1 Tan natan agawa a siak, Nephi, kayarik a binasa so saray beñgatla ya akatatak ed piligo a gansa, saray kaagian ko so dinmago ed siak tan inkuan da ed siak: Anto so talus na saray beñgatla a binasam? Nia, nayari kasi a saraya so talusan unong ed beñgatla a maespiritu, a saraya so nagawa unong ed espiritu aliwa a dia ed laman?

2 Tan siak, Nephi, inkuan ko ed sikara: Nia, saraya so nipatnag ed profeta ed panamegley na voces na Espiritu; tan dia ed panamegley na Espiritu say amin a beñgatla so nipakabat ed saray profeta, a saya so onsabi ed anak na saray totoo unong ed laman.

3 Dia ed ontan, saray beñgatla ya imbasak so saray beñgatla nipaakar ed mandapag ya inkalaman tan maespiritu; lapu ed napatnagan a say kailalakan na Israel, dia ed magano odino dia ed arapen, so nitaytayak ed amin a tapew na dalin, tan ontan met ed limog na amin a bansa.

4 Tan nengneng yo, dakel so saray abalang la ed pikakabat ed saraman so wala ed Jerusalem. On, say karaklan a kabiañgan na amin a tribo so niwanwan ed arawi; tan sikara so ataytayak a nampawil-pawil ed saray kapuloan ed dayat; tan no iner so kawalaan da angapo ed sikami so makapikabat, likud ed pikakabat tayo ya amin so niwanwan ed arawi.

5 Tan lapu ed sikara so niwanwan ya inmarawi, saraya a beñgatla so niprofesiya nipaakar ed sikara, tan ontan met nipaakar ed amin na saray onsaguinunor ni a nitayak tan nakewkew, lapu ed Masanto a Bugtong na Israel; lapu ed sumpa ra ed sikato paaweten da so saray puso ra; dia ed ontan, sikara so nitaytayak ed limog na amin a bansa tan busolen na amin a totoo.

6 Angaman ontan, kayari a sikara so asikasoen na saray Gentiles, tan say Katawan intagey to so lima to ed saray Gentiles tan sikara so inteen to a sakey a pananontunan, tan inawit da so saray anak da ed saray taklay da, tan saray bibii ya anak da so awiten da ed saray takeb da, nia saraya a beñgatla ya asalita so nipaakar ed inkalaman; tan onia so paknaan na Katawan ed saray kaamaan tayo; tan sikatayo so kipaakaran to ed saray agew ya arapen, tan ontan met ed amin a kaagian tayo a wala ed kailalakan na Israel.

7 Tan say kabaliksan to onsabi so agew a kayari ya amin ya kailalakan na Israel no sikara so nitaytayak tan nakewkew, say Katawan a Dios ipatalindeg to so sakey a makapanyari a bansa ed limog na saray Gentiles, on, angan dia ed tapew na saya a dalin; tan dia ed sikara saray boleg tayo sikara so nitaytayak.

8 Tan kayari a saray boleg tayo so nitaytayak say Katawan a Dios mampatuloy ed pangawa to na sakey a makapakelaw a kimey ed limog na saray Gentiles, a saya so mabli ed saray boleg tayo; dia ed ontan, siñga met lamlamang mipara a nantalima ed sikara so saray Gentiles tan sikara so inawit da ed saray taklay da tan ed saray takeb da.

9 Tan saya met so nawalaan na kakanaan ed saray Gentiles; tan aliwa labat ed saray Gentiles no ag iñgen dia ed amin a kailalakan na Israel, onkana ed pañgipakabat ed saray paknaan na Ama na tawen ed si Abraham, a kuan to: Dia ed saray boleg mo amin a sankakanayon ed dalin so nabendicionan.

10 Tan pilalek ko, kaagian ko ra, a nepeg yo a kabaten ya amin a sankakanayon ed dalin so ag nabendicionan likud no ipanengneng to so taklay to ed mata na amin a bansa.

11 Dia ed ontan, say Katawan a Dios ipatuloy to ya ipanengneng to ed taklay to ed amin a mata na saray bansa, ed kiparungtal na paknaan to tan say Evangelio to ed saray kabiañgan na kailalakan na Israel.

12 Dia ed ontan, sikara so awiten to lamet ya ipaway ed inkadakep, tan sikara so natipon ed saray dalin a tawir da; tan sikara so nipaway ed ag-pikakabat tan dia ed kabiluñgetan; tan nakabatan da a say Katawan sikato so Manañgilaban tan Mananundon da, say Makapanyari a Bugtong na Israel.

13 Tan say dala na saman so baleg tan marumsis a simbaan, a saya so balangkantis ed amin a dalin, saya so ompawil ed saray dili ya ulo ra; tan sikara so mambabakal ed limog da a dili, tan say espada ed saray dili a lima da so ondapo ed saray dili ya ulo ra, tan sikara so nabuek ed saray dili a dala ra.

14 Tan balang sakey a bansa a mibakal sumpa ed sika, O kailalakan na Israel, sikato so ompoliktar ed sakey sumpa ed sananey, tan sikara so napelag ed abot a kinutkot da a mamatit ed saray totoo na Katawan. Tan amin ya onlaban sumpa ed Sion so naderal, tan saman so baleg a balangkantis, a saya so nampikewet ed saray maptek a dalan na Katawan, on, saman so baleg tan marumsis a simbaan, so niparukol ed sapok tan agay la a kabaleg so kapelag na saya.

15 Tan nengneng yo, kuan na profeta, say panaon masiglat ya onsabi a si Satanas naandi la so pakapanyari to ed puso na saray anak na totoo; lapu ed say agew magano la ya onsabi ya amin na saray mapaatagey tan saraman so marelmeng so manmaliw a siñga ñgapos; tan onsabi so agew a sikara so poolan.

16 Tan say panaon magano la ya onsabi a say inkagnap na sanok na Dios so onkalbo ed amin ya anak na totoo; lapu ed ag to itepel a saray marelmeng deralen da so saray matunong.

17 Dia ed onia, iagel to so saray matunong ed panamegley na pakapanyari to, angan no bilang onsabi so nagnap a sanok to, tan saray matunong so niagel, angan dia ed kaderal na saray kabusol da ed panamegley na apoy. Dia ed ontan, saray matunong ag nakaukolan ya ontakot; tan onia so inkuan na profeta, sikara so nilaban, angan dia ed apoy.

18 Nia, kaagian ira, ikuan ko ed sikayo, a saraya a beñgatla ag la mambayag onsabi; on, angan say dala, tan say apoy, tan say kelpa na asewek so ag-nasaew ya onsabi; tan kaukolan a dia ed tapew na saya a dalin; tan saya so onsabi ed saray totoo unong ed laman no bilang paaweten da so saray puso ra sumpa ed Masanto a Bugtong na Israel.

19 Tan nengneng yo, saray matunong so ag nabalang; tan petepeteg a say panaon so onsabi ya amin na saray onlaban sumpa ed Sion so nataksing.

20 Tan say Katawan andi-saew a mañgiparaan na dalan ya onkana ed saray totoo to, pian nasumpal so saray salita nen Moises, a sinalita to, a kuan to: Sakey a profeta na Katawan a Dios yo so italindeg to ya onkana ed sikayo, a siñga siak; sikato so deñgelen yo ed amin a beñgatla ya antokaman ya ibaga to ed sikayo. Tan nagawa a siopaman so ag ondeñgel ed saman a profeta sikato so nataksing ed limog na saray totoo.

21 Tan natan siak, Nephi, ibawag ko ed sikayo, a saya a profeta a sinalita nen Moises sikato so Masanto a Bugtong na Israel; dia ed ontan, sikato so mangawa na panañgokom ed inkamatunong.

22 Tan saray matunong ag nakaukolan ya ontakot, lapu ed sikara so ag nakewkew. Balet saman so panarian na demonyo, a saya so nipaalagey ed limog na anak na saray totoo, a saya a panarian so niletneg ed limog na saraman so wala ed inkalaman—

23 Tan say panaon masiglat ya onsabi ya amin a simbaan a nipaalagey ed gagala a pakagungona, tan amin na saray nipaalagey pian makagamor na pakapanyari ed laman, tan saraman so nipaalagey pian manmaliw a bantog ed mata na mundo, tan saraman so panseseetan da ya anapen so alak na laman tan saray beñgatla a minomundo, tan mangagawa na amin a kanengneñgan na karelmeñgan; on, dia ed antikey, amin na saraman so kabiañgan na panarian na demonyo sikara so nakaukolan ya ontakot, tan ongiwgiw, tan ompayegpeg; sikara so nakaukolan a naawit ya ondakmomo ed sapok; sikara so naopot a napoolan a siñga ñgapos; tan saya so unong ed salita na profeta.

24 Tan say panaon masiglat ya onsabi pian saray matunong so nitunton a siñga kilaw na baka ed saray panañgipukokan, tan say Masanto a Bugtong na Israel so nakaukolan a mañgoley ed lapag, tan biskeg, tan pakapanyari, tan baleg a gloria.

25 Tan tiponen to so saray anak to a manlapu ed apatira a suyok na dalin; tan bilañgen to so saray karnero to, tan sikato so kabat da; tan wala so saksakey ya olop na papastolan tan saksakey a managpastol; tan pakanen to so saray karnero to, tan dia ed sikato narumog da so panagpastulan.

26 Tan lapu ed inkamatunong na saray totoo to, si Satanas angapo la so pakayari to; lapu ed onia, sikato so ag nabulosan ed andukey a panaon; tan angapo la so pakapanyari to ed puso na saray totoo, lapu ed sikara so manaayam ed inkamatunong, tan say Masanto a Bugtong na Israel so mañgoley.

27 Tan natan nia, siak, Nephi, ikuan ko ed sikayo a saraya ya amin a beñgatla so onsabi unong ed laman.

28 Balet nia, amin a bansa, sankakanayon, salita, tan totoo so manayam ya ag-nasigen-sigen ed Masanto a Bugtong na Israel no sikara so mambabawi.

29 Tan natan siak, Nephi, sampotan ko la; lapu ed ag ko nayarian so mansalita natan na arum ni nipaakar ed saraya a beñgatla.

30 Dia ed ontan, kaagian ko, pilalek ko ya ipasen yo a saraman so beñgatla a nisulat ed saray piligo a gansa so tua; tan paneknekan da a say sakey a too nepeg to so ononor ed saray gangan na Dios.

31 Dia ed ontan, ag yo ipapasen a siak tan si amak labat so nampaneknek, tan nambañgat met ed saraya. Dia ed ontan, no sikayo so ononor ed saray gangan, tan mansiansia ya anga ed sampot, sikayo so nilaban ed kaunoran ya agew. Tan saya so onia. Amen.