1 Tan agawa a kayari mi ya amaarap ed kalawakan a kawalaan nen amak, nia, sikato so napno na gayaga, tan ontan met nen inak, a si Sariah, mapalalo so liket to, lapu ed sikato so peteg a nanermen makaseñgeg ed sikami.

2 Lapu ed impasen to ya inatey kami la ed kalawakan; tan sikato met so nandalem sumpa ed si amak, ya ibabaga to ed sikato a sikato so sakey a too a makanengneng na saray payawar; ya inkuan to: Nengneng mo sika so añgiwanwan ed sikami a nanlapu ed dalin a tawir tayo, tan saray anak ko a lalaki angapo la ra, tan ompatey tayo ed kalawakan.

3 Tan dia ed onia a nengneng na salita so impandalem nen inak sumpa ed kinen amak.

4 Tan agawa a si amak so nansalita ed sikato, a nankuan: Kabat ko a sakey ak a too a makanengneng ed saray payawar; tan no ag ko anengneng so saray beñgatla a nipaakar ed Dios ed sakey a payawar ag ko komon akabatan so kamaoñgan nipaakar ed Dios, balet no nanayam ak ed Jerusalem, tan inatey ak met a kaiba na saray kaagian ko.

5 Balet nengneng yo, agamoran ko so dalin a sipan, a nipaakar ed saraya a beñgatla siak so nangayaga; on, tan kabat ko a say Katawan ilaban to so saray anak ko ed saray lima nen Laban, tan awiten da ra lamet ed sikatayo dia ed kalawakan.

6 Tan dia ed onia a nengneng na salita nen amak, a si Lehi, aligliwa si inak, a Sariah, nipaakar ed sikami, legan a nambaroy kami ed kalawakan a mamaarap ed dalin na Jerusalem, pian nagamoran mi so kasulatan na saray Judio.

7 Tan sanen akapawil kami ed abong-abong ya abel nen amak, nengneng yo say gayaga ra so napno, tan si inak so aligliwa.

8 Tan sikato so nansalita, a nankuan: Natan kabat ko a peteg a say Katawan ingangan to so asawak ya ontaynan ya onla ed kalawakan; on, tan kabat ko met a peteg a say Katawan iniagel to so saray anak ko a lalaki, tan inlaban to ra ed saray lima nen Laban, tan initer to ed sikara so pakapanyari a pakasumpal ed beñgatla ya ingangan na Katawan ed sikara. Tan dia ed onia a nengneng na salita sikato so nambalikas.

9 Tan agawa a nangayaga ra a mapalalo, tan añgisaklang ira na bagat tan pinoolan a bagat ed Katawan; tan akisalamat ira ed Dios na Israel.

10 Tan kayari ra ya añgiter na pisasalamat ed Dios na Israel, si amak, a Lehi, inala to so saray kasulatan ya akatatak ed piligo a gansa, tan sinukayan to a nanlapu ed gapo.

11 Tan amuria to a nilugan diman so saray limara a libro nen Moises, ya añgiter na kasulatan na inkapalsa na mundo, tan ontan met ed si Adan tan si Eva, a sikara so unaan ya ateng tayo;

12 Tan ontan met ed kasulatan na saray Judio a manlapu ed gapo, ya anga ed ingapo na oley nen Sedekias, ari na Juda;

13 Tan ontan met ed saray profesiya na saray masanto a profeta, a manlapu ed gapo, ya anga ed ingapo na oley nen Sedekias; tan ontan met ed saray dakel a profesiya a sinalita ed panamegley na sañgi nen Jeremias.

14 Tan agawa a si amak, a si Lehi, arumog to met ed saray piligo a gansa so listaan na kapolian na saray kaamaan to; dia ed ontan akabatan to a sikato so sakey a kapolian nen Jose; salanti, si Jose a sikato so anak nen Jacob, a sikato so inlako ed Egipto, tan sikato so iniagel na lima na Katawan, pian sikato so mañgiagel komon ed si ama to, ya Jacob, tan amin a kabobung to ed ipatey da makaseñgeg ed eras.

15 Tan sikara met so inukbar to ed inkadakep tan pinmaway ira ed dalin na Egipto, na saman lamlamang a Dios ya añgiagel ed sikara.

16 Tan onia si amak, a si Lehi, nalmo to so listaaan na kapolian na saray kaamaan to. Tan si Laban so sakey met a kapolian nen Jose, dia ed ontan sikato tan saray kaamaan to so añgisinop ed say kasulatan.

17 Tan natan sanen si amak anengneng to so saraya a beñgatla, sikato so napno na Espiritu, tan ginmapo a mamprofesiya nipaakar ed saray boleg to—

18 A saraya a piligo a gansa so makadateng ed amin a bansa, sankakanayon, salita, tan totoo a nanlapu ed boleg to.

19 Dia ed ontan, inkuan to a saraya a piligo a gansa so magnayon ya ag naderal; ni say pakuyepen na panaon. Tan sikato so namprofesiya na dakel a beñgatla nipaakar ed boleg to.

20 Tan agawa ya onia a siak tan si amak sinumpal mi so saray gangan unong ed ingangan na Katawan ed sikami.

21 Tan agamoran mi so saray kasulatan ya ingangan na Katawan ed sikami, tan sinokait mi so saraya tan nalmo mi a saraya so pampilalekan; on, angan ed baleg a kakanaan ed sikami, pian pagnayonen mi so saray gangan na Katawan ed saray anak mi.

22 Dia ed ontan, sakey a karonuñgan ed Katawan a nepeg mi ya awiten iraya ed inkasikami, legan a nambaroy kami ed kalawakan ya onarap ed dalin na sipan.