Ang Basahon ni Mormon

1 Ug karon ako, si Mormon, mihimo og usa ka talaan sa mga butang nga akong nakita ug nadungog, ug motawag niini og Basahon ni Mormon.

2 Ug sa mga panahon nga si Ammaron mitago sa mga talaan ngadto sa Ginoo, miduol siya kanako, (ako mga napulo ka tuig ang panuigon, ug nagsugod ko sa pagkat-on sunod sa pamaagi sa kinaadman sa akong katawhan) ug si Ammaron miingon kanako: Akong nakita nga ikaw usa ka bata nga maligdong, ug paspas nga maniid;

3 Busa, kon moabot na og kawhaan ug upat ang imong panuigon manghinaot ko nga imong hinumdoman ang mga butang nga imong napanid-an kabahin niini nga katawhan; ug kon moabot ka na sa mao nga panuigon moadto ka sa yuta sa Antum, ngadto sa usa ka bungtod nga gitawag og Shim; ug tua didto akong gitipigan ngadto sa Ginoo ang tanang sagrado nga mga kinulit kabahin niini nga katawhan.

4 Ug tan-awa, dad-on nimo ang mga palid ni Nephi, ug ang nahibilin imong ibilin sa dapit nga nahimutangan niini; ug imong ikulit sa mga palid ni Nephi ang tanang butang nga imong napanid-an kabahin niini nga katawhan.

5 Ug ako, si Mormon, nga usa ka kaliwat ni Nephi, (ug ang ngalan sa akong amahan mao si Mormon) ako nakahinumdom sa mga butang nga gisugo ni Ammaron kanako.

6 Ug nahitabo nga ako, nga napulo ug usa ang panuigon, gidala sa akong amahan ngadto sa yuta sa habagatan nga bahin, gani ngadto sa yuta sa Zarahemla.

7 Ang ibabaw sa tibuok yuta napuno sa dagkong mga gambalay, ug ang katawhan hilabihan ka daghan, sama sa mga balas sa dagat.

8 Ug nahitabo niini nga tuig nagsugod ang usa ka gubat tali sa mga Nephita, nga gilangkoban sa mga Nephita ug sa mga Jacobita ug sa mga Josephita ug sa mga Zoramita; ug kini nga gubat nahitabo tali sa mga Nephita, ug sa mga Lamanita ug sa mga Lemuelita ug sa mga Ishmaelita.

9 Karon ang mga Lamanita ug ang mga Lemuelita ug ang mga Ishmaelita gitawag og mga Lamanita, ug ang duha ka pundok mao ang mga Nephita ug mga Lamanita.

10 Ug nahitabo nga ang gubat nagsugod taliwala kanila didto sa mga utlanan sa Zarahemla, sa katubigan sa Sidon.

11 Ug nahitabo nga ang mga Nephita nakapundok og daghang lalaki, gani misobra sa katloan ka libo. Ug nahitabo nga niining mao nga tuig dihay pipila ka gubat, diin gilupig sa mga Nephita ang mga Lamanita ug mipatay og daghan kanila.

12 Ug nahitabo nga ang mga Lamanita misibog sa ilang plano, ug adunay kalinaw sa yuta; ug ang kalinaw nagpabilin sulod sa mga upat ka tuig, nga walay dugo nga miagas.

13 Apan ang pagkadaotan nagpabilin sa ibabaw sa tibuok yuta, nga niana ang Ginoo mikuha sa iyang hinigugma nga mga disipulo, ug ang buhat sa mga milagro ug pagpang-ayo nahunong tungod sa kadaotan sa katawhan.

14 Ug wala nay mga gasa gikan sa Ginoo, ug ang Espiritu Santo wala na mokunsad ngadto kang bisan kinsa, tungod sa ilang pagkadaotan ug pagkawalay pagtuo.

15 Ug ako, nga napulo ug lima ang panuigon ug adunay maligdong nga panghunahuna, busa ang Ginoo miduaw kanako, ug nakatagamtam ug nasayod sa kaayo ni Jesus.

16 Ug naningkamot ako sa pagsangyaw niini nga katawhan, apan ang akong ba-ba gipatak-om, ug ako gidid-an nga ako mosangyaw kanila; kay tan-awa tuyo gayod nila ang pagsupil batok sa ilang Dios; ug ang hinigugma nga mga disipulo gikuha gikan sa yuta, tungod sa ilang pagkadaotan.

17 Apan nagpabilin ako taliwala kanila, apan gidid-an ako sa pagsangyaw kanila, tungod sa katig-a sa ilang mga kasingkasing; ug tungod sa katig-a sa ilang mga kasingkasing ang yuta gitunglo tungod kanila.

18 Ug kini nga mga tulisan ni Gadianton, nga anaa taliwala sa mga Lamanita, midagsang sa yuta, nga niana ang mga lumulupyo niini misugod sa pagtago sa ilang mga bahandi sa ilawom sa yuta; ug nahimo kining madanglog, tungod kay ang Ginoo mitunglo sa yuta, nga dili sila makagunit niini, ni makabaton niini pag-usab.

19 Ug nahitabo nga dihay mga barangan, ug mga pamarang, ug mga salamangka; ug ang gahom sa usa nga daotan midagsang sa ibabaw sa tibuok yuta, gani ngadto sa katumanan sa tanang pulong ni Abinadi, ug usab ni Samuel nga Lamanita.