1 Tan nagawa, sano saray Gentiles so ondeñgel ed say Cordero na Dios ed saman ya agew ya ipanengneng to so inkasikato ed sikara dia ed panamegley na salita, tan ontan met ed pakapanyari, ed amin a gawa, nipaakar ed kaekal na saray kigapolan da—

2 Tan ag da paaweten so saray puso ra sumpa ed Cordero na Dios, sikara so nibilang ed limog na boleg nen amam; on, sikara so nibilang ed limog na kailalakan na Israel; tan sikara so totoo a napapalar ed dalin a sipan ed ando la ya ando; ya ag la ra kapiganman naawit ed inkadakep; tan say kailalakan na Israel so ag la nakewkew.

3 Tan saman so baleg ya abot, a kinutkotan na saman so baleg tan marumsis a simbaan ya onkana ed sikara, a saya so inletneg na demonyo tan saray ilalak to, pian ibalang to so kamarerua na saray totoo ed kaaraleman na infierno—on, saman so baleg ya abot a kinutkot ya onkana ed kaderal na totoo so natabonan na saray nankutkot ed saya, unong ed sigpot a kaderal da, kuan na Cordero na Dios; aliwa a dia ed kaderal na saray kamarerua, likud ed kibantak ed saman so infierno ya angapo so angaan to.

4 Tan nengneng mo, saya unong ed inkadakep na demonyo, tan unong met ed kaptekan na Dios, ed amin na saray mankimey na karelmeñgan tan karumsisan ed arapan to.

5 Tan agawa a say angel nansalita ed siak, Nephi, a nankuan: Anengneng mo a sano saray Gentiles so mambabawi maong so kasumpalan da; tan akabatan mo met so nipaakar ed saray paknaan na Katawan ed kailalakan na Israel; tan nadñgel mo met a siopaman so ag mambabawi so nabalang.

6 Dia ed ontan, abagey so saray Gentiles no paaweten da so kapusoan da sumpa ed Cordero na Dios.

7 Tan onsabi so panaon, inkuan na Cordero na Dios, a siak so mankimey na baleg tan makapakelaw a kimey ed limog na saray anak na totoo; sakey a kimey a magnayon, balang la ed sakey a dapag odino dia ed sananey—balang la ed pakakuyong da nipaakar ed kareenan tan bilay ya andi-angaan, odino nipaakar ed kilaban da ed kaawetan na saray puso ra tan inkapereñgan na saray nunot da ed inkiakar da ed inkadakep, tan ontan met ed kadederal, mandapag ed inkamundo tan inkaespiritu, unong ed inkadakep na demonyo, a sikato so asalitak la.

8 Tan agawa a sanen say angel nibalikas to so saraya a salita, inkuan to ed siak: Nanunotan mo so saray paknaan na Ama ed kailalakan na Israel? Inkuan ko ed sikato: On.

9 Tan agawa ya inkuan to ed siak: Nengneng mo, tan muriam so baleg tan marumsis a simbaan, a sikato so ina na saray karumsisan, a say añgiletneg say demonyo.

10 Tan inkuan to ed siak: Nia, duara labat so wala a simbaan; say sakey so simbaan na Cordero na Dios, tan say sananey so simbaan na demonyo; dia ed ontan, siopaman ya aliwa a miembro na simbaan na Cordero na Dios so miembro na saman a baleg a simbaan, a sikato so ina na saray karumsisan; tan sikato so balangkantis na amin a dalin.

11 Tan agawa a ninmengneng ak tan amuriak so balangkantis na amin a dalin, tan sikato so akayurong ed dakel a danum; tan sikato so nanoley ed amin a dalin, ed limog na amin a bansa, sankakanayon, salita, tan totoo.

12 Tan agawa ya anengneng ko so simbaan na Cordero na Dios, tan say bilang da so pigpigara, lapu ed karelmeñgan tan saray karumsisan na balangkantis a sikato so akayurong ed tapew na dakel a danum; angaman ontan, anengneng ko so simbaan na Cordero, a sikara so sasantos na Dios, so wala met ed amin a tapew na dalin; tan saray uoleyan da ed tapew na dalin so daiset, lapu ed saray karelmeñgan na saman so baleg a balangkantis a sikato so anengneng ko.

13 Tan agawa ya anengneng ko a say baleg ya ina na saray karumsisan tinipon to a nankasakey so karaklan ed tapew na amin a dalin, ed limog na amin a bansa na saray Gentiles, pian onlaban a sumpa ed Cordero na Dios.

14 Tan agawa a siak, Nephi, anengneng ko so pakapanyari na Cordero na Dios, a sikato so linmeksab ed saray sasantos na simbaan na Cordero, tan saray sipan a totoo na Katawan, a sikara so ataytayak ed amin a tapew na dalin; tan sikara so akaayura na inkamatunong tan kaiba so pakapanyari na Dios ed baleg a gloria.

15 Tan agawa a say sanok na Dios so anengneng ko a nikalbo ed saman so baleg tan marumsis a simbaan, kanian wala so saray bakal tan saray dalamurom na bakal ed limog na amin a bansa tan sankakanayon ed dalin.

16 Tan dia ed ingapo na saray bakal tan saray dalamurom na bakal ed limog na amin a bansa a kabiañgan na ina na saray karumsisan, say angel nansalita ed siak, a nankuan: Nia, say sanok na Dios so wala ed ina na saray balangkantis; tan nia, anengneng mo so saraya ya amin a beñgatla—

17 Tan sano say agew onsabi a say sanok na Dios so nikalbo ed ina na saray balangkantis, a saya so baleg tan marumsis a simbaan ed amin a dalin, a say añgiletneg say demonyo, dia ed ontan, ed saman ya agew, say kimey na Ama so ongapo, ed pañgiparaan to na dalan a pakasumpal ed saray paknaan, a ginawa to ed saray totoo to a wala ed kailalakan na Israel.

18 Tan agawa a say angel nansalita ed siak, a nankuan: Nengneng mo!

19 Tan ninengneng ko tan amuriak so sakey a too ya akakawes na amputi a kolibemben.

20 Tan say angel inkuan to ed siak: Nia sikato so sakey ed saray labindua ya apostoles na Cordero.

21 Nia, sikato so makanengneng tan mañgisulat nipaakar ed nakekeraan na saraya a beñgatla; on, tan ontan met ed dakel a beñgatla a linmabas.

22 Tan isulat to met so nipaakar ed sampot na mundo.

23 Dia ed ontan, saray beñgatla ya isulat to saraya so maptek tan tua; tan nia saraya so nisulat ed libro ya anengneng mo a nanlapu ed sañgi na Judio; tan dia ed panaon a saraya so manlapu ed sañgi na Judio, odino, dia ed panaon a say libro so manlapu ed sañgi na Judio, saray beñgatla a nisulat so malinew tan dalisay, tan pinabpabli tan mainomay ed pakatalus na amin a totoo.

24 Tan nengneng mo, saray beñgatla ya isulat na saya ya apostol na Cordero dakel ed saraya so anengneng mo la; tan nia, say nakekeraan ni saraya so nanengneng mo.

25 Balet saray beñgatla a nanengneng mo kayari to nia, ag mo la isosulat; lapu ed say Katawan a Dios so anoro na apostol na Cordero na Dios so mañgisulat ed saraya.

26 Tan ontan met ed arum a sikara so angapo la, dia ed sikara impanengneng to so amin a beñgatla, tan insulat da so saraya; tan saraya so akapotan pian onsabi so saraya a dalisay, unong ed katuaan a wala ed Cordero, dia ed dili a panaon na Katawan, onkana ed kailalakan na Israel.

27 Tan siak, Nephi, nadñgel ko tan paneknekan ko, a say ñgaran na apostol na Cordero so Juan, unong ed salita na angel.

28 Tan nia, siak, Nephi, nisebel ed siak ya isulat ko so nakekeraan ed saray beñgatla ya anengneng tan nadñgel ko; dia ed ontan saray beñgatla ya isulat ko so makagenap la ed siak; tan insulat ko so melag labat a biang na saray beñgatla ya anengneng ko.

29 Tan paneknekan ko ya anengneng ko so saray beñgatla ya anengneng nen amak, tan say angel na Katawan so añgipakabat na saraya ed siak.

30 Tan natan, sampotan ko la so pansasalitak nipaakar ed saray beñgatla ya anengneng ko legan a naawit ak na Espiritu; tan no amin na saray beñgatla ya anengneng ko so ag nisulat, saray beñgatla ya insulat ko saraya so tua. Tan sikatoya. Amen.