1 Tan natan siak, Jacob, mansalita ak lamet ed sikayo, inararok a kaagian, nipaakar ed say matunong a sañga a saya so asalitak la.

2 Tan nia, saray sipan ya agamoran tayo so nigena a sipan ed sikatayo nipaakar ed inkalaman; dia ed ontan, unong ed nipatnag ed siak dakel ed saray anak tayo so ompatey ed laman lapu ed ag-pananisia, angaman ontan, say Dios mapañgasi ed saray dakel; tan saray anak tayo so nipawil, pian onasinger ira ed saman so mañgiter ed sikara na tua a pikakabat nipaakar ed Mananundon da.

3 Dia ed ontan, unong ed nikuan ko ed sikayo, nakaukolan a si Cristo—dia ed saman so sampot a labi ya akisalita ed siak so angel saya so ñgaran to—so onsabi ed limog na saray Judio, dia ed limog na saray lalo a makasalanan a kabiañgan na mundo; tan sikato so ipasak da ed krus—tan onia so kaliktan na Dios tayo, tan angapo so arum a bansa ed dalin so mañgipasak ed krus ed Dios da.

4 Tan sano saray makapakelaw a milagro so niiter ed limog na saray arum a bansa sikara so mambabawi, tan nakabatan da a sikato so Dios da.

5 Balet lapu ed saray kasiliban na sacerdote tan karelmeñgan, saray wala ed Jerusalem patalkeren da so saray teñger da sumpa ed sikato, kanian sikato so nipasak ed krus.

6 Dia ed ontan, makaseñgeg ed saray karelmeñgan da, kadederal, eras, salot, tan pamaterter na dala so onsabi ed sikara; tan saraman so nakeraan ya ag naderal sikara so nataytayak ed amin a bansa.

7 Balet nia, onia so inkuan na Katawan a Dios: Sano onsabi so agew a sikara so manisia ed siak, a siak si Cristo, dia ed ontan siak so akipaknaan ed saray ama ra a sikara so nipawil unong ed laman, dia ed tapew na dalin, ed saray dalin a tawir da.

8 Tan nagawa a sikara so natipon ed abayag ya inkataytayak da, manlapu ed saray kapuloan na dayat, tan manlapu ed apatira a dapag na dalin; tan saray bansa na saray Gentiles sikara so manmaliw a makapanyari ed saray matak, inkuan na Dios, dia ed pañgawit ed sikara ed saray dalin a tawir da.

9 On, saray arari na saray Gentiles so managasikaso ya ama ed sikara, tan saray reyna sikara so manmaliw a managasikaso ya ina ra; dia ed ontan, saray sipan na Katawan so makana ed saray Gentiles, lapu ed sikato so nansalita ed saya, tan siopa so nayari ya onsupiat?

10 Balet nengneng yo, saya a dalin, kuan na Dios, so dalin a tawir yo, tan saray Gentiles so nabendicionan ed saya a dalin.

11 Tan saya a dalin so dalin na kawayañgan ed saray Gentiles, tan angapo so saray arari ed saya a dalin, ya ontalindeg ed saray Gentiles.

12 Tan salimbeñgan ko so saya a dalin sumpa ed saray amin a bansa.

13 Tan siopaman so onlaban sumpa ed Sion, sikato so ompatey, kuan na Dios.

14 Tan nagawa a siopaman a mañgitalindeg na sakey ya ari sumpa ed siak so ompatey, lapu ed siak, a Katawan, say ari na tawen, so manmaliw ya ari ra, tan siak so manmaliw a liwawa ed sikara ed ando la ya ando, ed saraman so ondeñgel ed saray salitak.

15 Dia ed ontan, onkana ed saya a pamaakaran, pian saray paknaan ko so nasumpal a saraya so ginawak ed saray anak na totoo, a saya so gawaen ko ed sikara kaleganan a wala ra ed laman, kaukolan a deralen ko so saray maamot a kimey na kabiluñgetan, tan say panagpatey, tan saray karumsisan.

16 Dia ed ontan, siopaman so onlaban ed Sion, mandapag a Judio tan Gentiles, mandapag ya abalor tan bulos, mandapag a laki tan bii, so ompatey; lapu ed sikara so balangkantis ed amin a dalin; tan saraman so ag miabubon ed siak sikara so sumpa ed siak, kuan na Dios tayo.

17 Tan nagawa a sumpalen ko so saray sipan ko a ginawak ed saray anak na totoo, a saya so gawaen ko ed sikara kaleganan a wala ra ed laman—

18 Dia ed ontan, inararok a kaagian, onia so inkuan na Dios tayo: Ipaliknak so segsegang ed saray boleg mo ed panamegley na lima na saray Gentiles; manwari ya ontan, palemeken ko so puso na saray Gentiles, pian manmaliw ira a siñga sakey ya ama ed sikara; dia ed ontan, saray Gentiles so nabendicionan tan naibilang ed limog na kailalakan na Israel.

19 Dia ed ontan, pasantoen ko so saya a dalin ya onkana ed saray boleg mo, tan saraman met so nibilang ed limog na saray boleg mo, ed ando la ya ando, ya onkana a dalin a tawir da; lapu ed saya so dalin ya apili-pili, inkuan na Dios ed siak, ed amin a dalin, dia ed ontan gawaen ko ya amin a totoo a manaayam ed saya so mañgigalang ed siak, inkuan na Dios.

20 Tan natan, inararok a kaagian, lapu ed pakanengneng tayo a say mapañgasi a Dios tayo so añgiter na onia la a kabaleg a kakabatan nipaakar ed saraya a beñgatla, sikato so nunoten tayo, tan ipulisay tayo so saray kasalanan tayo, ya ag tayo itetewek so saray ulo tayo, lapu ed ag itayo nibantak ed paway; manwari ya onia, a sikatayo so pinaway ed dalin a tawir tayo; balet sikatayo so nitunton ed magmaong a dalin, lapu ed say Katawan ginawa to so dayat a dalan tayo, tan wala tayo ed sakey a pulo ed dayat.

21 Balet makana so saray sipan na Katawan ed saraman so wala ed pulo na dayat; lapu ed asalambit so saray pulo, sirin wala ni so arum likud ed saya, tan sikara so panaayaman na saray kaagian tayo.

22 Tan nengneng yo, say Katawan a Dios so añgitunton ed sikara a paarawi ed panapanaon manlapu ed kailalakan na Israel, unong ed linawa tan kaliktan to. Tan natan nia, say Katawan sinonunot ed sikara ya amin ya asipi, dia ed ontan sikato so sinonunot met ed sikatayo.

23 Dia ed ontan, paliket yo so saray puso yo, tan nunot yo a sikayo so bulos a mangawa na onkana ed sikayo—a mampili ed dalan na andi-angaan a patey odino say dalan na andi-angaan a bilay.

24 Dia ed ontan, inararok a kaagian, ipulang yo so inkasikayo unong ed linawa na Dios, tan aliwa ya unong ed linawa na demonyo tan say laman; tan nunoten yo, kayari impipulañgan yo ed Dios, a dia ed saya labat tan panamegley na gracia na Dios kanian sikayo so nilaban.

25 Dia ed ontan, say Dios ibañgon to kayo a manlapu ed patey lapu ed pakapanyari na kioli ed bilay, tan manlapu met ed angapo so angaan a patey unong ed pakapanyari na bagat a pamaandi na kasalanan, pian naawat kayo ed andi-angaan a panarian na Dios, pian sikayo so mañgidayew ed panamegley na madivino a gracia. Amen.