1 Tan natan siak, Nephi, ag ko dia iter so listaan na kapolian na saray kaamaan ko ed saya a kabiañgan na kasulatan ko; odino dia ed antokaman a panaon iter ko so saya ed saraya a piligo ya isosulat ko; lapu ed niiter la ed kasulatan ya insinop nen amak; dia ed ontan, ag ko la isulat ed saya a kimey.

2 Lapu ed magenap la ed siak so pañgikuan ko a sikami so kapolian nen Jose.

3 Tan ag la makana ya idalatdat ko ya amin so awaran na saray beñgatla nipaakar ed si amak, lapu ed saraya so ag la naisulat ed saraya a piligo, lapu ed pilalek ko a wala so pasen komon ya isulat ko ed saray beñgatla ed Dios.

4 Lapu ed say pakagnap na dili a gagalak say pakakuyong ko komon ed saray totoo ya ondago ed Dios nen Abraham, tan say Dios nen Isaac, tan say Dios nen Jacob, tan sikara so nilaban.

5 Dia ed ontan, saray beñgatla a makapaliket ed mundo ag ko isulat, no ag iñgen saray beñgatla a makapaliket ed Dios tan nipaakar ed saray aliwa a taga dia ed saya a mundo.

6 Dia ed ontan, iter ko so gangan ed saray boleg ko, ya ag da ilugan ed saraya a piligo so saray beñgatla ya aliwa a manepeg ed saray anak na totoo.