1 Tan dia ed ontan cancionan ko so inararok na sakey a canta na pinablik, nipaakar ed kaubasan to. Say pinabpablik so walaan na sakey a kaubasan ed mabonabona a pukdol.

2 Tan saya so inalar to, tan tinipon to so saray bato to nia, tan tinaneman to na apili-pili a wakal, tan añgipaalagey na sakey a tori ed pegley to nia, tan nangawa met na panagpespesan na ubas diman; tan initer to so maong ya asikaso pian mamapaway na ubas, tan saya so amapaway na ubas a balang.

3 Tan natan, O sikayo a manaayam ed Jerusalem, tan lalaki a totoo ed Juda, iter yo so pañgokom, pikasik ed sikayo, ed siak tan say kaubasan ko.

4 Anto ni so magmaong a nagawaan ed ubasan ko a saya so ag ko ginawa? Lapu ed onia, sanen inasikasok pian mamapaway na ubas saya so amapaway na ubas a balang;

5 Tan natan onla kayo; ibagak ed sikayo no anto so gawaen ko ed kaubasan ko—Ekalen ko so alar to nia, tan saya so naakan a naupot; tan bagbagen ko so padir to nia, tan saya so nagatin-gatinan;

6 Tan saya so paulyan ko ya akatoñgilang; ya ag met la napaltuñgan odino nabokalkal; balet onlesa so saray dika tan sabisabit, tan igangan ko met so saray lurem ya ag mañgipelag na uran ed tapew to.

7 Tan say kaubasan na Katawan na Ejercito so kailalakan na Israel, tan saray lalaki a totoo na Juda so makapaliket a tanaman to; tan inanap to so pañgokoman, tan nia, managpairap; lapu ed say inkamatunong, balet nia, sakey ya akis.

8 Abagey so manañgisuldong ed abong tan abong, anga ed angapo la so pasen, pian sikara so nipasen a mambokbukor ed pegley na dalin!

9 Dia ed dili a layag ko, kuan na Katawan na saray Ejercito, dia ed katuaan dakel a kaaboñgan so nataynan, tan ankakabaleg tan mararakep a ciudad ya angapo so manaayam.

10 On, say samplora ya akre na kaubasan so mañgiter na buñga a sakey a bat, tan say bokel na sakey a homer mañgiter na buñga a sakey ya efa.

11 Abagey so saray masakbay ya ombañgon ed kabuasan, pian tumboken da so mabiskeg ya iinumen, a mampatuloy ya anga ed labi, tan say alak parlañgan to ra!

12 Tan say arpa, tan say biola, say bandirita, tan say tolali, tan say alak so wala ed saray pista ra; balet ag da imanoen so kimey na Katawan, ni say omameñgen da so kimey na saray lima to.

13 Dia ed ontan, saray totook so adakep, lapu ed sikara so ag awalaan na kakabatan; tan saray mapagalang a totoo ra so naeerasan, tan say karaklan ed sikara so amagaan lapu ed inkapgaan.

14 Dia ed ontan, say infierno papabalegen to so inkasikato, tan nilukasan to so sañgi to ya andi-sukat; tan say gloria ra, tan say karaklan da, tan saray liket da, tan saman so manliliket, dia ed saya sikara so onlasur.

15 Tan say mapasnok a too so napaabeba, tan say makapanyari a too sikato so manmaliw a mapaabeba, tan saray mata na mapaatagey so napaabeba.

16 Balet say Katawan na saray Ejercito so napaatagey dia ed kaokom, tan say Dios a masanto so napasanto ed inkamatunong.

17 Dia ed ontan saray kilaw na karnero so natagano unong ed kaugalian da, tan saray pasen ya andi kana na saray matataba so kanen na saray sankaili.

18 Abagey so saray mantatanguyor na inkauges ed lubir na inkapanta, tan kasalanan a siñga saya so lubir na kariton;

19 A kuan da: Abuloyan a sikato so mansiglat, tan paganat so kimey to, pian nanengneng mi so saya; tan paulyan a say simbawa na Masanto a Bugtong na Israel so onasinger tan onsabi, pian nakabatan mi so saya.

20 Abagey so saray tawagen da so mauges a maong, tan say maong a mauges, ya iletneg da so kabiluñgetan ed liwawa, tan say liwawa ed kabiluñgetan, ipasen da ya ampait so masamit, tan say masamit so ampait!

21 Abagey so saray makabat ed saray dili a mata ra tan masilib ed dili a pakanengneng da!

22 Abagey so saray maksil ya oninum na alak, tan saray lalaki a mabiskeg a manlaok na mabayani ya iinumen;

23 A patunoñgen da so marelmeng ya onkana ed gungona, tan ekalen da so inkamatunong ed say matunong a manlapu ed sikato!

24 Dia ed ontan, unong a say apoy opoten to so ñgapos, tan say dalang poolan to so taep, saray lamut da so nabulok, tan saray rosas da so manmaliw a siñga sapok; lapu ed inwaklit da so gangan na Katawan na saray Ejercito, tan binalaw da so salita na Masanto a Bugtong na Israel.

25 Dia ed ontan, say pasnok na Katawan dinmalang sumpa ed saray totoo to, tan iniunat to so saray lima to sumpa ed sikara, tan binakbak to ra; tan saray pukdol minmayegmeg, tan saray bangkay da so apisaypisay ed pegley na saray karsada. Lapu ed saraya ya amin say pasnok to ag ni kinmepa, balet say lima to siansia ni ya akaunat.

26 Tan ipatalindeg to so pakabirbiran ed saray bansa a wala ed arawi, tan sumpitan to ra manlapu ed sampot na dalin; tan nia, sikara so ondago a masigsiglat; ya angapo ed limog da so nabanalan tan napatakba.

27 Angapo so makalirep ni say makaugip; ni onlukak so balkes ed saray awak da, ni say napaksot so liston na saray sapatos da;

28 A saray pana ra so makdem, tan amin a pabekang da so akabalok, tan saray koko na kabayo ra so nabilang a siñga bato a paminki, tan saray dalig da so siñga alimbosabos, say uñgol da so siñga sakey a leon.

29 Say panuñgol da so siñga saray malangwer a leon; on, sikara so onuñgol, tan tekmelan da so naerel da, tan sikato so itaynan da ya ag-nasakitan, tan angapo so mañgilaban.

30 Tan dia ed saman ya agew sikara so onuñgol sumpa ed sikara a siñga say panuñgol na dayat; tan no onnengneng ira ed sakbit, nia, wala so kabiluñgetan tan ermen, tan say liwawa binmiluñget ed saray katawenan.