1 Tan natan, nia, kaagian ko, akisalita ak ed sikayo, unong ed say tanguyor na Espiritu ed siak; dia ed ontan, amtak a saraya so petepeteg ya onsabi a nagawa.

2 Tan saray beñgatla a nisulat ed libro baleg so kakanaan to ed saray anak na totoo, tan lalo la ed saray boleg tayo, a sikara so nakdaan ed kailalakan na Israel.

3 Tan nagawa ed saman ya agew a saray simbaan a nipaalagey, ya ag onkana ed Katawan, sano say sakey ikuan to ed sananey: Nia, Siak, Siak so kayarian na Katawan; tan saray arum ikuan da: Siak, Siak so kayarian na Katawan; tan onia so ikuan na balang sakey ya añgipaalagey na saray simbaan, tan aliwa a dia ed Katawan—

4 Tan sikara so mambabaliñgaan ed balang sakey tan sakey; tan saray sacerdote ra so mibaliñgaan ira ed sakey tan sakey, tan mambañgat ira unong ed dili a kakabatan da, tan iburi ra so Espiritu Santo, a sikato so mañgiiter na pansalita.

5 Tan iburi ra so pakapanyari na Dios, say Masanto a Bugtong na Israel; tan ikuan da ed saray totoo; Deñgel kayo ed sikami, tan deñgel yo so saray bañgat mi; tan nia angapo so Dios ed saya ya agew, lapu ed say Katawan tan say Mananundon ginawa to la so kimey to, tan initer to so pakapanyari to ed saray totoo.

6 Nia, deñgel yo so saray bañgat ko; sano ikuan da ed sikayo a wala so milagro a ginawa na lima na Katawan, ag yo sisisiaen; tan dia ed saya ya agew sikato so aliwa a Dios na saray milagro; agawaan to la so kimey to.

7 On, tan wala so dakel a mankuan: Mañgan kayo, inom kayo, tan manliket kayo, tan nabuas sikatayo so ompatey; tan saya so maong ed sikatayo.

8 Tan dakel met so mankuan: Mañgan kayo, inom kayo, tan manliket kayo; angaman ontan, takot kayo ed Dios—sikato la so mañgiter na pamaandi ed pakagawa na sakey a melag a kasalanan; on, mantila kayo na daiset, alaen yo so pankanawnawa ed sakey makaseñgeg ed saray salita to, mankutkot kayo na sakey ya abot ya onkana ed kaabay yo; angapo so kaugsan to nia; tan gawaen yo ya amin so saraya a beñgatla, tan nabuas ompatey itayo; tan no bilang sikatayo so makasalanan, say Dios leweten to tayo na pigara a bakbak, tan dia ed kaunoran sikatayo so nilaban ed panarian na Dios.

9 On, tan wala so dakel a mambañgat unong ed saraya a kanengneñgan na aliwa a matua tan andi-kana tan makulang-kulang a doctrina, tan sikara so onsibuk ed saray puso ra, tan anapen da so pañgisaniban da ed saray simbawa ra manlapu ed Katawan; tan saray kimey da so wala ed biluñget.

10 Tan say dala na saray sasantos ibelyaw a manlapu ed dalin sumpa ed sikara.

11 On, sikara la ra ya amin akasian a pinmaway ed dalan; sikara so nanmaliw la ya aderal.

12 Lapu ed kinon, tan lapu ed saray aliwa a matua a managbañgat, tan aliwa a matua a doctrina, saray simbaan da so nanmaliw ya aderal, tan saray simbaan da so nipaatagey; lapu ed kinon sikara so sinmibok.

13 Tinakewan da so saray duka makaseñgeg ed saray mararakep a pasen a panagpikasian da; tinakewan da so saray duka makaseñgeg ed saray mararakep a kawes da; tan pinasegsegang da so maolimek tan saray duka ed puso, makaseñgeg ed kinon a sikara so asibok.

14 Sikara so nansulong na matalker a teñger tan akatañgay so saray ulo ra; on, tan makaseñgeg ed kinon, tan karelmeñgan, tan karumsisan, tan inkabalangkantis, sikara ya amin so abalang la ya akasian likud lambeñgat ed pigara, a sikara so mapaabeba a mananumbok nen Cristo; angaman ontan, sikara so niwanwan, a dia ed dakel a pamaakaran sikara so aliñgo lapu ed nibañgat ira unong ed bañgat na too.

15 O saraman so marunong, tan saray di-aral, tan saraman so mayaman, a sinmibok ed kinon na saray puso ra, tan amin na managpulong na aliwa a matua a doctrina, tan amin da so managgawa na inkabalangkantis, tan managpikewet ed maptek a dalan na Katawan, abagey, abagey, abagey ira, kuan na Katawan a Dios a Makapanyari ed amin, lapu ed sikara so ibantak ed kaaraleman na infierno!

16 Abagey la so saraman so mañgipulisay ed saray matunong lapu ed beñgatla ya andi-kakanaan tan mambusol sumpa ed saman so maong, tan mañgikuan a saya so angapo so kana to! Lapu ed onsabi so agew a say Katawan a Dios masiglat ya ondalaw ed saray manaayam ed dalin; tan dia ed saman ya agew a sikara la so nagnap ed inkauges sikara so nabalang nagnap ed inkauges.

17 Balet nengneng yo, no saray manaayam ed dalin so mambabawi ed saray karelmeñgan da tan karumsisan da sikara so ag naderal, kuan na Katawan na saray Ejercito.

18 Balet nia, saman so baleg tan marumsis a simbaan, a sikato so balangkantis na amin a dalin, so kaukolan a natumba ed dalin, tan agay la so kasil na kapelag to.

19 Tan say panarian na demonyo so nakaukolan a nayegyeg, tan saray kabiañgan to nakaukolan a sikara so kewkewen onkana ed pambabawi, odino andi say demonyo tekmelan to ra ed andi-angaan a gulonggulong to, tan sikara so kewkewen to a mampasnok, tan sikara so nabalang;

20 Tan nia, dia ed saman ya agew sikato so mampilalek ed kapusoan na saray anak na totoo, tan kewkewen to ra a mampasnok sumpa ed saman so maong.

21 Tan saray arum so padeenen to, tan tambayoen to ra ed minomundo a salimbeng, pian ikuan da: Amin so maong ed Sion; on, say Sion maaliguas, amin so maong—tan dia ed onia say demonyo saolen to so saray kamarerua ra, tan sikara so itunton to ya iarawi a maalwar ed kaaraleman na infierno.

22 Tan nia, saray arum sikara so idayew to a maong, tan ikuan to ed sikara ya angapo so infierno; tan ikuan to ed sikara: Aliwa ak a demonyo, tan angapo so onia—tan dia ed onia, iyesaes to ed saray layag da, ya anga ed sikara so nabalor to ed makapataktakot a gulonggulong to, a diman angapo la so kilalaban.

23 On, sikara so alakap na patey, tan infierno; tan say patey, tan say infierno, tan say demonyo, tan amin ya atekmelan to a wala diman so nakaukolan ya ontalindeg ed arap na trono na Dios, tan sikara so natutolan unong ed saray kimey da, no iner so kaukolan a laen da a pasen a niparaan ed sikara, iñgen angan sakey a lipnok na apoy tan azufre, a saya so andi-angaan a paniñgel.

24 Dia ed ontan, abagey so saman so maligen ed Sion!

25 Abagey so saman so mañgibelyaw: Amin so maong!

26 On, abagey so saman so ondeñgel ed bañgat na saray totoo, tan iburi to so pakapanyari na Dios, tan say palabo na Espiritu Santo!

27 On, abagey so saman so mankuan: Akaawat kami la, tan angapo la so nakaukolan mi!

28 Tan dia ed magano a salita, abagey so saraman so ongiwgiw, tan mampasnok lapu ed katuaan na Dios! Tan nia, saman so niletneg ed bato a dampay awaten to so saya a sililiket; tan saman so niletneg ed leletnegan a buer so ongiwgiw ag la piga sikato so nageba.

29 Abagey so saman so mankuan: Inawat mi la so salita na Dios, tan ag mi la nakaukolan so arum a salita na Dios, lapu ed wala la ed sikami so magenap!

30 Tan nia, onia so kuan na Katawan a Dios: Iter ko ed saray anak na totoo so sakey a linya ed linya, sakey a bilin ed bilin, dia daiset tan diman daiset; tan mapalar so saraman so ondeñgel ed saray bañgat ko, tan italineng da so layag da ed saray simbawak, lapu ed sikara so makaaral na kakabatan; tan dia ed saman so mañgawat iter ko so malaglaem; tan saraman so mañgikuan, Sikami so awalaan na magenap, manlapu ed sikara naekal so angan saman so wala la ed sikara.

31 Naayew so saman so iter to so talek to ed too, odino gawaen to so laman a pinagkataklay to, odino deñgelen to so saray bañgat na saray totoo, likud no saray bañgat da so niiter dia ed pakapanyari na Espiritu Santo.

32 Abagey so saray Gentiles, kuan na Katawan a Dios na saray Ejercito! Tan manwari ya idukey ko so taklay ko ed sikara ed inagew-agew, siak so iburi da; angaman ontan, mapañgasi ak ed sikara, kuan na Katawan a Dios, no sikara so mambabawi tan ondago ed siak, lapu ed saray taklay ko so akaunat a sanagew, kuan na Katawan a Dios na saray Ejercito.