1 Tan agawa a kayari a siak, Nephi, so inawit ak na Espiritu tan anengneng ko ya amin a beñgatla, pinmawil ak la ed abong-abong ya abel nen amak.

2 Tan agawa ya anengneng ko so saray agagik, tan mambabaliñgaan ira ed sakey tan sakey nipaakar ed saray beñgatla a sinalita nen amak ed sikara.

3 Tan tua a peteg a saray sinalita to dakel a beñgatla ed sikara, so mairap a talusan, likud no say sakey a too itepet to ed Katawan; tan lapu ed anawet so saray puso ra, dia ed onia ag da inanap so Katawan a saya so nepeg komon a gawaen da.

4 Tan natan, siak, Nephi, apaermen ak lapu ed awet na saray puso ra, tan ontan met, lapu ed saray beñgatla ya anengneng ko, tan kabat ko a saraya so ag-naliktaran ya ondalan lapu ed baleg a karelmeñgan na saray anak na totoo.

5 Tan agawa ya atalo ak lapu ed kairapan ko, lapu ed impasen ko a saray kairapan ko so baleg nen say amin, lapu ed say kaderal na saray totook, tan anengneng ko so kigapol da.

6 Tan agawa kayarik ya akaawat na biskeg akisalita ak ed saray agagik, lapu ed pilalek ko a nakabatan ed sikara so señgeg na saray baliñgaan da.

7 Tan inkuan da: Nia, ag mi natalusan so saray salita ya imbalikas na ama tayo nipaakar ed saray gendat a sañga na kiew ya oliva, tan ontan met ed nipaakar ed saray Gentiles.

8 Tan inkuan ko ed sikara: Sikayo kasi so nantepet la ed Katawan?

9 Tan inkuan da ed siak: Ag mi ni nitepet; lapu ed say Katawan ag to ipakabat so ontan a beñgatla ed sikami.

10 Nia, inkuan ko ed sikara: Panon ya ag yo oonoren so saray gangan na Katawan? Panon a sikayo so nabalang, lapu ed awet na saray puso yo?

11 Ag yo kasi anunotan so saray beñgatla ya inkuan na Katawan?—No ag yo paaweten so saray puso yo, tan ontepet kayo ed siak a walaan na pananisia, a sisiaen yo a makaawat kayo, katekep to so seet ed pañgonor na saray gangan ko, ag-nasaew a saraya a beñgatla so nipakabat ed sikayo.

12 Nia, ikuan ko ed sikayo, a say kailalakan na Israel so nipareng ed kiew ya oliva, ed panamegley na Espiritu na Katawan a wala ed ama tayo; tan nia ag itayo kasi asipi a nanlapu ed kailalakan na Israel, tan ag sikatayo kasi so sakey a sañga na kailalakan na Israel?

13 Tan natan, say beñgatla a labay nen ama tayo ya ibaga nipaakar ed kisuldong na saray peteg a sañga dia ed inkagnap na saray Gentiles, so, dia ed kaunoran ya agew sano saray boleg tayo so onlasay lapu ed ag-pananisia, on, dia ed loob na dakel a taon, tan dakel a kailalakan kayari a say Mesias so mampanengneng ed laman ed saray anak na totoo, dia ed saman say inkagnap na evangelio na Mesias so onsabi ed saray Gentiles, tan manlapu ed saray Gentiles niiter ed nakdaan ed saray boleg tayo—

14 Tan dia ed saman ya agew saray nakdaan ed boleg tayo nakabatan da a kabiañgan ira na kailalakan na Israel, tan sikara so paknaan a totoo na Katawan; tan dia ed ontan nakabatan da tan onsabi ed sikara so pikakabat ed saray inmuna ya ama ra, tan ontan met ed pikakabat ed evangelio na Mananundon da, a saya so nipulong ed saray kaamaan da ed panamegley to; dia ed ontan, onsabi ed sikara so pikakabat ed Mananundon da tan saray makana a kabiañgan na doctrina to, pian nakabatan da no panon so idago da ed sikato tan sikara so nilaban.

15 Tan dia ed saman ya agew ag ira kasi mangayaga tan mandaydayew ed andi-angaan a Dios da, a sikato so bato a dampay da tan kilalaban da? On, dia ed saman ya agew, ag da kasi awaten so biskeg tan tagano a manlapu ed tua a señgeg na wakal? On, ag ira kasi ondago ed tua ya olopan na Dios?

16 Nia, ikuan ko ed sikayo: On; sikara so nanunotan lamet ed limog na kailalakan na Israel; sikara so nisuldong, lapu ed sikara so peteg a sañga na kiew ya oliva, dia ed tua a kiew ya oliva.

17 Tan a saya so labay ya ibaga na ama tayo; tan say labay to ya ibaga a saya so ag nagawa anga ed kayari a sikara so itaytayak na saray Gentiles; tan say labay to ya ibaga a saya so onsabi ed panamegley na saray Gentiles; pian say Katawan naipanengneng to komon so pakapanyari to ed saray Gentiles, makaseñgeg ed ag-pañgawat na saray Judio, odino say kailalakan na Israel.

18 Dia ed ontan, si ama tayo ag to sinalita so nipaakar ed saray boleg tayo labat, balet ontan met ed amin ya kailalakan na Israel, ya itoturo to so paknaan a nakaukolan a nasumpal ed saray kaunoran ya agew; a saya a paknaan so ginawa na Katawan ed say ama tayo ya Abraham, a nankuan: Dia ed saray boleg mo napapalar so amin a sankakanayon ed dalin.

19 Tan agawa a siak, Nephi, nansalita ak na dakel ed sikara nipaakar ed saraya a beñgatla; on, nansalita ak ed sikara nipaakar ed kipawil na saray Judio ed kaunoran ya agew.

20 Tan inulit ko ed sikara so saray salita nen Isaias, a sikato so nansalita nipaakar ed kipawil na saray Judio, odino say kailalakan na Israel; tan kayari a sikara so nipawil, sikara so ag la nakewkew, ni say sikara so ag la nataytayak lamet. Tan agawa a nansalita ak na dakel a salita ed saray agagik, kanian apareen ko ra tan nampaabeba ra ed inkasikara a dili ed arapan na Katawan.

21 Tan agawa ya akisalita ra lamet ed siak, a nankuan: Anto so kabaliksan na saya a beñgatla ya anengneng nen ama tayo ed sakey a kugip? Anto so kabaliksan na kiew ya anengneng to?

22 Tan inkuan ko ed sikara: Say aliling to nia so kiew na bilay.

23 Tan inkuan da ed siak: Anto so kabaliksan na tibukel a balatyang ya anengneng nen ama tayo, ya ompugta ed kiew?

24 Tan inkuan ko ed sikara a saya so salita na Dios; tan siopaman so ondeñgel ed salita na Dios, tan ompeket a malet ed saya, sikara so ag kapiganman nabalang; ni say tukso tan mandarlang a pana na kabusol so taloen to ed inkabulag, pian niarawi ra ed kaderal.

25 Dia ed ontan, siak, Nephi, binilin ko ra ya ondeñgel ed salita na Katawan; on, sikara so binilin ko ed amin a biskeg na kamareruak, tan katekep na amin a pakayari a wala ed siak, pian ondeñgel ira ed salita na Dios tan nunoten da ya onoren so gangan to lawas ed amin a beñgatla.

26 Tan inkuan da ed siak: Anto so kabaliksan na ilog na danum ya anengneng nen ama tayo?

27 Tan inkuan ko ed sikara a say danum ya anengneng nen amak so karotakan; tan lapu ed say kanunotan to so inakmon na arum a beñgatla kanian ag to anengneng so karotakan na danum.

28 Tan inkuan ko ed sikara a saya so makapataktakot a baetan a saya so añgisian na saray marelmeng ed kiew na bilay, tan ontan met ed sasantos na Dios.

29 Tan inkuan ko ed sikara a saya so aliling na saman so makapataktakot ya infierno, a saya so sinalita na angel ed siak a niparaan ed saray marelmeng.

30 Tan inkuan ko ed sikara a si ama tayo anengneng to met so kaptekan na Dios ya insian to so saray marelmeng ed saray matunong; tan say sinag to siñga sinag na mandarlang ya apoy, a saya so mampapaatagey ed Dios ed ando la ya ando, tan angapo so sampot to.

31 Tan inkuan da ed siak: Saya kasi a beñgatla say kabaliksan to so kairapan na laman ed saray agew na panagsubok, odino say kabaliksan to say nigetar a kipapasen na kamarerua kayari ipatey na laman, odino kasi sasalitaen to so saray beñgatla ed inkamundo?

32 Tan agawa ya inkuan ko ed sikara a saya so aliling na beñgatla a nipaakar ed inkalaman tan maespiritu; lapu ed say agew onsabi a sikara so nakaukolan a naokom ed saray kimey da, on, angan saray kimey da a ginawa na inkalaman ed saray agew na panagsubok.

33 Dia ed ontan, no sikara so ompatey ed karelmeñgan sikara so nakaukolan ya ibantak met, no nipaakar ed saray beñgatla a maespiritu, a saya so nipaakar ed inkamatunong; dia ed ontan, sikara so nakaukolan ya awiten ya ontalindeg ed arapan na Dios, pian naokom ira unong ed kimey da; tan no saray kimey da so karotakan sikara so marutak; tan no sikara so marutak nakaukolan sirin ya ag ira nayari a manayam ed panarian na Dios; no ontan, say panarian na Dios marutak met.

34 Balet nia, ikuan ko ed sikayo, a say panarian na Dios aliwa a marutak, tan angapo so aliwa a malinis a beñgatla a makaloob ed panarian na Dios; dia ed ontan nakaukolan wala so pasen na karotakan a niparaan ed saray marutak.

35 Tan wala so pasen a niparaan, on, angan say makapataktakot ya infierno a saya so asalitak la, tan say demonyo so añgiparaan ed saya; dia ed ontan say sampot a kipapasen na saray kamarerua na totoo so say piayam da ed panarian na Dios, odino say kibantak da ed paway lapu ed saman a kaptekan ya asalitak la.

36 Dia ed ontan, saray marelmeng ag ira naawat ed saray matunong, tan ontan met ed kiew na bilay, a say buñga to nia so pinabpabli tan pampipilalekan ed amin ya arum a buñga; on, tan saya so sankabalegan ed amin a palabo na Dios. Tan onia so impansalitak ed saray agagik. Amen.