Tekap 9
Si Nephi nangawa na duara a tugyop na kasulatan—Balang sakey so atawag a piligo nen Nephi—Say babaleg a piligo lugan to so minomundo ya awaran; say memelag so mañgibabaga na saray sagrado a beñgatla. Ñgalñgali 600–592 S.C.
1 Tan amin a saraya a beñgatla si amak anengneng to, tan nadñgel to, tan sinalita to, legan na impanayam to ed abong-abong ya abel, dia ed patar na Lemuel, tan ontan met ed dakel ira a baleg a beñgatla, ya ag la nayari ya isulat ed saraya a piligo.
2 Tan natan, unong ed asalitak la nipaakar ed saraya a piligo, nia aliwa ed saraya a piligo so pangawaan ko na nagnap a kasulatan na awaran na saray totook; lapu ed saray piligo a pangawaan ko na nagnap a kasulatan nipaakar ed saray totook so inñgaran ko na Nephi; dia ed ontan saraya so atawag a piligo nen Nephi, ya intumbok ed ñgaran ko; tan saraya a piligo so atawag met a piligo nen Nephi.
3 Angaman ontan, inawat ko so sakey a gangan na Katawan a gawaen ko so saraya a piligo, ya onkana ed niduma a gagala pian wala so kasulatan a nitatak nipaakar ed impanoley na saray totook.
4 Dia ed saray sananey a piligo nitatak so kasulatan nipaakar ed oley na arari, tan saray bakal tan baliñgaan na saray totook; dia ed ontan saraya a piligo so nigena a malaglaem nipaakar ed impanoley; tan saray sananey a piligo so nigena a malaglaem ed oley na arari tan saray bakal tan baliñgaan na saray totook.
5 Dia ed ontan, say Katawan ingangan to ed siak a gawaen ko so saraya a piligo ed makabat a gagala ed sikato, a saraya a gagala ag ko kabat.
6 Balet say Katawan kabat to so amin a beñgatla manlapu ed gapo; dia ed ontan, iparaan to so dalan ed pakasumpal na amin a kimey to ed limog na saray anak na totoo; tan nia, wala ed sikato so amin a pakapanyari ed pakasumpal na saray salita to. Tan sikato ya. Amen.