1 Say salita ya anengneng nen Isaias, laki ya anak nen Amoz, so nipaakar ed Juda tan Jerusalem:

2 Tan nagawa ed saray kasampotan ya agew, sano say palandey a panalalageyan na abong na Katawan so ontalindeg ed tuktok na saray kapalandeyan, tan nitanduro ed tagey na saray pukdol, tan amin a bansa so ondagup ed saya.

3 Tan dakerakel a totoo so onla tan mañgikuan: Onla itayo, tan ontakdang itayo ed palandey na Katawan, dia ed abong na Dios nen Jacob; tan ibañgat to tayo ed saray dalan to, tan sikatayo so mankurang ed saray dalan to; tan manlapu ed Sion ompaway so saray gangan, tan say salita na Katawan so manlapu ed Jerusalem.

4 Tan sikato so mañgokom ed limog na amin a bansa, tan pampasnokan to so dakel a totoo; tan pandayen da so saray espada da a manmaliw a tarem na lukoy, tan saray gayang da a panagtipas na sañga—say sakey a bansa ag mañgiayag na espada sumpa ed sananey a bansa, ni ag da la naaral so bakal.

5 O kailalakan nen Jacob, ondago kayo tan mankurang itayo ed liwawa na Katawan; on, ondago kayo, lapu ed sikayo ya amin so sinmian ya abalang, balang sakey ed dalan na karelmeñgan to.

6 Dia ed ontan, O Katawan, liningwanan mo so saray totoom, say kailalakan nen Jacob, lapu ed sikara so naaroman na saray nanlapu ed bokig, tan dineñgel da so saray pomaparles a siñga saray Filisteo, tan kinaliktan da ed inkasikara so anak na saray sankaili.

7 Saray dalin da met so napno na saray pilak tan balitok, ni say wala so angaan na saray kayamanan da; saray dalin da so napno met na saray kabayo, ni say wala so angaan na saray karwahe ra.

8 Saray dalin da napno met na saray talintao; ya igagalang da so ginawa na saray dili a lima da, saman so ginawa na saray dili a gamet da.

9 Tan say mapasnok a too ag to labay so ontewek, tan say makapanyari a too ag mampaabeba ed inkasikato, dia ed ontan, ag mo ra pipirdonaen.

10 O sikayo a marelmeng, loob kayo ed say baleg bato, tan amot kayo ed sapok, lapu ed say takot ed Katawan tan say gloria na kaatageyan to so mambakbak ed sika.

11 Tan nagawa a say mapaatagey a nengneng na too so napaabeba, tan say inkaañgat na too so ontewek, tan say Katawan labat so nadadayew ed saman ya agew.

12 Lapu ed say agew na Katawan na saray Ejercito so magano la ya onsabi ed amin a bansa, on, dia ed balang sakey; on, dia ed saray mankinon tan mapaatagey, tan balang sakey a nipaatagey, tan sikato so napaabeba.

13 On, tan say agew na Katawan so onsabi ed amin a kiew a sidro na Libano, lapu ed sikara so atagey tan nipaatagey; tan dia ed amin a kiew a robli na Bashan;

14 Tan dia ed amin a kapalandeyan, tan dia ed amin a tuktok na saray pukdol, tan dia ed amin a bansa a nipaatagey, tan dia ed amin a totoo;

15 Tan dia ed balang sakey ya atagey a tori tan dia ed amin ya naalar a padir;

16 Tan dia ed amin a bapor ed dayat, tan dia ed amin a bapor na Tarsis, tan dia ed amin a mararakep a litrato.

17 Tan say kaatageyan a nengneng na too so napatewek, tan say inkaañgat na saray totoo so napaabeba; tan say Katawan labat so nadadayew ed saman ya agew.

18 Tan saray talintao paandien to a sigpot.

19 Tan sikara so onla ed saray abot na ankakabaleg a bato, tan dia ed saray uñgib na dalin, lapu ed say takot ed Katawan so onsabi ed sikara tan say gloria na kaatageyan to so mambakbak ed sikara, sano sikato so ontalindeg pian yegyegen to na makapataktakot so lapag a dalin.

20 Dia ed saman ya agew say sakey a too so mañgibantak ed talintao to a pilak, tan saray talintao to a balitok, a ginawa to a dili pian pañgigalañgan to, ed saray otot tan ed saray kolalatnit;

21 Ya onla ed tambib na ankakabaleg a bato, tan dia ed tuktok na saray abetag-betag a bato, lapu ed say takot ed Katawan so onsabi ed sikara tan say kaatageyan na gloria to so mambakbak ed sikara, no sikato so ontalindeg pian yegyegen to na makapataktakot so lapag na dalin.

22 Tonda kayo a manlapu ed too, a manlilinawa ed saray eleng to; tan iner kasi so pakarumogan na kakanaan to?