1 Tan agawa a say Katawan ginangan to ak, dia ed onia nangawa ak na saray piligo a ginawa ed bato a nanlaok na balatyang pian nitatak ko ed saraya so kasulatan nipaakar ed saray totook. Tan dia ed saraya a piligo a ginawak intatak ko so saray kasulatan nen amak, tan ontan met ed saray impambaroy mi ed kalawakan, tan saray profesiya nen amak; tan ontan met ed saray dili ya improfesiyak so intatak ko ed saraya.

2 Tan ag ko kabat ed saman a panaon sanen ginawak so saraya a siak so igangan na Katawan a mangawa na saraya a piligo; dia ed ontan, saray kasulatan nen amak, tan say listaan na kapolian na kaamaan to, tan malaglaem a kabiañgan na amin ya agawgawa ed kalawakan so nitatak ed saraman so unaan a piligo a saya so asalitak la; dia ed ontan, saray beñgatla ya agawa sakbay na impangawak na saray a piligo, dia ed katuaan, so malaglaem ya asaglawi ed saray unaan a piligo.

3 Tan kayarik a ginawa so saraya a piligo ed panamegley na gangan, siak, Nephi, inawat ko so gangan a say pampulong tan saray profesiya, say lalo a malinew tan pinabli a kabiañgan na saraya, so nakaukolan a nisulat ed saraya a piligo; tan saray nisulat a beñgatla so nakaukolan a nisinop ya onkana a panuntonan na saray totook, a sikara so mankayarian na dalin, tan ontan met ed arum ni a makabat a gagala, a saraya a gagala so kabat na Katawan.

4 Dia ed ontan, siak, Nephi, nangawa ak na kasulatan ed sananey a piligo, a saya so mañgiter na awaran, odino saya so mañgiter na babaleg ya usay na saray bakal tan baliñgaan tan inkaderal na saray totook. Tan saya so ginawak, tan ingangan ko ed saray totook no anto so gawaen da kayari a siak so naandi la; tan saraya a piligo so kaukolan nipalima manlapu ed sakey a kailalakan ya anga ed sananey, odino manlapu ed sakey a profeta ya anga ed sananey, anga ed ontumbok a gangan na Katawan.

5 Tan say kasulatan na impangawak ed saraya a piligo so niiter ed saray mansaguinunor; tan dia ed onia, nia, mampatuloy ak unong ed asalitak la; tan saya so gawaen ko pian saray lalo a masagrado a beñgatla komon so nisinop ya onkana ed kakabatan na saray totook.

6 Angaman ontan, ag ak mansulat na beñgatla ed saray piligo likud no dia ed nunot ko saraya so sagrado. Tan natan no bilang naliñgo ak, angan siñga inkaliñgo na saraman so kadaanan a panaon; ag ak mambaraan ed inkasiak lapu ed saray arum a totoo, balet lapu ed kakapuyan a wala ed siak, unong ed laman, mambaraan ak ed inkasiak.

7 Tan saray beñgatla a pablien na saray arum a totoo a baleg so kakanaan da, mandapag ed laman tan kamarerua, saray arum ipasen da ya angapo so kakanaan tan gatin-gatinan da ed saray sali ra. On, angan say peteg a Dios na Israel saray totoo igatingatin da ed saray sali ra; ikuan ko, gatin-gatinan da ed saray sali ra balet mansalita ak ed sananey a salita—sikato so impasen da ya andi-kakanaan, tan ag da deñgelen so voces na panagbilin to.

8 Tan nia sikato so onsabi, unong ed saray salita na angel, ed anem a lasus a taon manlapu ed panaon ya intaynan nen amak ed Jerusalem.

9 Tan say mundo, lapu ed saray kaugesan da, sikato so okomen da a siñga sakey a beñgatla ya andi-kana; dia ed ontan sikato so bakbaken da, tan saya so itepel to; tan sikato so tampalen da, tan saya so itepel to. On, sikato so lukdaan da, tan saya so itepel to, lapu ed maaro a panañgasi tan say andukey a panañgitepel to ed saray anak na totoo.

10 Tan say Dios na kaamaan tayo, a sikara so nipaway ed Egipto, ed inkaukbar da ed inkaaripen, tan sikara met so niagel ed kalawakan ed panamegley to, on, say Dios nen Abraham, tan si Isaac, tan say Dios nen Jacob, iniabuloy to so inkasikato, unong ed salita na angel, bilang sakey a too, ed lima na saray marelmeng a totoo, pian sikato nipaatagey, unong ed saray salita nen Zenock, tan sikato so ipasak ed krus, unong ed salita nen Neum, tan ipumpon ed lubok a bato, unong ed salita nen Zenos, a sinalita to nipaakar ed talora ya agew na kabiluñgetan, a saya so pakapatnagan na ipatey to a niiter ed saray manayam ed pulo na dayat, malaglaem a niiter ed saraman so kabiañgan ed kailalakan na Israel.

11 Tan onia so inkuan na profeta: Say Katawan a Dios petepeteg a dalawen to so amin ya kailalakan na Israel ed saman ya agew, saray arum dia ed panamegley na voces to, lapu ed inkamatunong da, ya onkana ed baleg a gayaga tan kilalaban da, tan saray arum ed panamegley na karul tan kirmat na pakapanyari to, ed panamegley na bagyo, ed panamegley na apoy, tan dia ed panamegley na asewek, tan kelpa na biluñget, tan dia ed panamegley na iletak na dalin, tan dia ed panamegley na palandey a naawit ed tagey.

12 Tan amin a saraya a beñgatla so peteg ya onsabi, kuan nen profeta Zenos. Tan saray ankakabaleg a bato na dalin so nakaukolan a napaldua, tan lapu ed saray panaglem na dalin, dakel ya arari ed saray pulo na dayat so natanguyor na Espiritu na Dios, a mambalikas: Say Dios na mundo so maniirap.

13 Tan nipaakar ed saraman so wala ed Jerusalem, inkuan na profeta, sikara so pasegsegañgen na amin a totoo, lapu ed sikara so mañgipasak ed Dios na Israel, tan ipaliis da so saray puso ra, tan ag da awaten so saray pakapatnagan tan saray pakelaw, tan say pakapanyari tan gloria na Dios na Israel.

14 Tan lapu ed pañgipaliis da ed saray puso ra, inkuan na profeta, tan balawen da so masanto a Bugtong na Israel, manakarakar ira ed inkalaman, tan ompatey ira, tan manmaliw ira a puñges tan ag nalingwanan a salita, tan sikara so kabusol ed limog na amin a bansa.

15 Angaman ontan, dia ed isabi na saman ya agew, inkuan na profeta, no ag da la ipaliis so saray puso ra sumpa ed Masanto a Bugtong na Israel, dia ed onia nanunotan to so saray paknaan a ginawa to ed kaamaan da.

16 On, dia ed saman nanunotan to so saray pulo ed dayat; on, tan amin a totoo a sikara so kabiañgan ed kailalakan na Israel, sikara so tiponen ko, inkuan na Katawan, unong ed saray salita nen profeta Zenos, a manlapu ed saray apatira a sukong na mundo.

17 On, tan amin a dalin nanengneng da so kilalaban ed Katawan, inkuan na profeta; balang sakey a bansa, sankakanayon, salita tan totoo so nabendicionan.

18 Tan siak Nephi, insulat ko so saraya a beñgatla onkana ed saray totook, ag la piga sikara so nakuyong ko a makanunot ed Katawan a Mananundon da.

19 Dia ed onia, mansalita ak ed amin ya kailalakan na Israel, no saya so makaseñgeg pian sikara so makagamor ed saraya a beñgatla.

20 Tan nia, wala so kimey ko ed espiritu, a saya so mangogonigon ed siak ya angan saray kasokasoan ko so kinmapoy, nipaakar ed saray wala ed Jerusalem; no aliwa a mapañgasi so Katawan, a mañgipanengneng ed siak nipaakar ed sikara, ya angan siñga saray profeta nen daan a panaon, nayari ya inatey ak met la.

21 Tan sikato so peteg ya añgipanengneng ed saray profeta nen daan a panaon na saray amin a beñgatla nipaakar ed sikara; tan ontan met impanengneng to so dakel a nipaakar ed sikami; dia ed ontan, nakaukolan a nakabatan mi so nipaakar ed sikara lapu ed saraya so nisulat ed saray piligo a gansa.

22 Natan agawa a siak, Nephi, imbañgat ko ed saray kaagian so saraya a beñgatla; tan agawa ya imbasak ed sikara so dakel a beñgatla, a saraya so nitatak ed saray piligo a gansa, pian nakabatan da so saray ginagawa na Katawan ed arum a dalin, ed limog na saray totoo nen saman a panaon.

23 Tan imbasak ed sikara so dakel a beñgatla a nisulat ed libro nen Moises; balet pian komon nagnap so pakakuyong ko ed sikara a manisia ed Katawan a Mananundon da imbasak ed sikara so nipaakar ed insulat nen profeta Isaias; lapu ed inyaliling ko so amin a masanto a kasulatan ed sikami, pian komon onkana a pinabañgan tan pakaaralan mi.

24 Dia ed ontan, nansalita ak ed sikara, a nankuan: Deñgel yo so saray salita na profeta, sikayo a nakdaan ed kailalakan na Israel, sakey a sañga ya asipi; deñgel yo so saray salita na profeta, a nisulat ya onkana ed amin ya kailalakan na Israel, tan ipareng yo so saraya ed sikayo a dili, pian sikayo so nawalaan na ilalo tan ontan met ed saray kaagian yo a sikara so asipian yo; tan unong ed saya a kanengneñgan so insulat na say profeta.