1 Saray salita nen Jacob, say laki ya agi nen Nephi, a sinalita to ed saray totoo nen Nephi:

2 Nia, inararok a kaagian, siak, Jacob, lapu ed tawag na Dios, tan naordinan unong ed kanengneñgan na masanto a gangan to, tan lapu ed pinasanto to ak ed panamegley nen agik a laki a si Nephi, a sikato so seseleñgen yo ya ari odino manañgiagel, tan dia ed sikato so paniilaloan ed kiagel yo ed kaatapan, nia kabat yo a siak so nansalita ed sikayo na mapalalo a dakel a beñgatla.

3 Angaman ontan, mansalita ak lamet ed sikayo; lapu ed pilalek ko so nipaakar ed kaabigan na saray kamarerua yo. On, say kapagaan ko so baleg onkana ed sikayo; tan sikayo a dili amta yo ya onia so nanlapu la ed saman. Kanian nampulong ak ed sikayo ed amin a seet; tan imbañgat ko ed sikayo so saray salita nen amak; tan sinalitak ed sikayo so nipaakar ed amin a beñgatla a nisulat, a nanlapu ed inkapalsa na mundo.

4 Tan natan, nia, mansalita ak ed sikayo nipaakar ed saray beñgatla natan, tan saray onsabi; dia ed onia, basaen ko so saray sinalita nen Isaias. Tan saraya so salita a pilalek nen agik a salitaen ko ed sikayo. Tan mansalita ak ed sikayo onkana ed kaabigan yo, pian naaralan yo tan mangloria kayo ed ñgaran na Dios yo.

5 Tan natan, saray salitak a basaen ko so saray sinalita nen Isaias nipaakar ed kailalakan na Israel; dia ed ontan, saraya so miolibay ed sikayo, lapu ed kabiañgan kayo na kailalakan na Israel. Tan dakel so saray beñgatla a sinalita nen Isaias a miolibay ed sikayo, lapu ed kabiañgan kayo na kailalakan na Israel.

6 Tan natan, saraya so salita: Onia so salita na Katawan a Dios: Nia, itagey ko so dili a limak ed saray Gentiles, tan ipatalindeg ko so pañgaligan ed saray totoo; tan awiten da so saray lalaki ya anak mo ed saray taklay da, tan saray bibii ya anak mo sakbaten da ed saray takeb da.

7 Tan saray arari sikara so managasikaso ya ama yo, tan saray reyna sikara so managasikaso ya ina yo; sikara so ontewek ed sika ya akausdong ed dalin so saray lupa da, tan dildilan da so sapok ed saray salim; tan nakabatan mo a siak so Katawan mo; kanian ag ira ombaing a manalagar ed siak.

8 Tan natan siak, Jacob, mansalita ak nipaakar ed saraya a salita; Tan nia, say Katawan impanengneng to ed siak a saraman so wala ed Jerusalem, a diman so nanlapuan tayo, sikara so pinapatey tan intaynan da ra a dinakep.

9 Angaman ontan, say Katawan impanengneng to ed siak ya ompawil ira lamet. Tan impanengneng to met ed siak a say Katawan a Dios, say Masanto a Bugtong na Israel, iparungtal to so inkasikato a dili ed sikara unong ed laman; tan dia ed kayari to ya omparungtal ed sikara sikato so bakbaken da tan sikato so ipasak da ed krus; unong ed saray salita na angel a nansalita ed siak.

10 Tan kayari ra a paaweten so saray puso ra tan pinatalker da so saray teñger da sumpa ed Masanto a Bugtong na Israel, nia, saray panañgokom na Masanto a Bugtong na Israel so onsabi ed sikara. Tan onsabi so agew a sikara so nabakbak tan manlikna tan napasegsegang.

11 Dia ed ontan, kayari kadagdag da a mampawil-pawil, tan onia so inkuan na angel, dakel so mantepel na segsegang unong ed laman, tan ag ira napaulyanan ya ompatey, lapu ed pikakasi na saray matuor; sikara so nataytayak, tan nabakbak, tan nabusol; manwari ya ontan, say Katawan mapañgasi ed sikara, tan no onsabi ra ed pikakabat na Mananundon da, sikara so natipon lamet ed saray dalin a tawir da.

12 Tan mapalar so saray Gentiles, a sikara so insulat na profeta; tan nia, no sikara so mambabawi tan ag ira onlaban sumpa ed Sion, tan ag ira mitipon ed saman so baleg tan marumsis a simbaan, sikara so nilaban; lapu ed say Katawan a Dios sumpalen to so saray paknaan to a ginawa to ed saray anak to; tan makaseñgeg ed saya say profeta so nansulat ed saraya a beñgatla.

13 Dia ed ontan, saraman so onlaban sumpa ed Sion tan ed saray paknaan a totoo na Katawan sikara so mandildil ed sapok na saray sali ra; tan saray totoo na Katawan so ag ombaing. Tan saray totoo na Katawan so saraman so manalagar ed sikato; tan sikara so manaalagar ni a sansia ed isabi na Mesias.

14 Tan nengneng yo, unong ed saray salita na profeta, say Mesias onsabi lamet ed komadua a panaon pian bawien to ra; dia ed ontan, iparungtal to so inkasikato ed sikara ed pakapanyari tan baleg a gloria, anga ed kaderal na saray kabusol da, sano saman ya agew so onsabi a manisia ra ed sikato; tan angapo so siopaman a naderal a manisia ed sikato.

15 Tan saraman so ag manisia ed sikato so naderal, mandapag ed panamegley na apoy, tan bagyo, tan yegyeg, tan pamaterter na dala, tan salot, tan eras. Tan nakabatan da a say Katawan sikato so Dios, say Masanto a Bugtong na Israel.

16 Tan say naerel so naala manlapu ed saray mabiskeg, odino say matunong ya adakep so nilaban?

17 Balet onia so inkuan na Katawan: Angan saray adakep na saray mabiskeg sikara so naala, tan saray naerel na saray makapataktakot sikara so nilaban; lapu ed say Makapanyari a Dios ilaban to so saray paknaan a totoo to. Tan onia so kuan na Katawan: Sumpaen ko so saray onsumpa ed sika—

18 Tan pakanen ko so saray mamasegsegang ed sika, na saray dili a laman da; tan nabuwek ira ed saray dili a dala ra a siñga masamit ya alak; tan amin a laman nakabatan da a siak say Katawan so Manañgilaban mo tan Mananundon mo, say Makapanyari a Bugtong nen Jacob.