1 Tan agawa a tinipon mi so amin a nengneng na bokel unong ed inkapalsa to, mandapag a nengneng na dawa, tan ontan met na saray bokel na buñga.

2 Tan agawa a legan nen amak a manaayam ed kalawakan nansalita ed sikami, a nankuan: Nia, siak so nankugip na sakey a kugip; odino dia ed sananey a salita, akanengneng ak na sakey a payawar.

3 Tan nengneng yo, lapu ed saray beñgatla ya anengneng ko, wala so pankatunoñgan ko a mangayaga ed Katawan lapu ed si Nephi tan ontan met ed si Sam; lapu ed wala so pankatunoñgan ko a mañgipasen a sikara, tan ontan met dakel ed saray boleg da, so nilaban.

4 Balet nia, Laman tan Lemuel, mapaga ak a maong ed sikayo; tan nengneng yo, dia ed kanunotan ko anengneng ko ed kugip ko, so ambiluñget tan maermen a kalawakan.

5 Tan agawa ya anengneng ko so sakey a too, tan sikato so akakawes na amputi a kolibemben; tan sikato so dinmago tan inmalagey ed arapan ko.

6 Tan agawa a sikato so nansalita ed siak, tan ginangan to ak ya ontumbok ed sikato.

7 Tan agawa a dia ed intumbok ko ed sikato anengneng ko so inkasiak a wala ak ed ambiluñget tan maermen a lawak.

8 Tan kayarik a nambaroy ed dakel ya oras ed kabiluñgetan, ginapoan ko so mampikasi ed Katawan a kasian to ak, unong ed kinarakel na maolimek a panañgasi to.

9 Tan agawa a kayarik a nampikasi ed Katawan anengneng ko so baleg tan maawang a patar.

10 Tan agawa ya anengneng ko so sakey a kiew, a say buñga to makaayat a mamaliket ed siopaman.

11 Tan agawa a linma ak ya inmasinger tan añgan ak na buñga to nia; tan atawayan ko a sankasamitan, ed amin na saray atawayan ko la. On, tan anengneng ko a say buñga to nia so amputi tan apalabsanan to so puti na saray anengneng ko la.

12 Tan dia ed impañgan ko ed saman a buñga pinano to so kamareruak na mapalalo a gayaga; dia ed ontan, ginapoan ko so mampilalek a say boleg ko so mañgan met ira; lapu ed kabat ko a saya so makaayat ed amin a buñga.

13 Tan sanen inwandag ko so matak ed kaliber-liber, ag la piga no narumog ko met so boleg ko, anengneng ko so sakey ya ilog na danum; tan saya so managagos, tan asinger ed pasen na kiew a pañgakanan ko na buñga.

14 Tan ninengneng ko no iner so panlalapuan to; tan anengneng ko so ulo to ed ag arawi; tan dia ed uloan to anengneng ko si ina yo a Sariah, tan si Sam, tan si Nephi; tan akaalagey ira a siñga ag da amta no iner so laen da.

15 Tan agawa a sikara so kinaweyan ko; tan inkuan ko met ed sikara ed maksil a voces ya ondago ra ed siak, tan mañgan ira na buñga, a saya so makaayat ed amin a buñga.

16 Tan agawa a sikara so dinmago ed siak tan añgan met ira na buñga.

17 Tan agawa a pilalek ko a si Laman tan si Lemuel so ondago pian mañgan met ira na buñga; dia ed ontan inwandag ko so saray matak ed uloan na ilog, ag la piga no nanengneng ko ra.

18 Tan agawa ya anengneng ko ra, balet ag ira ondago ed siak tan ag ira mañgan na buñga.

19 Tan anengneng ko so sakey a tibukel a balatyang, tan saya so manlapu ed pandel na ilog, tan ompugta ed kiew a panalalageyan ko.

20 Tan anengneng ko met so sakey a maiñget tan makisir a dalan, a saya so akiolop ed tibukel a balatyang, ya angan ongawat ed kiew a panalalageyan ko; tan saya so ompugta met ed ulo na subol, dia ed baleg tan maawang a patar, a siñga saman so sakey a mundo.

21 Tan anengneng ko so ag-nabilang ya olop na totoo, a say karaklan manleletletan ira a makaasinger, pian komon nagamoran da so dalan ya ompugta ed kiew a panalalageyan ko.

22 Tan agawa ya akasabi ra tan ginapoan da a tuntonen so dalan a mamaarap ed kiew.

23 Tan agawa a linmetaw so sakey a kelpa na biluñget; on, angan mapalalo a kelpa na biluñget, a makaseñgeg saraman so ginmapo ya ontunton ed dalan sikara so abalang, kanian nanakar-akar ira tan sikara so abalang.

24 Tan agawa ya anengneng ko so arum a manleletletan pian makagamor, tan sikara so akaasinger tan akapeket ira ed sampot na tibukel a balatyang; tan sikara so nampatuloy ya onasinger ed pegley na kelpa na biluñget, ya akapeket ira ed tibukel a balatyang, angan dia ed impakasabi ra tan akapañgan ira ed buñga na kiew.

25 Tan kayari ra ya añgan ed buñga na kiew inwandag da so saray mata ra ed kaliber-liber a siñga nababaiñgan ira.

26 Tan inwandag ko met so saray matak ed kaliber-liber, tan amuriak, ed biek pandel na ilog na danum, so sakey a baleg tan maawaawang a paalagey; tan saya akatalindeg a siñga wala ed dagem, ed tagey na dalin.

27 Tan saya so napno na totoo, mandapag a matakken tan ogaw; mandapag a laki tan bii; tan say indeñgan na panañgawes da so mapalalo a marakep, tan say awawey da so mambabalaw tan mañgitoturo na tamoro ra ed saraman so inmasinger tan mañgaakan na buñga.

28 Tan kayari ra ya atawayan so buñga sikara so nababaiñgan, lapu ed saraman so manmodmura ed sikara; tan sikara so naplag ya inmarawi ed nisebel a dalan tan sikara so abalang.

29 Tan natan siak, Nephi, ag ko la salitaen ya amin so saray sinalita nen amak.

30 Balet, pian antikey la so pansulat, nia, anengneng to so sananey a karaklan a manleletletan pian makagamor; tan sikara so akasabi tan abembenan da so sampot na tibukel a balatyang; tan pinilit da so onletlet, ya andi-tonda so peket da ed tibukel a balatyang, anga ed sikara so akasabi tan tinmalimukor ira ya añgan ed buñga na kiew.

31 Tan sikato so akanengneng met na sananey a karaklan a babasbasen da so mamapaarap ed kawalaan na baleg tan maawang a paalagey.

32 Tan agawa a dakel so nalner ed kaaraleman na subol; tan dakel so abalang ed pakanengneng to, a nanakar-akar ed ag-kabkabat a dalan.

33 Tan baleg so olop na saray karaklan a linmoob ed saman so ag-kabkabat a paalagey. Tan kayari inloob da ed saman a paalagey sikara so añgituro na tamoro ra a mamabalaw ed siak tan ed saraman so mañgaakan met na buñga; balet ag mi ra dinerleng.

34 Saraya so salita nen amak: Tan no kaonoñgan so dinmeñgel ed sikara, sinmian ira.

35 Tan si Laman tan si Lemuel ag akapañgan ed buñga na kiew, inkuan nen amak.

36 Tan agawa a kayari ya imbalikas nen amak so amin a salita ed kugip to odino payawar, a saraya so dakel, inkuan to ed sikami, lapu ed saraya a beñgatla ya anengneng ko ed payawar, mapalalo so pagak ed si Laman tan si Lemuel; on, natatakot ak ompano sikara so nibantak a niarawi ed arap na Katawan.

37 Tan impikasi to ed sikara ed amin a liknaan na sakey a maolimek ya ateng, pian deñgelen da komon so saray salita to, ag la piga say Katawan nakasian to ra, tan ag to ra ibantak ed paway; on, si amak so nampulong ed sikara.

38 Tan kayari to a nampulong ed sikara, tan improfesiya to met ed sikara so dakel a beñgatla, kinerew to ed sikara ya onoren da so saray gangan na Katawan; tan intonda to so pansasalita to ed sikara.