1 Nengneng yo, agawa a siak, Nephi, impikasik a maong ed Katawan a Dios ko, makaseñgeg ed pasnok na saray agagik.

2 Balet nia, mapalalo so pasnok da ed siak, ya ontan la kanian pilalek da ya ekalen so bilay ko.

3 On, sikara so nanñguroñguro sumpa ed siak, a nankuan: Say yugtan ya agi tayo wala so nunot to ya oleyan to tayo; tan awalaan tayo na dakerakel a subok niseñgeg ed sikato; dia ed ontan, sikato so pateyen tayo natan, pian ag tayo la manlikna na segsegang makaseñgeg ed saray salita to. Tan nengneng yo, ag nayari ya abuloyan tayo a sikato so manañgoley tayo; lapu ed saya so manepeg ed sikatayo, a papañguloan ya agagi, so mañgoley ed saya a totoo.

4 Natan ag ko la isulat ed saraya a piligo so amin a salita ya inñguroñguro da sumpa ed siak. Balet masarag la ed siak so pañgikuan a nampilpilalekan da ya ekalen so bilay ko.

5 Tan agawa a say Katawan pinasakbayan to ak, a siak, Nephi, so nakaukolan ya ontaynan ed sikara tan ombatik ak ed kalawakan, tan amin iraman so malabay a miolop ed siak.

6 Dia ed ontan, agawa a siak, Nephi, inalak so boleg ko, tan ontan met ed si Zoram tan say boleg to, tan si Sam, say agik a pañguloan tan say boleg to, tan si Jacob tan si Joseph, saray agagik a yugtan, tan ontan met ed saray bibii ya agagik, tan amin a saraman so miolop ed siak. Tan amin a saraman so akiolop ed siak so manisia ed saray pasakbay tan puyan na Dios; dia ed ontan, sikara so dinmeñgel ed saray salitak.

7 Tan intarok mi so saray abong-abong mi ya abel tan antokaman a beñgatla a nayari ya awiten mi, tan nambaroy kami ed kalawakan ed loob na dakel ya agew. Tan dia ed kayari impambaroy mi ed loob na dakel ya agew impaalagey mi so saray abong-abong mi ya abel.

8 Tan saray totook kinaliktan da a saman a pasen so tawagen mi na ñgaran a Nephi; dia ed ontan, saya so tinawag mi a Nephi.

9 Tan amin a saraman so akiolop ed siak kinaliktan da a natawag so inkasikara a dili a totoo nen Nephi.

10 Tan sinumpal mi so saray panañgokom, tan saray pananontunan, tan saray gangan na Katawan ed amin a beñgatla, unong ed gangan nen Moises.

11 Tan say Katawan wala ed sikami; tan inmaliguas kami a mapalalo; tan nantanem kami na saray bokel, tan nanani kami lamet na daakan. Tan ginapoan mi so mamparakel na saray manok, tan saray baka, tan ayayep a nanduroma a nengneng.

12 Tan siak, Nephi, intarok ko met so saray kasulatan a nitatak ed saray piligo a gansa; tan ontan met ed bola, odino agohon, ya imparaan ya onkana ed kinen amak dia ed panamegley na lima na Katawan, unong ed saman so wala a nisulat.

13 Tan agawa a ginmapo kami ya inmaliguas a mapalalo, tan dinmakel kami ed dalin.

14 Tan siak, Nephi, inalak so espada nen Laban, tan saya so inalig ko ed impangawa ed dakerakel a espada, ag la piga saray totoo a tatawagen natan na Lamanite so onsalong ed sikami tan sikami so deralen da; lapu ed amtak so pasnok da ed siak tan saray anak ko tan saray totoo a atawag ed ñgaran ko.

15 Tan binañgatan ko so saray totook ed panaggawa na saray paalagey, tan panagkimey ed antokaman a kanengneñgan na kiew, tan balatyang, tan tanso, tan gansa, tan asero, tan balitok, tan pilak, tan saray ankabli a bato, a saraya narumog a daakan.

16 Tan siak, Nephi, so añgipaalagey na templo; tan say inkagawa to miolibay ed templo nen Solomon likud ed ag nipaalagey ed saray dakel ya ankabli a beñgatla; lapu ed saraya so ag narumog ed saya a dalin, dia ed ontan, ag agawa a kapara na templo nen Solomon. Balet say indeñgan na talindeg to so siñga templo nen Solomon; tan say inkagawa to mapalalo ed dakep.

17 Tan agawa a siak, Nephi, so lapuan kanian saray totook so makuli, tan nansagpot ed saray dili a lima da.

18 Tan agawa a labay da ak a manmaliw ya ari ra. Balet siak, Nephi, pilalek ko ya angapo so onletaw ya ari; manwari ya ontan, ginawak ed sikara so unong ed saray pakapanyarik.

19 Tan nengneng yo, saray salita na Katawan so asumpal ed saray agagik, a sinalita to nipaakar ed sikara, a siak so manañgoley tan managbañgat da. Dia ed onia, siak so nanmaliw a manañgoley tan managbañgat da, unong ed saray gangan na Katawan, anga ed isabi na panaon a pampilalekan da ya ekalen so bilay ko.

20 Dia ed ontan, say salita na Katawan ed siak so asumpal, a nankuan: No ag da deñgelen so saray salitam, sikara so nasian ed kawalaan na Katawan. Tan nia, sikara so nisian ed kawalaan to.

21 Tan pinasabi to so sakey ya ayew ed sikara, on, iñgen sakey ya ansakit ya ayew, lapu ed kaugesan da. Tan nia, pinaawet da so saray puso ra sumpa ed sikato, lapu ed sikara so nanmaliw a siñga pamingki; dia ed ontan, manwari ya amputi ra, tan mapalalo so gangana tan makaay-ayat, pian ag ira makatanguyor ed saray totook say Katawan a Dios impanmaliw to so baog ya andeket so onsabi ed sikara.

22 Tan onia so inkuan na Katawan a Dios: Gawaen ko ra a makadimla ed saray totoom, likud no mambabawi ra ed saray kaugesan da.

23 Tan naayew so boleg na siopaman a milaok ed saray boleg da; tan sikara so naayew na anga ed saman lamlamang ya ayew. Tan say Katawan so nansalita ed saya, tan saya so agawa.

24 Tan makaseñgeg ed ayew a wala ed sikara, nanmaliw ira a totoo a managmeneng, napno na panagsaol tan kasiliban, tan dia ed otel na katakelan so pananopan da ed saray ayayep a pambilay da.

25 Tan say Katawan a Dios inkuan to ed siak: Sikara so salot ed saray boleg mo, pian pagalawen da ra ed pakanodnunot ed siak; tan unong no ag da ak nanunotan, tan ondeñgel ed saray salitak, sikara so nabakbak anga ed kaderal.

26 Tan agawa a siak, Nephi, pinasantok si Jacob tan si Joseph, pian sikara so nagawa a sacerdote tan managbañgat ed tapew na dalin ed saray totook.

27 Tan agawa a sikami so nambilay unong ed kanengneñgan na liket.

28 Tan talomplo a taon la so linmabas nanlapu ed panaon ya insipot mi ed Jerusalem.

29 Tan siak, Nephi, intatak ko so saray kasulatan ed saray dili a piligok, a saraya ginawak, nipaakar ed saray totook anga ed saya a bekta.

30 Tan agawa a say Katawan a Dios so nankuan ed siak: Mangawa ka ni na arum a piligo, tan sika so mañgitatak na dakel a beñgatla ed saraya nipaakar ed saray maong ed imaton ko, onkana ed pinanabang na saray totoom.

31 Dia ed ontan, siak, Nephi, dia ed katotulok ko ed saray gangan na Katawan, siak so linma tan nangawa ak na saray piligo a saya so añgitatakan ko ed saraya a beñgatla.

32 Tan intatak ko so antokaman a makapaliket ed Dios. Tan no saray totook so maliket ed saray beñgatla a nipaakar ed Dios sikara so manliket ed saray intatak ko a saraya so lugan na piligo.

33 Tan no saray totook pilalek da a nakabatan so beñgatla a kabiañgan na awaran na saray totook, sukaiten da ed saray sananey a piligok.

34 Tan masarag la so pañgibagak ya apataplo a taon la so linmabas tan awalaan kami la na saray bakal tan baliñgaan ed saray agagimi.