1 Tan agawa ya añgigalang ira ed Katawan, tan akila ra ed siak; tan nankimey kami ed saray trozo ed nidumaroma ya inkagawa. Tan say Katawan impanengneng to ed siak ed panapanaon no anto a kanengneñgan so pankimey ko ed saray trozo ya ikana mi ed bapor.

2 Natan siak, Nephi, ag ko kinimeyan so saray trozo unong ed kanengneñgan a naaral na saray totoo, ni say ginawak so bapor unong ed kanengneñgan na saray totoo; balet ginawak so saya unong ed kanengneñgan ya impanengneng ed siak na Katawan; dia ed ontan, saya so aliwa ya unong ed kanengneñgan na too.

3 Tan siak, Nephi, linma ak ed sakey a pukdol a palanang, tan nampikasi ak a palanang ed Katawan; dia ed onia say Katawan impanengneng to ed siak so saray baleg a beñgatla.

4 Tan agawa a kayarik ya asumpal so bapor, unong ed salita na Katawan, saray agagik anengneng da a maong, tan say kanengneñgan na inkagawa to so marakerakep; dia ed onia, nampaabeba ra ed inkasikara a dili lamet ed arapan na Katawan.

5 Tan agawa a say voces na Katawan sinmabi ed kinen amak, a sikami so onla ed bapor.

6 Tan agawa a dia ed kaimbuasan, kayari ya imparaan mi so amin a beñgatla, dakel a buñga tan karne a nanlapu ed kalawakan, tan sawaan a dilo, tan saray tagano mi ya unong ed ingangan na Katawan, linmoob kami la ed bapor ya awit mi ya amin a nakaukolan mi tan saray bokel, tan amin a beñgatla ya awit mi, balang sakey unong ed taon to; dia ed ontan, linmugan kami la ed bapor, a kaiba mi so kaasawaan mi tan saray anak mi.

7 Tan natan, si amak nanilalak na duara a laki ed kalawakan, say pañguloan tinawag to na Jacob tan say yugtan tinawag to a Joseph.

8 Tan agawa a kayari mi a linmugan ed bapor, tan inawit mi so saray nakaukolan mi a tagano tan saray beñgatla a nigangan ed sikami, iniakar mi ed danum so bapor tan sikami so sinunson na mabiskeg a dagem ya amaarap ed dalin a sipan.

9 Tan kayari a sikami so sinunson na dagem ed dakel ya agew, nia, saray agagik tan saray lalaki ya anak nen Ishmael tan ontan met ed saray kaasawaan da ginapoan da so manliliket ed inkasikara, lapu ed saya sikara so nansasayaw, tan nancancion, tan nansalita ra na salita a magasal, on, lapu ed alingwanan da la no anto a pakapanyari so añgawit ed sikara diman; on, nipaatagey ira ed mapalalo ya inkagasal.

10 Tan siak, Nephi, ginmapo ak ya ontakot a mapalalo ag la piga onsanok so Katawan ed sikami, tan bakbaken to kami lapu ed saray inkauges mi, ompano sikami so akmonen na kaaraleman na dayat; dia ed onia, siak, Nephi, ginapoan ko so mansalita ed sikara ed pananalita a maoyamo; balet nia sikara so nampasnok ed siak, a nankuan: Ag mi labay a say agi mi a laki a yugtan so manmaliw a manañgoley ed sikami.

11 Tan agawa a si Laman tan si Lemuel siningkat da ak tan binalor da ak na lubir, tan say ginagawa ra ed siak so mapalalo a kasebegan; angaman ontan, say Katawan pinaulian to ra pian naipanengneng to so pakapanyari to, onkana ed pakasumpal na saray salita to ya imbalikas to nipaakar ed saray marelmeng.

12 Tan agawa a kayari da ak a binalor lapu ed saya ag ko makagalaw, saman so agohon, ya imparaan na Katawan, so tinmonda a mankimey.

13 Dia ed ontan, ag da amta no iner so pañgipaarapan da ed bapor, a dia ed saya linmesa so sakey a maksil a bagyo, on, sakey a mabiskeg tan makapataktakot a bagyo, tan asunson kami a papawil ed tapew na saray danum ed loob na talora ya agew; tan ginmapo ira a mankebyew a mapalalo ag la piga sikara so nalener ed dayat; angaman ontan ag da ak ni inukbaran.

14 Tan dia ed komapat ya agew ya inkasunson mi a papawil, say bagyo so kinmasil a mapalalo.

15 Tan agawa a ñgalñgali kami la naakmon ed kaaraleman na dayat. Tan kayari a sikami so asunson a papawil ed tapew na danum ed loob na apatira ya agew, saray kaagian ko ginmapo a nanengneng da la so panañgokom na Dios ya ondadapo ed sikara, tan nakaukolan ya ompatey ira likud no mambabawi ra ed saray kaugesan da; dia ed onia, linma ra ed siak, tan inukbar da so balor ed saray ñgaloñgaluan ko, tan nia saraya so linmarag la a maong; tan ontan met ed saray kalit-kalit ko so linmalarag la a maong, tan agay la so sakit da.

16 Angaman ontan, tinmañgay ak ed Dios ko, tan indaydayew ko a sanagew; tan ag ak nanñguroñguro sumpa ed Katawan lapu ed saray impanirap ko.

17 Natan si amak, a Lehi, so añgibalikas na dakel a beñgatla ed sikara, tan ontan met ed saray lalaki ya anak nen Ishmael; balet, nia, nambesñgaw ira na dakel a pantaktakot sumpa ed siopaman a mansalita a mañgiansakit ed siak; tan lapu ed saray atateng ko so mabublay la ra lapu ed dakel a panaon, tan nantepel la ra na dakel ya ermen lapu ed saray anak da, sikara la so makapoy, on, angan dia ed saray dukolan da.

18 Lapu ed kaermenan da tan baleg ya ermen, tan say kaugesan na saray kaagian ko, sikara so niasinger angan dia ed saya a panaon a miarap ira ed Dios da; on, say ubanan la a buek da so ñgalñgali la a niparukol a nidasay ed sapok; on, angan sikara so asinger la a nibantak a katekep so ermen ed lubok a danum.

19 Tan si Jacob tan si Joseph met, lapu ed malangwer ni ra, nakaukolan da ni so dakel a panagtagano, so maermen lapu ed saray irirap nen ina ra; tan ontan met nen asawak a wala so lua to tan pikakasi, tan ontan met ed saray ilalak ko, ag da apalemek so puso na saray kaagian ko pian siak so ukbaran da.

20 Tan angapo la so antokaman likud ed pakapanyari na Dios, a sikato so anaktakot ed sikara na kadederal, so nayari a mamalemek ed saray puso ra; dia ed ontan sanen anengneng da a ñgalñgali la ra naakmon ed kaaraleman na dayat sikara so nambabawi ed saray beñgatla a ginawa ra, lapu ed saya inukbaran da ak.

21 Tan agawa a kayari da ak ya inukbaran, nia, inalak so agohon, tan saya so nankimey unong no iner so pilalek ko. Tan agawa a nampikasi ak ed Katawan; tan kayarik a nampikasi say dagem so tinmonda, tan say bagyo tinmonda, tan wala so baleg a linak.

22 Tan agawa a siak, Nephi, so añgitunton ed bapor, kanian nanlayag kami lamet ya onarap ed dalin a sipan.

23 Tan agawa a kayari na impanlayag mi ed dakel ya agew akasabi kami ed dalin a sipan; tan sinmakbit kami ed dalin, tan impaalagey mi so saray abong-abong mi ya abel; tan tinawag mi so saya a dalin a sipan.

24 Tan agawa a ginapoan mi a bokalkalen so dalin, tan ginapoan mi so mantanem na saray bokel, on, intanem mi ya amin so bokel ed dalin, a saraya so awit mi a nanlapu ed Jerusalem. Tan agawa a saraya so tinmubo a mapalalo ed bona; dia ed ontan, abendicionan kami na daakan.

25 Tan agawa ya asukayan mi ed saya a dalin na sipan, dia ed impambaroy mi ed kalawakan, a wala so saray atap ya ayayep ed kakiewan ed nanduroma a nengneng, baka tan say kalakian a baka, asno tan say kabayo, tan say kanding tan atap a kanding, tan amin a nengneng na atap ya ayayep, ya onkana ed saray totoo. Tan arumog mi so amin a nengneng na bato, mandapag a balitok, tan pilak, tan tanso.