1 Kag karon natabo ini nga sa ika-tatlo ka gatos kag sisenta’y tres nga tuig ang mga Nefinhon nagtaklad upod ang ila mga kasoldadohan agud magpakig-away batok sa mga Lamanhon, sa gwa sang duta nga Kamingaw.

2 Kag natabo ini nga ang mga kasoldadohan sang mga Nefinhon ginpanabog liwat pabalik sa duta sang Kamingaw. Kag samtang ginakapoy pa sila, isa ka bag-o nga kasoldadohan sang mga Lamanhon ang nagsalakay sa ila; kag nangin grabe ang ila inaway, sa bagay nga naagaw sang mga Lamanhon ang pagpanag-iya sang siyudad nga Kamingaw, kag nagpamatay sang madamo sang mga Nefinhon, kag nagdala sang madamo nga bihag.

3 Kag ang nabilin nagpinalagyo kag nagbuylog sa mga pumuluyo sang siyudad nga Teancum. Karon ang siyudad nga Teancum nahamtang sa mga dulonan malapit sa baybayon; kag malapit man ini sa siyudad nga Kamingaw.

4 Kag natabo ini tungod ang mga kasoldadohan sang mga Nefinhon nagtaklad sa pagsalakay sa mga Lamanhon nga nagsugod sila nga mahalitan; kay kon indi tungod sina, ang mga Lamanhon wala kuntani nakaangkon sing gahum sa ila.

5 Apang, tan-awa, ang mga paghukom sang Dios magatupa sa mga malain; kag paagi sa mga malain nga ang mga malain ginasilotan; kay ang mga malain amo ang nagasugyot sang mga tagipusuon sang mga anak sang katawhan tubtob sa pagpaagay sang dugo.

6 Kag natabo ini nga ang mga Lamanhon naghimo sang mga pagpanghanda sa pagsalakay batok sa siyudad nga Teancum.

7 Kag natabo ini, sa ika-tatlo ka gatos kag sisenta’y kwatro nga tuig ang mga Lamanhon nagsalakay batok sa siyudad nga Teancum agud maangkon man nila ang siyudad nga Teancum.

8 Kag natabo ini nga napaisol sila kag ginpanabog pabalik sang mga Nefinhon. Kag sang nakita sang mga Nefinhon nga napanabog nila ang mga Lamanhon naghinambog sila liwat sang ila kaugalingon nga kusog; kag nagsulong sila sa ila kaugalingon nga ikasarang, kag ginbawi liwat ang pagpanag-iya sang siyudad nga Kamingaw.

9 Kag karon ining tanan nga butang nahimo, kag may linibo nga nagkalamatay sa duha ka bahin, sa mga Nefinhon kag sa mga Lamanhon.

10 Kag natabo ini nga ang ika-tatlo ka gatos kag sisenta’y sais nga tuig nagligad na, kag ang mga Lamanhon nagsulong liwat sa mga Nefinhon agud magpakig-away; kag sa gihapon ang mga Nefinhon wala naghinulsol sang kalainan nga ila nahimo, kundi dalayon nga nagpabilin sa ila kalainan.

11 Kag indi masarangan nga ilaragway sang dila, nga isulat sang tawo ang lubos nga paglarawan sang makahaladlok nga talan-awon sang dugo kag pagpamatay nga natabo sa katawhan sang mga Nefinhon kag sang mga Lamanhon; kag ang tagsa ka tagipusuon nagtig-a, amo nga nagkalipay sila sa pagpaagay sang dugo sing dalayon.

12 Kag wala pa gid halin sadto sang amo kadako nga kalainan sa tanan nga anak ni Lehi, ukon bisan sa tanan nga panimalay ni Israel, suno sa mga pulong sang Ginuo, pareho sang yara sa sining katawhan.

13 Kag natabo ini nga naagaw sang mga Lamanhon ang pagpanag-iya sang siyudad nga Kamingaw, kag ini tungod ang ila kadamuon naglabaw sa kadamuon sang mga Nefinhon.

14 Kag naglakat man sila pasulong batok sa siyudad nga Teancum, kag ginpanabog ang mga pumuluyo pagwa sa iya, kag nagdala sang madamo nga bihag nga mga babayi kag kabataan, kag ginpanghalad sila bilang mga sakripisyo sa ila idolo nga mga dios-dios.

15 Kag natabo ini nga sa ika-tatlo ka gatos kag sisenta’y siyete nga tuig, ang mga Nefinhon naakig tungod ginpangsakripisyo sang mga Lamanhon ang ila mga babayi kag mga kabataan, nga nagsalakay sila batok sa mga Lamanhon sa tuman kadako nga kaakig, sa bagay nga ginpierde nila liwat ang mga Lamanhon, kag ginpanabog sila pagwa sa ila mga kadutaan.

16 Kag ang mga Lamanhon wala na nagsalakay liwat batok sa mga Nefinhon tubtob sa ika-tatlo ka gatos kag sitenta’y singko nga tuig.

17 Kag sa sini nga tuig nagsalakay sila batok sa mga Nefinhon upod ang tanan nila nga mga kasoldadohan; kag wala sila naisip tungod sang kadako sang ila kadamuon.

18 Kag halin sa sini nga tion ang mga Nefinhon wala na nakaangkon sing gahum sa mga Lamanhon, kundi nagsugod nga maubos nila pamatay bisan pareho sang tun-og sa atubang sang adlaw.

19 Kag natabo ini nga ang mga Lamanhon nagsalakay batok sa siyudad nga Kamingaw; kag may tuman kagrabe nga inaway nga nagpadayon sa duta nga Kamingaw nga sa diin ginpierde nila ang mga Nefinhon.

20 Kag nagpinalagyo sila liwat halin sa ila atubang, kag nag-abot sila sa siyudad nga Boaz; kag didto nagtindog sila batok sa mga Lamanhon sa tuman nga kaisog, sa bagay nga wala sila napierde sang mga Lamanhon tubtob nga nagsalakay sila liwat sa ika-duha nga tion.

21 Kag sang nagsalakay sila sa ika-duha nga tion, ang mga Nefinhon ginpanabog kag ginpamatay sa tuman kadako nga pagpamatay; ang ila mga babayi kag ang ila mga kabataan ginpangsakripisyo liwat sa mga dios-dios.

22 Kag natabo ini nga ang mga Nefinhon nagpinalagyo liwat halin sa ila atubang, nga ginadala ang tanan nga pumuluyo upod sa ila, sa mga banwa kag mga baryo.

23 Kag karon ako, si Mormon, nga nakakita nga ang mga Lamanhon nagahana na sa paglaglag sang kadutaan, gani nagkadto ako sa bungyod sang Sim, kag ginkuha ang tanan nga kasulatan nga ginpatago ni Amaron sa Ginuo.