Ang Libro ni Mormon

1 Kag karon ako, si Mormon, nagahimo sang kasulatan parte sa mga butang nga akon nakita kag nabatian, kag ginatawag ini nga Libro ni Mormon.

2 Kag sang tion nga ginpatago ni Amaron ang mga kasulatan sa Ginuo, ginkadtoan niya ako, (ako nga mga napulo ka tuig ang edad, kag nagsugod ako nga makatuon suno sa paagi sang tinun-an sang akon katawhan) kag si Amaron nagsiling sa akon: Nasayran ko nga isa ikaw ka but-anan nga bata, kag maabtik sa pagpanilag;

3 Gani, kon ikaw manug-beynte kwatro katuig na ang edad luyag ko nga dumdumon mo ang mga butang nga imo napanilagan parte sining katawhan; kag kon yara na ikaw sa amo nga pangidaron magkadto ka sa duta sang Antum, sa isa ka bungyod nga pagatawagon nga Sim; kag didto ginlubong ko para sa Ginuo ang tanan nga sagrado nga mga kinurit parte sining katawhan.

4 Kag tan-awa, kuhaon mo ang mga lamina ni Nefi para sa imo kaugalingon, kag ang nabilin bayaan mo sa lugar kon sa diin nahamtang ang mga ini; kag ikurit mo sa mga lamina ni Nefi ang tanan nga butang nga imo napanilagan parte sining katawhan.

5 Kag karon ako, si Mormon, nga isa ka kaliwat ni Nefi, (kag ang ngalan sang akon amay amo si Mormon) nadumduman ko ang mga butang nga ginsugo sa akon ni Amaron.

6 Kag natabo ini nga ako, nga onse ka tuig ang edad, gindala sang akon amay sa duta pa-sur, bisan pa sa duta sang Zarahemla.

7 Ang bug-os nga ibabaw sang duta napuno sang mga bilding, kag ang katawhan nangin halos pareho kadamo sang balas sa dagat.

8 Kag natabo ini, sa sini nga tuig may nagsugod nga isa ka giyera sa tunga sang mga Nefinhon, nga nalakipan sang mga Nefinhon kag sang mga Jacobnon kag sang mga Josefnon kag sang mga Zoramnon; kag ini nga giyera yara sa tunga sang mga Nefinhon, kag sang mga Lamanhon kag sang mga Lemuelnon kag sang mga Ismaelnon.

9 Karon ang mga Lamanhon kag ang mga Lemuelnon kag ang mga Ismaelnon gintawag nga mga Lamanhon, kag ang duha ka grupo amo ang mga Nefinhon kag mga Lamanhon.

10 Kag natabo ini nga ang giyera nagsugod sa tunga nila sa mga dulonan sang Zarahemla malapit sa mga tubig sang Sidon.

11 Kag natabo ini nga ang mga Nefinhon nagtipon sing madamo kaayo nga lalaki, bisan nga sobra pa sa kadamuon nga treinta ka libo. Kag natabo ini nga nakaagom sila sa sini man nga tuig sang pila ka mga inaway nga sa diin ginpierde sang mga Nefinhon ang mga Lamanhon kag ginpamatay ang madamo sa ila.

12 Kag natabo ini nga gintalikdan sang mga Lamanhon ang ila plano, kag nagluntad ang paghidaet sa kadutaan; kag ang paghidaet nagpabilin sa sulod sang mga apat ka tuig nga wala sing pagpaagay sang dugo.

13 Apang ang kalainan naglapnag sa ibabaw sang bug-os nga kadutaan, sa bagay nga ginpanguha sang Ginuo ang iya hinigugma nga mga disipulo, kag ang buhat sang mga milagro kag sang pagpang-ayo nag-untat tungod sang kalainan sang katawhan.

14 Kag wala na sing mga dulot halin sa Ginuo, kag ang Balaan nga Espiritu indi na nangin kaupod sing bisan sin-o tungod sang ila kalainan kag pagkawala’y pagtuo.

15 Kag ako, nga kinse ka tuig ang edad kag may maligdong nga kaisipan, gani ginbisita ako sang Ginuo, kag nakatilaw kag nakahibalo sang kaayo ni Jesus.

16 Kag nagtinguha ako sa pagwali sa sining katawhan, apang ang akon baba ginpakipot, kag gindumilian ako nga magwali sa ila; kay tan-awa hungod sila nga nagrebelde batok sa ila Dios; kag ang hinigugma nga mga disipulo ginpanguha halin sa kadutaan tungod sang ila kalainan.

17 Apang nagpabilin ako upod sa ila, ugaling gindumilian ako sa pagwali sa ila tungod sang katig-a sang ila mga tagipusuon; kag tungod sang katig-a sang ila mga tagipusuon ang duta ginsumpa bangod sa ila.

18 Kag ining mga tulisan ni Gadianton, nga yara kaupod sa mga Lamanhon, namugad sa kadutaan, sa bagay nga ang mga pumuluyo sini nagsugod sa pagtago sang ila mga manggad sa duta; kag nangin madanlog ang mga ini, tungod ginsumpa sang Ginuo ang kadutaan, nga indi nila mauyatan ang mga ini, ukon mahuptan liwat ang mga ini.

19 Kag natabo ini nga may mga pagpanghiwit, kag mga pagbabaylan, kag mga salamangka; kag ang gahum sing isa nga malain naghikot sa bug-os nga ibabaw sang duta, bisan tubtob sa pagtuman sang tanan nga pulong ni Abinadi, kag amo man ni Samuel ang Lamanhon.