si Maher-shalal-hash-baz.

2 Tan añgala ak na saray matuor a tasi a mañgisulat, si Urias a sacerdote, tan si Zacarias ya anak a laki nen Jeberekias.

3 Tan linma ak ed sakey ya asawa na profeta; tan sikato so nanlukon tan nananak na sakey a laki. Dia ed saman inkuan na Katawan ed siak: Tawagen mo so ñgaran to a, Maher-shalal-hash-baz.

4 Tan nia, say ogaw ag nawalaan na pikakabat ed panakis, Say amak, tan say inak, sakbay a saray kayamanan na Damasco tan saray asamsam ed Samaria so naala a niarawi ed arap na ari na Asiria.

5 Say Katawan akisalita ed siak lamet, a kuan to:

6 Lapu ed saya a totoo so inwaklit da so saray danum na Siloe a managos a mapalpalna, tan nangayaga ed si Rezin tan say laki ya anak nen Remalias;

7 Natan sirin, nia, say Katawan pasapaten to ed sikara so danum na ilog, mabiskeg tan dakel, angan say ari na Asiria tan amin a gloria to; tan sikato so ontakdang ed amin a panaagosan to, tan onlipua ed saray amin a pandel to.

8 Tan sikato so ondalan ya onagos anga ed Juda; sikato so onlipua tan onagos, tan say kaaralem to nasabi to so anga ed beklew; tan say inkaunat na saray payak to panoen to so kaawang na dalin mo, O Immanuel.

9 Manmomoyuñgan kayo, O sikayo a totoo, tan sikayo so naboybuyak; tan deñgelen yo sikayo ya amin a wala ed arawi a bansa; eletan yo so inkasikayo, tan sikayo so naboybuyak; eletan so inkasikayo, tan sikayo so naboybuyak.

10 Mankokonuan kayo a saniiba, tan saya so manmaliw ya andi-kana; bitla yo so salita, tan saya ag ontalindeg; lapu ed say Dios wala ed sikami.

11 Lapu ed say Katawan nansalita na onia ed siak a tekep so mabiskeg a lima, tan binilin to ak ya ag ko mankurang ed dalan na saya a totoo, a kuan to:

12 Ag yo ikuan, Say sakey a maamot a pantatalusan, dia ed amin a saraya a totoo so ikuan da, Sakey a maamot a pantatalusan; ni say ontakot kayo ed takot da, odino ontakot kayo.

13 Pasanto yo so dili a Katawan na Ejercito, tan sikato so takotan yo, tan sikato so kapagaan yo.

14 Tan sikato so onkana a sakey a pansalimbeñgan; balet onkana a bato a katiloran, tan onkana a sakey a bato a pankasalananan ed mandapag a kailalakan na Israel, tan pasiklong tan kalot ed saray manaayam ed Jerusalem.

15 Tan dakel ed limog da so natilor tan natumba, tan napiley, tan nakalotan, tan nadakep.

16 Pasekderan mo so paneknek, paelet mo so gangan ed limog na saray disipulos ko.

17 Tan alagaren ko so Katawan, a sinaniban to so lupa to ed kailalakan nen Jacob, tan sikato so anapen ko.

18 Nia, siak tan saray anak ya initer na Katawan ed siak so onkana a tanda tan pakelaw ed Israel a nanlapu ed Katawan na saray Ejercito, a sikato so manaayam ed Palandey na Sion.

19 Tan sano ikuan da ed sika: Anap mo ed saraman so awalaan na kabkabat la ya espiritu, tan dia ed saray makabat a manuni a siñga manok—ag kasi say sakey a totoo nepeg ya anapen da ed Dios pian saray mabilay so makareñgel manlapu ed saray inaatey?

20 Dia ed gangan tan dia ed paneknek; tan sano ag ira mansalita unong ed saya a salita, say makaseñgeg angapo ed sikara so liwawa.

21 Tan sikara so onlabas ed otel to ya ag nagnap so inkipasen tan inkaeras; tan nagawa a sano sikara so narasan, onsanok ira ed inkasikara a dili, tan isamba da so ari tan Dios da, tan onnengneng ira ed tagey.

22 Tan sikara so onnengneng ed dalin tan nengneng da so gulo, tan kabiluñgetan, say kuyep na pansesga, tan sikara so nasunson ed kabiluñgetan.