1 Deñgel kayo ed siak, sikayo a mananumbok ed inkamatunong. Onnengneng kayo ed bato a dampay ya akataksiñgan yo, tan dia ed abot ya añgutkotan ed sikayo.

2 Onnengneng kayo ed si Abraham, ya ama yo, tan dia ed kinen Sara, a sikato so añgilokon ed sikayo; tan sikato a bukor so tinawag ko, tan binendicionan ko.

3 Tan say Katawan ligliwaen to so Sion, ligliwaen to so amin a pasen ya andi kakanaan; tan gawaen to so saray katakelan a miolibay ed Eden, tan saray kalawakan to a miolibay ed tanamanan na Katawan. Gayaga tan liket so narumog diman, pisasalamat tan voces na laineng.

4 Deñgel kayo ed siak, sikayo a totook; tan ontalineng kayo ed siak, O sikayo a bansak; lapu ed sakey a gangan so manlapu ed siak, tan gawaen ko so panañgokom ko ya onteen a liwawa ya onkana ed saray totoo.

5 Say inkamatunong ko asiñger; say panañgilaban ko sinmipot la, tan say taklay ko so mañgokom ed saray totoo. Saray pulo na dalin so manilalo ed siak, tan dia ed saray taklay ko so panmatalekan da.

6 Itañgay yo so saray mata yo ed katawenan, tan usdoñgan yo so dalin a wala ed leksab; tan say katawenan so naandi a siñga asewek, tan say dalin nabulok a siñga daan a kawes; tan saraman so manaayam diman so ompatey a siñga onia. Balet say panañgilaban ko so ando la ya ando, tan say inkamatunong ko ag naandi.

7 Deñgel kayo ed siak, sikayo a makapikabat ed inkamatunong, sikayo a totoo a nisulat ed puso yo so gangan ko, ag kayo ontatakot ed sanok na saray totoo, ni say ontakot kayo ed saray panagpauges da.

8 Lapu ed saray sisimot kanen to ra a siñga kawes, tan saray bigis kanen to ra a siñga lana. Balet say inkamatunong ko so ando la ya ando, tan say panañgilaban ko so manlapu ed sakey a kailalakan anga ed ontumbok a kailalakan.

9 Bañgon ka, bañgon ka! Isulong mo so biskeg, O taklay na Katawan; bañgon ka a siñga sanen saray kadaanan ya agew. Aliwa kasi a sika a saman so amisag ed si Rahab, tan anugat ed saman so dragon?

10 Aliwa kasi a sika a saman so nampamaga ed dayat, saray danum na baleg a kaaraleman; a ginawam so kaaraleman na dayat ya amaga a dalanen na saray adundon pian makabaliw ira?

11 Dia ed onia, saray dinundon na Katawan ompawil ira, tan onsabi ra a mancancion ed Sion; tan say andi-angaan a gayaga tan inkasanto so wala ed saray ulo ra; tan nagamoran da so liket tan gayaga; say ermen tan pambaliwan so ontaynan ya onarawi.

12 Siak so saman; on, siak so saman so nanligliwa ed sika. Nia, siopa ka, ya ontakot ed too, a sikato so ompatey, tan ed say anak na too, a ginawa a siñga dika?

13 Tan mañgilingwan ed Katawan ya amalsa ed sika, ya añgilaknab ed say katawenan, tan nangawa ed letnegan na mundo, tan awalaan na kapagaan ya andi-tonda ed inagew-agew, lapu ed sanok na saray managdusa, a siñga akaparaan a manderal? Tan iner so sanok na saray managdusa?

14 Say adakep niarawi a maganat, pian sikato so naukbaran, tan ag ompatey ed abot, odino say tinapay to so naandian la ya nikana.

15 Balet siak so Katawan a Dios mo, a saray daluyon to manuñgol; Katawan na saray Ejercito so ñgaran ko.

16 Tan impasen ko so saray salitak ed sañgim, tan sinalimbeñgan taka ed anino na dili a limak, pian itanem ko so saray katawenan tan ipasen ko so saray letnegan na dalin, tan ikuan ko ed Sion: Nia, sikayo so totook.

17 Bañgon ka, bañgon ka, talindeg ka, O Jerusalem, sika ya inminum ed lima na Katawan say kupa na sanok to—sika so abuek ed saray gaer na say kupa na giwgiw a pinespes—

18 Tan angapo so mañgitunton ed sikato ed limog na amin a lalaki ya anak to a sikara so inanak to; ni say wala so mañgidawat ed sikato ed lima, ed amin a lalaki ya anak a sikara so pinabaleg to.

19 Saraya a duara a lalaki ya anak mo so ondago ed sika, a sikara so maermen onkana ed sika—say impambokbukor mo tan inkaderal mo, tan say eras tan say espada—tan siopa so manligliwa ed sika?

20 Saray lalaki ya anak mo naandian ira na liknaan, likud ed saraya a dua; sikara so mandudukol ed gapoan na amin a dalan; a siñga maatap a baka ya abalkot ed iket, sikara so napno na pasnok na Katawan, say sanok na Dios mo.

21 Dia ed onia deñgel mo so saya natan, sika ya apasegsegang, tan abuek, tan aliwa a makaseñgeg ed alak:

22 Onia so inkuan na Katawan, say Katawan tan Dios mo ipikasi to so pankaabigan na saray totoo to; nengneng mo, inekal ko ed limam so kupa na pangiwgiw, saray gaer na kupa na pasnok ko; ag ka la oniinom ed saya lamet.

23 Balet saya so iter ko ed lima na saray mamapairap ed sika; a sikara so nankuan ed kamareruam: Itewek mo so ulom, pian luksoan mi—tan indapam so laman mo a siñga dalin tan siñga dalan ed saraman so binmeltang.

24 Bañgon ka, bañgon ka, isulong mo so biskeg mo, O Sion; isulong mo so saray marakep a kawes mo, O Jerusalem, masanto a ciudad; tan manlapu ed natan angapo la so onla ed sika ya ag-agalsiman tan say aliwa a malinis.

25 Iyagyag mo so inkasika a manlapu ed sapok; talindeg ka, yurong ka, O Jerusalem; ukpos mo so inkasika manlapu ed balor a wala ed beklew mo, O adakep a bii ya anak na Sion.