1 Talineng tan deñgel yo so saya, O kailalakan nen Jacob, sikayo ya atawag ed ñgaran ya Israel, tan nanlapu a linmimwas ed saray danum na Juda, odino dia ed paway na saray danum na biniag, a sikayo so nansamba ed ñgaran na Katawan, tan bitlaen da so Dios na Israel, iñgen ag ira mansamba ed katuaan odino dia ed inkamatunong.

2 Angaman ontan, tawagen da so inkasikara a kabiañgan na masanto a ciudad, balet ag da pagnayonen so inkasikara ed Dios na Israel, a sikato so Katawan na saray Ejercito; on, Katawan na saray Ejercito so ñgaran to.

3 Nengneng mo, abitlak la so saray beñgatla a linmabas manlapu ed gapo; tan saraya so imbesñgaw na sañgik, tan impanengneng ko ed sikara. Impanengneng ko ed sikara ed saya a bekta.

4 Tan saya so ginawak lapu ed kabat ko a sika so beñger, tan say beklew mo so binmalatyang a laman, tan saray kirep mo so gansa;

5 Tan angan nanlapu la ed gapo imparungtal ko ed sika; sakbay na kagawa to nia impanengneng ko ed sika; tan saya so impanengneng ko lapu ed takot ko ya ompano ikuan mo—Say talintaok so ag nangawa ed saraya, tan say pinanday a talintaok, tan say tinunaw a talintaok so nangangan ed sikara.

6 Anengneng mo tan nadñgel mo ya amin so saraya; tan ag mo kasi labay ya iparungtal ed sikara? Tan impanengneng ko ed sika so saray balo a beñgatla manlapu ed saya a panaon, angan saray beñgatla a wala ed amot, tan ag mo kabat.

7 Saraya so apalsa natan, tan aliwa a nanlapu ed gapo, angan dia ed kasakbayan na agew ya ag mo impakadñgel saraya so niparungtal ed sika, ag la piga ya ikuan mo—Nia saraya so kabat ko.

8 On, tan ag mo ni nadñgel; on, ag mo kabat; on, manlapu ed saman a panaon a saray layag mo ag ni alokasan; lapu ed kabat ko a kaliktan mo so pililimog a panagpalikdo, tan sika so atawag a managkasalanan nanlapu la ed dalem na eges.

9 Angaman ontan, lapu ed kakanaan na ñgaran ko tantanan ko so pasnok ko, tan makaseñgeg ed dayew ko sika so sebelan ko, pian sika so ag ko isian.

10 Tan, nengneng yo, sika so apapinok sika so pinilik ed pugon na kairapan.

11 Onkana ed pankaabigan ko a dili, on, lapu ed pankaabigan ko a dili saya so gawaen ko, lapu ed ag ko nitepel so say ñgaran ko so nadukitan, tan ag ko iter so gloriak ed sananey.

12 Talineng mo ak, O Jacob, tan Israel a tinawag ko, lapu ed siak so sikato; siak so unaan, tan siak met so sampot.

13 Say dili a limak met so añgiteen na letnegan na dalin, tan say kawanan a limak so nampalaknab ed katawenan. Tinawag ko ra labat tan sikara so nanoolop ya inmonor.

14 Amin yo, mantitipon kayo, tan deñgel kayo; siopa ed limog da so añgibaga ed saraya a beñgatla ed sikara? Say Katawan sikara so inararo to; on, tan sumpalen to so saray salita to ya imparungtal to ed sikara; tan gawaen to so kaliktan to ed Babilonia, tan saray taklay to so onsabi ed saray taga-Caldeo.

15 Ontan met, inkuan na Katawan; Siak a Katawan, on, nansalita ak; on, sikato so tinawag ko a mañgiparungtal, sikato so inawit ko, tan gawaen to so dalan to a maaliguas.

16 Ondago kayo ya onasinger ed siak; Ag ak nansalita ed maamot; nanlapu ed gapo, ed saman a panaon a niparungtal ed siak so nansalita; tan say Katawan a Dios, tan say Espiritu to, siak so imbaki to.

17 Tan onia so inkuan na Katawan, a Mananundon mo, say Masanto a Bugtong na Israel; sikato so imbakik, say Katawan a Dios mo so mañgibagat ed sika a minabang, a sikato so mañgitunton ed sika ed dalan iner man so laen mo, saya so ginawa to.

18 O no sika so dinmeñgel ed saray gangan ko—komon say kareenan mo siñga saman so sakey ya ilog, tan say inkamatunong mo siñga saray daluyon na dayat.

19 Say boleg mo met siñga saray buer; saray ilalak mo siñga dalakirik diman; say ñgaran to so komon ag napaksot odino naderal ed arapan ko.

20 Ompaway kayo ed Babilonia, taynan yo a maganat so saray taga-Caldeo, dia ed voces a mancancancion iparungtal yo, ibaga yo, ibalikas yo ya anga ed sampot na dalin; ikuan yo: Say Katawan dinundon to so igagangan to a si Jacob.

21 Tan sikara so ag napgaan; sikara so impañgulo to ed saray kabueran; tan ginawa to a saray danum so onagos manlapu ed baleg a bato ya onkana ed sikara; sinegkal to met so baleg a bato tan pinmesuak so danum a pinmaway.

22 Tan manwari a ginagawa to so saraya ya amin, tan ankakabaleg ni nen saraya, angapo so kareenan, inkuan na Katawan, ed saray marelmeng.