1 Saray sasakbaten na Babilonia, a si Isaias say laki ya anak nen Amoz anengneng to.

2 Itagey yo so laylay diman ed tagey na palandey, ieyag yo so voces yo ed sikara, ipayapay yo so lima yo, pian makaloob kayo ed puerta na saray mapagalang.

3 Ingangan ko so saray apasanto, tinawag ko met so saray makapanyari, lapu ed say pasnok ko angapo ed saraman so nangayaga ed kaatageyan ko.

4 Say iñgal na saray karaklan a wala ed saray kapalandeyan so siñga dakerakel a totoo, sakey a magulo ya uñgol ed panarian na saray bansa ya atiptipon, say Katawan na saray Ejercito pandaragupen to so saray ejercito ya onkana ed laban.

5 Sikara so manlapu ed arawi a dalin, ed sampot na tawen, on, say Katawan, tan saray ayura na sanok to, pian deralen da so lapag na dalin.

6 Onaglem kayo, lapu ed say agew na Katawan so asinger la; saya so onsabi a siñga kadederal manlapu ed Makapanyari ed Amin.

7 Dia ed onia onkapoy so amin a lima, say puso na balang sakey a too so natunaw;

8 Tan sikara so ontakot; sakit tan ermen so mambemben ed sikara; sikara so nikelawan ed balang sakey tan sakey; saray lupa ra so siñga apoy.

9 Nengneng yo, say agew na Katawan so onsabi, a mandusa mandapag ed sanok tan masebeg a pasnok, pian panmaliwen to ya ag-napanayaman so dalin; tan deralen to so saray makasalanan a wala diman.

10 Tan saray bitewen ed tawen tan saray pulok na bitewen ag mañgiter na liwawa ra; say banwa so ombiluñget legan a mankurang, tan say bulan ag to pasinagen so liwawa to.

11 Tan dusaen ko so mundo niseñgeg ed inkauges, tan saray marelmeng ed karelmeñgan da; pañgangaen ko so inkatañgas na saray mapasirayew, tan iparukol so panagpasirayew na saray makapataktakot.

12 Gawaen ko a say sakey a too so lalo a pinabli nen say atagey ya uri na balitok; angan say sakey a too mabli nen say binmalitok a pasñgat na Ofir.

13 Dia ed onia, pamayegmegen ko so saray katawenan, tan say dalin onalis ed pasen to, ed sanok na Katawan na saray Ejercito, tan dia ed agew na masebeg a pasnok to.

14 Tan saya so siñga sakey ya inanop ya ulsa, tan siñga sakey a karnero ya angapo so too a manasikaso; tan sikara say balang sakey a too liñgawen to so saray dili a totoo to, tan balang sakey so ombatik ed loob na dili a dalin to.

15 Balang sakey a mapasirayew so nasaksak; on, tan balang sakey ya akiolop ed saray marelmeng sikara so niparukol ed panamegley na espada.

16 Saray anak da met so nibasig a naboybuyak ed arap na saray mata ra; say kaaboñgan da so naderal tan saray bibii ya asawa ra so napasuot.

17 Nia, pagalawen ko so Medes sumpa ed sikara, ya ag to derleñgen so pilak tan balitok, ni say panliketan da so saraya.

18 Saray pabekang da so mañgibasig ed saray lalaki a malangwer kanian sikara so naboybuyak; tan angapo so panañgasi ra ed say buñga na eges; saray mata ra angapo so iligyas to angan ugogaw.

19 Tan say Babilonia, say gloria na saray panarian, say dakep na kagalgalang na saray Caldeo, saya so siñga sanen dineral na Dios so Sodoma tan Gomorra.

20 Saya so ag la kapiganman natooan, ni napanayaman manlapu ed sakey a kailalakan ya anga ed sananey a kailalakan; ni saray Arabo pampaalageyan da na abong-abong ya abel diman; ni saray managpastol na karnero ikoral da so saray papastolan da diman.

21 Balet saray monanakap na deserto so manayam diman; tan saray kaaboñgan da napano na saray pañgaskasian a pinalsa; tan saray kolayut so manayam diman, tan atap a kanding so mansayaw-sayaw diman.

22 Tan saray monanakap ed saray pulo so managlem diman ed saray ag-napanayaman a kaaboñgan da, tan saray dragon ed saray makapaliket a palacio ra; tan say panaon to asinger la ya onsabi, tan say agew to ag la naparukey. Lapu ed sikato so masiglat a deralen ko; on, lapu ed mapañgasi ak ed saray totook, balet saray marelmeng sikara so nabalang.