1 Tan agawa a nansalita ak ed saray agagik, ya inkuan ko: Onla tayo lamet ya ontakdang ed Jerusalem, tan matuor itayo ed panumpal ed saray gangan na Katawan; tan nia sikato so mabiskeg nen say amin dia ed dalin, iñgen mabiskeg nen si Laban tan saray limamplo to, on, odino angan say samplo a libo to?

2 Dia ed onia onla tayo ya ontakdang; kaukolan sikatayo so mabiskeg a siñga si Moises; lapu ed tua a nansalita ed saray danum na Ambalañga a Dayat tan abelsay dia tan diman, tan saray ama tayo dinmalan ira, a pinmaway ed inkadakep, ed amaga a dalin, tan saray ñgayew nen Paraon a tinmumbok tan sikara so nalner ed danum na Ambalañga a Dayat.

3 Natan nengneng yo a saya kabat yo saya so tua; tan kabat yo met a sakey ya angel so nansalita ed sikayo; dia ed onia sikayo ni kasi so manduarua? Onla tayo ya ontakdang; say Katawan sarag to ya ilaban to tayo, angan siñga saray ama tayo, tan deralen to si Laban, angan siñga saray taga-Egipto.

4 Natan nen imbalikas ko so saraya a salita, sansia ni so pasnok da, tan nampatuloy ni ra a nanñguroñguro; angaman ontan sikara so tinmumbok ed siak anga ed akasabi kami ed paway na padir na Jerusalem.

5 Tan labi ed saman; tan pinaamot ko ra ed paway na padir. Tan kayari ra ya iniamot so inkasikara, siak, Nephi, linmoob ak a maamot ed ciudad tan linma ak ya amaarap ed abong nen Laban.

6 Tan intunton ak na Espiritu, a dia ed sakbay to nia ag ko ni kabat so saray beñgatla a gawaen ko.

7 Angaman ontan linma ak, tan sanen wala ak la ed asinger na abong nen Laban akanengneng ak na sakey a too, tan sikato so alopbob ed dalin dia ed arapan ko, lapu ed sikato so abuek na alak.

8 Tan sanen inasingeran ko nalmok a sikato si Laban.

9 Tan anengneng ko so espada to, tan saya so inoyus ko a nanlapu ed kaloban to nia; tan say putan to nia so puro a balitok, tan say inkagawa to mapalalo a marakep, tan anengneng ko a say tarem to nia agawa a nanlapu ed atagey ya uri na asiro.

10 Tan agawa a say Espiritu piliten to ak a mamatey ed si Laban, balet inkuan ko ed pusok: kapiganman ed anto a panaon ag ko amaterter na dala na too. Tan masuknar so liknaan ko pian komon sikato so ag ko pateyen.

11 Tan say Espiritu inkuan to lamet ed siak: Nia say Katawan sikato so añgiawat ed saray limam. On, tan kabat ko met a pilalek to ya ekalen so dili a bilay ko; on, tan ag to ondeñgel ed saray gangan na Katawan; tan sinamsam to met so saray kayarian mi.

12 Tan agawa a say Espiritu inkuan to lamet ed siak: Patey mo, lapu ed say Katawan so añgiawat ed saray limam;

13 Nia say Katawan pateyen to so saray totoo a marelmeng pian iparungtal to so saray matunong a gagala to. Magmaong ni a say sakey a too so ompatey nen say sakey a bansa so onlasay tan ompatey ed ag-pananisia.

14 Tan natan, sanen siak, Nephi, nadñgel ko so saraya a salita, anunotan ko so saray salita na Katawan a sinalita to ed siak diman ed kalawakan, a nankuan: Dapot no saray boleg mo sumpalen da so saray gangan ko, sikara so onaliguas ed dalin a sipan.

15 On, tan anunotan ko met ya ag da nayarian a sumpalen so saray gangan na Katawan unong ed gangan nen Moises, likud no wala ed sikara so gangan.

16 Tan kabat ko met a say gangan nitatak ed saray piligo a gansa.

17 Tan lamet, kabat ko a say Katawan iniawat to si Laban ed saray limak ed saya a pamaakaran—pian nagamoran ko so saray kasulatan unong ed gangan to.

18 Dia ed ontan, inonor ko so voces na Espiritu, tan binembenan ko si Laban ed buek na ulo to, tan pinotot ko so ulo to ed dili ya espada to.

19 Tan kayarik a pinotot so ulo to ed dili a espada to, nilakseb ko so kawes nen Laban, tan insulong ko ed dili a laman ko; on, angan sankamelagan a beñgatla; tan imbalkes ko so saray kirlong to ed awak ko.

20 Tan kayari a ginawak so saya, linma ak ed panañginan na kayamanan nen Laban. Tan legan a mamapaarap ak ed panañginan na kayamanan nen Laban, nia, anengneng ko so igagangan nen Laban a sikato so kawalaan na tumbok na panañginan na kayamanan. Tan ingangan ko ed sikato ed kaolibay na voces nen Laban, a sikato so mila ed siak ed dalem na panañginan na kayamanan.

21 Tan impasen to a siak so katawan to, a si Laban, lapu ed amuria to so saray kawes tan ontan met ed espada ya akabalkes ed awak ko.

22 Tan sikato so nansalita ed siak nipaakar ed saray mamasiken na saray Judio, lapu ed kabat to a si katawan to, si Laban, so pinmaway nen labi ya akilimog ed sikara.

23 Tan nansalita ak ed sikato a siñga siak si Laban.

24 Tan nansalita ak met ed sikato a libiten ko so saray nitatak ed piligo a gansa, ed saray papañguloan ya agagik, a wala ed paway na padir.

25 Tan sikato so kinaukolan ko ya ontumbok ed siak.

26 Tan lapu ed sikato, impasen to a say sasalitaen ko saray kaagian ed simbaan, tan siak a peteg si Laban a sikato so pinatey ko, dia ed ontan sikato so tinmumbok ed siak.

27 Tan sikato so nansalita ed siak ya amimpiga-piga nipaakar ed saray mamasiken na saray Judio, legan ya ompapawil ak la ed saray agagik, a sikara so wala ed paway na padir.

28 Tan agawa a sanen si Laman anengneng to ak ataktakot a maong, tan ontan met nen Lemuel tan si Sam. Tan batik ira ya ontaynan ed arapan ko; lapu ed impasen da a siak a si Laban, tan pinatey to ak tan aanapen to ra a pateyen met.

29 Tan agawa, a tinawag ko ra, tan nadñgel da ak; dia ed ontan tinmoda ra ed imbabatik da ya ontaynan ed arapan ko.

30 Tan agawa a sanen say igagangan nen Laban anengneng to so saray agagik sikato so ginmapo ya ongiwgiw, tan ombatik lawari ya ontaynan ed arapan ko tan ompawil la ed ciudad na Jerusalem.

31 Tan natan siak, Nephi, lapu ed siak so too a baleg ed impanlaman, tan lapu ed inawat ko met so mapalalo a biskeg na Katawan, dia ed onia tinekmelan ko so igagangan nen Laban, tan binembenan ko, pian ag makabatik.

32 Tan agawa a nansalita ak ed sikato, a no deñgelen to so saray salitak, unong a say Katawan so mabilay, tan mabilay ak, ontan met no deñgelen to so saray salita mi, iligyas mi so bilay to.

33 Tan nansalita ak ed sikato, a katekep na samba, ya ag nakaukolan a sikato so ontakot; a sikato so manmaliw a too a walaan na kawayañgan a siñga sikami no sikato so miolop ed sikami ya onleksab ed kalawakan.

34 Tan nansalita ak met ed sikato, a nankuan: Peteg a say Katawan ingangan to ed sikami so saraya a beñgatla; tan ag mi kasi panseetan a sumpalen so saray gangan na Katawan? Dia ed onia, no onleksab ka ed kalawakan ed kinen amak nawalaan ka na pasen ed sikami.

35 Tan agawa a si Zoram apabiskeg so linawa to lapu ed saray salita ya imbalikas ko. Natan Zoram so ñgaran na saya ya igagangan; tan insipan to ya onleksab ed kalawakan ed kinen ama mi. On, sikato so nansamba met ed sikami a miayam ed sikami manlapu ed saman a panaon.

36 Natan pilalek mi a sikato so miayam ed sikami makaseñgeg ed saya a pamaakaran, pian saray Judio ag da komon nakabatan so intaynan mi a linma ed kalawakan, ag la piga a sikara so onosil tan deralen da kami.

37 Tan agawa a sanen si Zoram so nangawa na samba ed sikami, say takot mi so tinmonda nipaakar ed sikato.

38 Tan agawa ya inala mi so saray piligo a gansa tan say igagangan nen Laban, tan tinmaynan kami ya amaarap ed kalawakan, tan nambaroy kami anga ed kawalaan na abong-abong ya abel nen amak.