1 Balet nia, wala so dakel—dia ed saman ya agew sano ituloy ko so mangawa na sakey a makapakelaw a kimey ed limog da, pian nunoten ko so saray paknaan a ginawak ed saray anak na totoo, pian iteen ko lamet so limak ed komadua a panaon pian bawien ko so saray totook, a sikara so wala ed kailalakan na Israel;

2 Tan ontan met, pian nanunotan ko so saray sipan a ginawak ed sika, Nephi, tan ontan met ed kinen amam, pian nanunotan ko so saray boleg mo; tan saray salita na saray boleg mo so ompaway manlapu ed sañgik ya onla ed saray boleg mo; tan saray salitak so ombanesbes ya anga ed sampot na dalin, onkana a pañgaligan na saray totook, a sikara so wala ed kailalakan na Israel;

3 Tan lapu ed saray salitak sikara so ombanesbes—dakel ed saray Gentiles so mankuan: Sakey a Biblia! Sakey a Biblia! Akala kami la na Biblia, tan angapo la so arum ni a Biblia.

4 Balet onia so inkuan na Katawan a Dios: O makulang-kulang, sikara so awalaan na Biblia; tan saya so manlapu ed saray Judio, saray kadaanan a paknaan a totook. Tan anto so pisalamatan da ed saray Judio ya añgawatan da na Biblia? On, anto so labay ya ibaga na saray Gentiles? Nanunotan da kasi so saray panagsubok, tan saray sagpot, tan saray irap na saray Judio, tan say seet da niseñgeg ed siak, ed impañgawit na kilalaban ed saray Gentiles?

5 O sikayo a Gentiles, anunotan yo kasi so saray Judio, saray kadaanan a paknaan a totook? Andi; balet sikara so inayew yo, tan sikara so binusol yo, tan ag yo inanap so pambawi ed sikara. Balet nengneng yo, ipawil ko so saraya a beñgatla ed dili ya ulo yo; lapu ed siak a Katawan ag ko alingwanan so saray totook.

6 Sika a makulang-kulang, a mankuan: Sakey a Biblia, awalaan kami na sakey a Biblia, tan ag mi la kaukolan so Biblia. Awalaan kayo kasi na Biblia likud no saya so nanlapu ed saray Judio?

7 Ag yo kasi kabat a wala ni so arum a bansa nen say sakey? Ag yo kasi kabat a siak, a Katawan say Dios yo, so amalsa ed amin a totoo, tan nunoten ko so saray wala ed pulo na dayat; tan siak so manuoley ed saray katawenan ed tagey tan dalin a wala ed leksab; tan awiten ko ya ipaway so saray salitak ed anak na totoo, on, angan dia ed amin a bansa na dalin?

8 Dia ed ontan manñguroñguro kayo, lapu ed makaawat kayo na dakel ed saray salitak? Ag yo kasi kabat a say pamaneknek na duara a bansa so tasi ed sikayo a siak so Dios, a nunoten ko so sakey a bansa a siñga sananey? Dia ed ontan, siak so mansalita ed saman lamlamang a salita ed sakey a bansa a siñga dia ed sananey. Tan sano saraman so duara a bansa so onkurang a mankasakey dia ed pamaneknek na duara a bansa saya so onkurang a mankasakey met.

9 Tan saya so gawaen ko pian paneknekan ko ed dakel a siak so ag mañgoman sanen karoman, natan, tan dia ed ando la ya ando; tan mansalita ak na saray salita unong ed dili a kaliktan ko. Tan lapu ed nansalita ak na sakey a salita ag yo ipapasen ya ag ak la makapambalikas na sananey; lapu ed say kimey ko ag ni asumpal; ni say saya so nasumpal anga ed kasampotan na too, ni say manlapu ed saman a panaon tan dia ed ando la ya ando.

10 Dia ed ontan, lapu ed awalaan kayo na sakey a Biblia ag yo ipapasen a lugan to so amin a salitak; ni say ipasen ya ag ko nigangan a dakel ni so nisulat.

11 Tan igangan ko so amin a too, mandapag dia ed bokig tan dia ed sagur, tan dia ed baybay, tan dia ed abalaten, tan dia ed saray pulo na dayat, ya isulat da so saray salita a sinalitak ed sikara; tan manlapu ed lugan na saray libro a nisulat okomen ko so mundo, balang sakey a too unong ed saray kimey to, unong ed saman so nisulat.

12 Tan nengneng yo, mansalita ak ed saray Judio tan sikara so mañgisulat ed saya; tan mansalita ak met ed saray Nephite tan sikara met so mañgisulat ed saya; tan mansalita ak met ed saray arum a tribo ed kailalakan na Israel, a sikara so intunton ko ed arawi, tan sikara so mañgisulat ed saya; tan mansalita ak met ed amin a bansa na dalin tan sikara so mañgisulat ed saya.

13 Tan nagawa a saray Judio so nawalaan na saray salita na saray Nephite, tan saray Nephite so nawalaan na saray salita na saray Judio; tan saray Nephite tan saray Judio so nawalaan na saray salita na saray abalang a tribo na Israel; tan saray abalang a tribo na Israel so nawalaan na saray salita na saray Nephite tan saray Judio.

14 Tan nagawa a saray totook, a wala ed kailalakan na Israel, so natipon ed panagayaman ed saray dalin a kayarian da; tan saray salitak met so natipon a mankasakey. Tan ipanengneng ko ed saraman so onlaban sumpa ed saray salitak tan sumpa ed saray totook, a sikara so wala ed kailalakan na Israel, a siak so Dios, tan siak so akipaknaan ed si Abraham a nunoten ko so saray boleg to ed ando la ya ando.