1 Tan lamet: Talineng mo, O kailalakan na Israel, amin yo a nisian tan adagdag a papaway lapu ed karelmeñgan na saray managpulong ed saray totoo; on, amin yo a nisian, a nitaytayak ed arum na bansa, sikayo a kabiañgan na saray totook, O kailalakan na Israel. Deñgel kayo, O kapuloan, ed siak, tan talineng yo sikayo a totoo a wala ed arawi; say Katawan tinawag to ak sakbay a siak so nianak; dia ed eges nen inak sinaglawi to la so ñgaran ko.

2 Tan ginawa to so sañgik a siñga espada a makdem; dia ed anino na lima to siak so insanib to, tan ginawa to ak a masileng a pana; dia ed pabalok to siak so insanib to;

3 Tan inkuan to ed siak: Sika so igagangan ko, O Israel, a dia ed sika siak so nigloria.

4 Dia ed saman inkuan ko, Nansagpot ak ed andi-kana, inkanak so biskeg ko ed angapo tan andi-kakanaan; andi saew a say kaokom ko so wala ed Katawan, tan say kimey ko wala ed Dios.

5 Tan natan, kuan na Katawan—a sikato so nangawa ed siak ed dalem na eges pian siak so manmaliw ya igagangan to, a mañgawit lamet ed si Jacob ed sikato—angaman say Israel ag ni atipon, iñgen siak naani so nigloria ed mata na Katawan, tan say Dios ko sikato so biskeg ko.

6 Tan inkuan to: Saya so anlemew a beñgatla pian sika so manmaliw ya igagangan ko a mañgitanduro na saray tribo nen Jacob, tan mañgipawil ed pañgiagel ed Israel. Iter ko met ed sika so liwawa ya onkana ed saray Gentiles, pian sika so manmaliw a kilalaban ko ya anga ed sampot na dalin.

7 Onia so inkuan na Katawan, say Mananundon na Israel, say Masanto a Bugtong to, a sikato a balbalawen na too, a sikato so dimdimlaen na saray bansa, ed igagangan na saray manañgoley. Saray arari nanengneng da tan onalagey ira, saray prinsipe sikara met so mañgigalang, lapu ed say Katawan a matuor.

8 Onia so inkuan na Katawan: Dia ed sakey a panaon a makana sika so dineñgel ko, O kapuloan a wala ed dayat, tan dia ed sakey ya agew na kilalaban sika so tinuloñgan ko; tan siak so mañgiagel ed sika, tan iter ko ed sika so igagangan ko ya onkana a sakey a paknaan ed saray totoo, a mañgiletneg na dalin, señgegan a panawir ed saray ataynanan a tatawiren;

9 Pian ikuan mo ed saray nipañgaw: Onla kayo; ed sikara a manyodyurong ed kabiluñgetan: Ipanengneng yo so inkasikayo. Sikara so mañgan ed saray dalan, tan saray pastolan da wala ed saray atagey a pasen.

10 Sikara so ag naerasan ni say napgaan, ni say petang odino say agew bakbaken to ra; lapu ed saman so awalaan na panañgasi ed sikara itunton to ra, angan dia ed saray subol na danum sikara so iwanwan to.

11 Tan gawaen ko a dalan so saray kapalandeyan ko, tan saray karsadak sikara so nitanduro.

12 Tan dia ed ontan, O kailalakan na Israel, nia, saraya so manlapu ed arawi; tan nia, saraya so manlapu ed baybay tan dia ed sagur; tan saraya so nanlapu ed dalin na Sinim.

13 Mancancion ka, O katawenan; tan mangayaga ka, O dalin; lapu ed saray sali na saraman so wala ed bokig so niletneg; tan bigla a mancancion, O sikayo a palandey; lapu ed sikara so ag la nabakbak; lapu ed say Katawan niligliwa to so saray totoo to, tan nawalaan na abagey ed saray manlilikna na segsegang.

14 Balet, nengneng yo, say Sion inkuan to: Say Katawan inkaindan to ak, tan say Katawan ko inlingwan to ak—balet ipatnag to ya ag to ni ginawa lamlamang.

15 Tan nayari kasi a say sakey a bii ilingwan to so mansuso ya anak to, tan angapo la a kapiganman so panañgasi to ed laki ya anak to a buñga na eges to? On, sikara so nayari a makalingwan, iñgen ag taka nalingwanan, O kailalakan na Israel.

16 Nengneng mo, sika so minulik ed saray daklap na limak; tan saray padir mo so mansiansia ed arapan ko.

17 Saray anak mo sikara so manganat ya onsumpa ed saray managderal ed sika; tan saraman so managderal ed sika arawian da ka.

18 Itañgay mo so saray matam ed kaliber-liber tan nengneng mo; saraya ya amin so mantitipon ed inkasikara a dili, tan sikara so ondago ed sika. Tan unong a mabilay ak, kuan na Katawan, andi saew a sikara ya amin so onkana a mañgawes ed sika, a siñga sakey a parakep, tan berberen da ka a siñga sakey a nobia.

19 Pian saray andi-kana tan saray maermen a pasen mo, tan say dalin a kaderalan mo, so mapalalo a maiñget makaseñgeg ed saray manaayam; tan saraman so añgakmon ed sika wala ra ed arawi.

20 Saray anak a niiter ed sika, kayari ya abalang mo so unaan, iyesaes da lamet ed layag mo ya ikuan da: Say pasen mapalalo a maptek ed siak; iter mo ed siak so pasen pian panayaman ko.

21 Dia ed saman ikuan mo ed pusom: Siopa so añgianak ed saraya ed siak, lapu ed sankanengneng ko ya abalang ko so saray anak ko, tan siak so mambokbukor, sakey ya adakep, tan ongagalaw a mampawil-pawil diman tan dia? Tan siopa so nampabaleg ed saraya? Nia, siak so ataynan a nambokbukor; saraya, iner so nanlalapuan da?

22 Onia so ikuan na Katawan a Dios: Nia, itagey ko so limak ed saray Gentiles, tan igenak so pananontunan ko ed saray totoo; tan awiten da so saray lalaki ya anak mo ed saray taklay da, tan saray bibii ya anak mo sakbaten da ra ed saray takeb da.

23 Tan saray arari sikara so managasikaso ya ama, tan saray reyna sikara so managasikaso ya ina; sikara so ontewek ed sika ya akaarap so lupa ra ed dalin, tan dildilan da so sapok ed saray salim; tan dia ed ontan nakabatan mo a siak so Katawan; pian ag ira ombaing so saray manaalagar ed siak.

24 Nayari kasi a samsamen so adakep manlapu ed sakey a makapanyari, odino saray makatunoñgan ya adakep so nilaban?

25 Balet onia so inkuan na Katawan, angan saray adakep na saray makapanyari so naekal ed sikara, tan say adakep na saray makapakebyew so nilaban; lapu ed siak so mibaliñgaan ed siopaman a mibaliñgaan ed sika, tan ilaban ko so saray anak mo.

26 Tan pakanen ko so saray managpasegsegang ed sika na dili a laman da; tan sikara so nabuek ed dili a dala ra a siñga masamit ya alak; tan amin a laman nakabatan da a siak, say Katawan, siak so Manañgilaban mo tan Mananundon mo, say Makapanyari a Bugtong nen Jacob.