1 Tan say Katawan wala so panañgasi to ed si Jacob, tan siansia ni a pilien to so Israel, tan sikara so ipasen to ed saray dili a dalin da; tan saray sankaili so mitipon ed sikara, tan sikara so ompeket ed kailalakan nen Jacob.

2 Tan saray totoo alaen to ra tan awiten to ra ed saray pasen da; on, manlapu ed arawi ya anga ed saray sampot na dalin; tan sikara so ompawil ed saray dalin da a sipan. Tan say kailalakan na Israel so mankayarian ed sikara, tan say dalin na Katawan so onkana ed saray igagangan a lalaki tan bibii; tan alaen to ra ya adakep manlapu ed saray nandakep; tan sikara so mañgoley ed saray managpasegsegang ed sikara.

3 Tan nagawa ed saman ya agew a say Katawan iter to ed sika so painawa, a manlapu ed saray ermen mo, tan manlapu ed saray takot mo, tan manlapu ed malet ya inkaaripen a dia ed saya sika so ginawa a manlingkor.

4 Tan nagawa ed saman ya agew, ya alaen mo so saya a salita sumpa ed ari na Babilonia, tan ikuan mo: Panon so intonda na saray managpasegsegang, say binmalitok a ciudad so tinmonda!

5 Say Katawan pinuter to so tayukor na saray marelmeng, say tayukor na saray manañgoley.

6 Na saman so amakbak ed saray totoo a sisasanok ed ag-manonda a basig, saman so añgoley ed saray bansa dia ed pasnok, sikato so napasegsegang, tan angapo so mañgisebel.

7 Say lapag na dalin so wala ed painawa, tan mareen; sikara so bigla a nancancion.

8 On, saray kiew a saleng mangayaga ra ed sika tan ontan met ed saray kiew a sidro na Libano, a kuan da: Nanlapu nen sika so niparukol angapo la so managbatang a linma dia sumpa ed sikami.

9 Say infierno a manlapu ed leksab so ginmalaw lapu ed sika pian abeten to ka ed isabim; pagalawen to so saray inaatey ya onkana ed sika, angan amin na saray pañgulo na dalin; pinatalindeg to manlapu ed saray trono to so amin ya ari na saray bansa.

10 Sikara ya amin so mansalita tan inkuan da: Nanmaliw ka met la kasi a makapoy a siñga sikami? Nanmaliw ka met la kasi a siñga sikami?

11 Saray liket mo so naguyor ed lubok; say tanol na saray biolam ag la nareñgel; saray bigis ataytayak la ed silong mo, tan saray bigis sinakbuñgan da ka la.

12 Panon so inkaplag mo a nanlapu ed tawen, O Lucifer, anak na kabuasan! Sika kasi so abatang a linma ed dalin, a gapo na inkapoy na saray bansa!

13 Tan inkuan mo ed dalem na pusom: Ontakdang ak ed tawen, itandurok so tronok ed tagey na saray bitewen na Dios; Onyurong ak met ed palandey na saray tipon, dia ed diking ed baybay;

14 Ontakdang ak ed tagey na saray lurem; manmaliw ak a siñga say Sankaatageyan.

15 Iñgen sika so naawit ya ipelag ed infierno, ed gilig na aralem ya abot.

16 Saray makanengneng ed sika koliremdem so nengneng da ed sika, tan sika so nodnunoten da, tan ikuan da: Sikato kasi so too a nangawa na ingiwgiw na dalin, ya amapayegpeg ed saray panarian?

17 Tan ginawa to so mundo a siñga katakelan, tan dineral to so saray ciudad diman, tan ag to nilukasan so abong na saray impañgaw to?

18 Amin ya ari na saray bansa, on, amin da, a mandukdukol ed gloria, balang sakey dia ed dili a lubok to.

19 Balet sika so nibantak nanlapu ed lubok mo a siñga sakey a marumsis a sañga, tan say nakdaan ed saray inaatey, a sikara so atalos na espada, a mampapaleksab ed saray bato na abot; a siñga inatey a laman a gatin-gatinan na saray sali.

20 Sika so ag ilaok ed sikara dia ed pañgipumpon, lapu ed dineral mo so dalin mo tan pinatey mo so saray totoom; say boleg na saray marelmeng kapiganman ag nibantog.

21 Iparaan yo so pampatey ed saray anak to niseseñgeg ed karelmeñgan na saray ama ra, pian ag ira ontalindeg, ni say kayarianen da so dalin, ni say panoen da so tapew na mundo na saray ciudad.

22 Tan siak so ontalindeg sumpa ed sikara, inkuan na Katawan na saray Ejercito, tan taksiñgen ko ya isian ed Babilonia so ñgaran, tan saray nakdaan, tan saray lalaki ya anak, tan kaanakan a lalaki, inkuan na Katawan.

23 Sikato met so panmaliwen ko a mankayarian ed saray dolakak, tan saray kotlaong a panayaman na danum; tan panisan ko ed panis na kadederal, inkuan na Katawan na saray Ejercito.

24 Say Katawan na saray Ejercito so nansamba, a nankuan: Petepeteg a siñga ed ninunot ko, ontan so nagawa; tan unong ed getmak, saya so mansiansia—

25 Ya awiten ko so saray Asirio ed dalin ko, tan dia ed tapew na saray palandey ko sikato so gatinan ko; dia ed saman naekal a manlapu ed sikara so pako, tan say sinakbat to so naandi manlapu ed saray takeb to.

26 Saya so gagala ya ingagala ed lapag na dalin; tan saya so lima ya akaunat ed amin a bansa.

27 Tan say Katawan na saray Ejercito saya so ingagala to, tan siopa so mamaandi na kabaliksan to? Tan say lima to so akaunat, tan siopa so mañgitulak a papawil?

28 Dia ed taon ya impatey nen ari Acaz saya so sasakbaten.

29 Ag ka mangagayaga lapag a Palistina, lapu ed say baston na amakbak ed sika so apoter; tan manlapu ed lamut na oleg ompaway so tadioco, tan say buñga to saya so masibeg a mantekyab ya oleg.

30 Tan saray unaan a nianak na saray duka so natagano, tan saray wala ed pankaukolan so ondukol ya angapo so kaatapan; tan pateyen ko so lamut mo ed panamegley na eras, tan pateyen to so saray nakdaan ed sika.

31 Onaglem ka, O puerta; Akis ka, O ciudad; sika, a lapag na Palistina, ya atunaw; tan onsabi a manlapu ed baybay so sakey ya asewek, tan angapo so angan sakey a mambokbukor ed nigetar a panaon to.

32 Anto sirin so iebat ed saray igagangan na saray bansa? A say Katawan impaalagey to so Sion, tan saray duka ed saray totoo to so manmatalek ed saya.